Nagretiro na si PBA Veteran JayR Reyes matapos ang 14 na taon sa liga.
Ang anunsiyo ay ginawa ng four-time PBA champion ilang araw bago ang pag-arangkada ng league training.
Bago namaalam sa PBA, mahigit isang dekada ring naglaro si Reyes sa ilang teams sa liga tulad ng Rain or Shine, Alaska, Meralco, Barangay Ginebra, San Miguel at Phoenix LPG.
Umakyat na sa 11,369 ang bilang ng mga Pilipinong gumaling sa COVID-19 sa labas ng bansa.
Ito’y ayon sa Department of Foreign Affairs (DFA) makaraang makapagtala ito ng dalawampung bagong recoveries.
Sumampa naman sa 6,076 ang active cases habang nasa 1,162 na ang bilang ng mga nasawi sa hanay ng mga Pinoy sa ibayong dagat.
Nananatiling “voluntary” ang pagpapabakuna.
Dahil dito, binigyang diin ni Health Undersecretary Maria Rosario Vergeire na hindi dapat inoobliga ng mga employer ang mga aplikante na magpabakuna muna bago pumasok sa kanilang kompanya.
Matatandaang ginawa nang requirement ng US-based Delta Air ang pagpapabakuna sa kanilang mga bagong tanggap na empleyado.
Arestado ang isang dating alagad ng batas dahil sa umano’y pagbebenta ng ipinagbabawal na droga sa Floridablanca, Pampanga.
Ang 43-anyos na si alyas “Jun” na dating pulis ay nahuli sa Barangay San Nicolas.
Ang suspek ay nadakip ng pinagsamang buy-bust operation ng Philippine Drug Enforcement Unit-Provincial Intelligence Unit, Pampanga Police Provincial Office at Floridablanca Station Drug Enforcement Unit.
Nasabat mula sa kanya ang limang sachets ng hinihinalang shabu na tinatayang nagkakahalaga ng P136,000, kasama na rito ang isang baril, magasin, at mga bala.
Nakapagtala pa ng 10 kaso ng Indian variant ng COVID-19 ang na-detect ng Department of Health (DOH) sa Pilipinas.
Ayon sa DOH, sa mga bagong natuklasang impeksiyon, siyam sa mga ito ay pawang mga tripulante ng MV Athens Bridge.
Dahil dito, sumampa na sa 12 ang bagong kumpirmadong kaso ng Indian variant sa bansa.
Samantala, kabilang naman sa mga tinamaan ng bagong variant ay isang seaman na umuwi mula Belgium.
Pinatutunayan ng matapang na pahayag ni Pangulong Rodrigo Duterte ukol sa West Philippine Sea (WPS) na hindi inaabandona ng Presidente ang obligasyon nitong ipagtanggol ang ating kasarinlan at karapatan sa nasabing teritoryo.
Ito ang inihayag ni Chief Presidential Legal Counsel Salvador Panelo matapos manawagan si Duterte sa mga barko ng Pilipinas na manatili sa rehiyon sa gitna ng panghihimasok ng China sa Exclusive Economic Zone O EEZ ng bansa.
Matatandaang binalaan ni Duterte ang China na hindi niya i-uutos ang pag-urong o pag-alis ng mga barko sa WPS kahit patayin pa umano siya.
Bangungot ang mararanasan ni dating Sen. Antonio Trillanes IV.
Ito’y ayon kay Chief Presidential Legal Counsel Salvador Panelo sakaling ituloy ni Trillanes ang plano nitong tumakbo sa pagka-Pangulo sa 2022.
Ngunit sinabi ni Panelo na nais niya rin namang ituloy ni Trillanes ang pagkandidato para makita niya ang sampal sa kanya ng mga botante.
Matatandaang inanunsiyo ng dating Senador na handa siyang pumalit kay Vice President Leni Robredo bilang kandidato sa halalang pampanguluhan sa ilalim ng opposition coalition na 1Sambayan.
Walang plano ang pamahalaan na alisin ang ipinatutupad nitong face mask policy kahit pa sa mga indibidwal na nabakunahan kontra Coronavirus Disease 2019 o COVID-19.
Ayon kay Department of Health Undersecretary Maria Rosario Vergeire, wala pang sapat na ebidensyang makapagpapatunay na ligtas na laban sa virus ang mga naturukan ng bakuna kahit walang mask ang mga ito.
Giit ni Vergeire, kahit ang mga vaccinated individuals ay maaari pa ring mahawa at makahawa ng virus.
Binigyang diin pa ng opisyal na hindi maaaring gayahin ng Pilipinas ang ibang bansa tulad ng Estados Unidos dahil nabakunahan na aniya laban sa sakit ang malaking bahagi ng kanilang populasyon.
Sumirit na sa 1,062,427 ang bilang ng mga gumaling sa coronavirus disease 2019 (COVID-19) sa Pilipinas.
Ito’y makaraang makapagtala ang Department of Health (DOH) ng 8,952 na bagong recoveries.
Batay sa pinakahuling case bulletin ng DOH, nagkaroon naman ng 6,739 na bagong impeksiyon kaya’t sumampa na sa 1,138,187 ang bilang ng mga tinamaan ng Covid-19 sa buong bansa.
Sa nabanggit na bilang, nasa 56,709 ang active cases.
Dahil naman sa pagpanaw ng 93 pang indibidwal, sumampa na sa 19,051 ang death toll sa buong kapuluan.
Patay ang isang lalaking Lebanese matapos umanong pagbabarilin ng Israeli troops habang lumalahok sa protesta ng mga supporters ng Palestine.
Kinilala ang biktima na si Mohammad Tahhan, 21 taong gulang.
Ayon sa ulat, sumali si Tahhan sa kilos-protesta laban sa Israel sa border nito sa Palestine bunsod na rin ng walang tigil na pambobomba sa Gaza Strip.
Depensa naman ng militar ng Israel, sinira ng mga Lebanese ang mga harang na ginawa nila at sinunog din ang lugar kaya’t napilitan silang magpaputok.