Gilbert Perdez

Isinusulong sa Senado ang pagkakaloob ng cash aid sa mga buntis na informal workers ngayong panahon ng pandemya.

Batay sa Senate Bill No. 2175 ni Sen. Risa Hontiveros, makakakuha ang mga benepisyaryo ng one-time cash aid na katumbas ng 22 araw na minimum wage sa rehiyon kung saan ito nakatira.

Kung makakakuha naman ng sapat na suporta sa mayorya ng mga senador, huhugutin ang pondo mula excise taxes sa sweetened beverages, alcohol at tobacco products habang maaari ring dagdagan mula sa pambansang badyet.

Dapat ituloy ng gobyerno ang planong pagbili ng tatlong submarines.

Ito ang iginiit ni Surigao del Sur Rep. Johnny Pimentel sa gitna ng patuloy umanong panghihimasok ng China sa West  Philippine Sea (WPS).

Sinabi ni Pimentel na magiging mahalagang parte ng defensive combat ships ng Pilipinas ang submarino upang maprotektahan ang ating teritoryo.

Binigyang diin pa ng mambabatas na maaaring gamitin ang mga submarines sa pagsasagawa ng surveillance, intelligence at reconnaissance operations laban sa mga nagkalat na Chinese maritime militia vessels sa WPS.

Laglag sa kamay ng mga awtoridad ang isang guro at dalawang miyembro ng Philippine Coast Guard sa isinagawang buy-bust operation sa lungsod ng Zamboanga.

Nabatid na isang pulis ang nagpanggap na buyer sa operasyon at nakabili ng droga mula sa hindi pinangalanang mga suspek sa Atis Drive, Barangay Baliwasan.

Nakumpiska sa operasyon ang apat na pakete ng hinihinalang shabu na nagkakahalaga ng 200,000 pesos.

Sa isa pang operasyon sa Barangay Cabatangan, huli rin ang isang mag-asawa dahil din sa pagbebenta ng ipinagbabawal na gamot.

Sasampahan ang mga suspek ng kasong paglabag sa Comprehensive Dangerous Drugs Act.

Ang totoong target ng Anti-Terrorism Act ay ang mamamayang Pilipino.

Ito ang binigyang diin ni National Democratic Front of the Philippines peace consultant Rey Casambre ilang araw matapos tukuyin ng Anti-Terrorism Council si Communist Party of the Philippines founder Jose Maria Sison at labing-walong iba pang opisyal nito bilang terorista.

Giit ni Casambre, walang ibang layunin ang ATC sa paglalabas ng resolusyon kundi patahimikin ang mga nagsasalita o sumisigaw ng pagbabago sa bayan.

Maliban sa CPP-NPA, kabilang din sa mga pinangalanang indibidwal bilang terorista ay may koneksyon sa Dawlah Islamiyah, Abu Sayyaf Group, at Bangsamoro Islamic Freedom Fighters o BIFF.

Matatandaang idinepensa ng ATC na ‘validated’ ang mga nakuha nilang impormasyon na kasama ang mga ito sa nagpaplano, naghahanda at nagsasagawa ng mga hakbang na may kinalaman sa terorismo.

Nakapagtala ang Department of Health (DOH) ng 5,790 na bagong COVID-19 cases.

Bunga nito, sumampa na sa 1,143,963 ang bilang ng mga tinamaan ng impeksiyon sa buong bansa.

Maliban dito, nakapagtala rin ang DOH ng 7,541 na bagong recoveries kaya’t sumirit na sa 1,069,868 ang bilang ng mga gumaling sa sakit.

Sa nasabing numero, nasa 54,904 ang mga aktibong kaso.

Samantala, dahil naman sa pagpanaw ng 140 pang pasyente, pumalo na sa 19,191 ang death toll sa buong kapuluan.

JUST IN: Kaso ng COVID-19 sa bansa, nadagdagan pa ng 5,790 ngayong Linggo, Mayo 16.

Pumalo na sa kabuuang 1,143,963 ang bilang ng kumpirmadong kaso ng COVID-19 sa bansa. Mayroon namang 54,904 naitalang active cases. | https://t.co/HHOy7zaafm pic.twitter.com/PXarPkg2TR

— DWIZ Newscenter (@dwiz882) May 16, 2021

Natumbok ng nag-iisang mananaya mula Abucay City, Bataan ang P29.7 milyon na jackpot prize sa Grand Lotto 6/55.

Ayon kay Philippine Charity Sweepstakes Office (PCSO) general manager Royina Garma, nakuha ng masuwerteng bettor ang winning combination na 13-01-50-10-51-54.

Dalawang mananaya naman ang nakasungkit ng second prize kaya’t makakapagbulsa ang mga ito ng P100,000 bawat isa matapos mahulaan ang lima sa anim na kumbinasyon.

Ang Grand Lotto 6/55 ay binobola tuwing Lunes, Miyerkules, at Sabado.

Aabot sa P13.6 million na halaga ng hinihinalang shabu ang nasabat ng mga awtoridad mula sa dalawang drug suspects sa ikinasang buy-bust operation sa Taguig City.

Kinilala ang mga suspek na sina Melanie Capin, 35 taong gulang, at Jeffrey Sadiasa, 31 taong gulang.

Agad na dinakip sina Capin at Sadiasa nang bentahan ng umano’y shabu ang mga ahente ng Philippine Drug Enforcement Agency (PDEA) sa Sunshine Mall sa FTI.

Kasong paglabag sa Republic Act 9165 o Comprehensive Dangerous Drugs Act ang isasampa laban sa mga suspek.

Sumadsad ng 10% ang bilang ng mga tinatamaan ng COVID-19 sa bansa.

Ito ang isiniwalat ng OCTA Research makaraang makapagtala ang Department of Health  (DOH) ng higit 10,000 kaso sa pitong magkakasunod na araw.

Batay sa pinakahuling monitoring report ng OCTA, ang nasabing numero ay naitala mula ika-9 hanggang ika-15 ng Mayo.

Pinakamarami naman ang bilang ng impeksiyon sa National Capital Region (NCR) na nasa 1,644 cases na nagkaroon ng 30%t na pagbaba at sinundan ito ng Cavite na may 330 cases kung saan nagkaroon din ng 20%  na pagbaba.

Sa loob naman ng nasabing panahon, higit isang daan ang mga naitalang insidente ng pagkamatay kada araw.