Patuloy na nagpapakita ng abnormalidad ang Bulkang Taal.
Ito ang isiniwalat ng Phivolcs matapos muling magbuga ng makapal na usok ang bulkan.
Ngunit kahit tila wala pa ring awat sa pagpapakita ng seismic activity ang Taal, nilinaw ng Phivolcs na walang dapat ikabahala rito sa ngayon.
Matatandaang nagkaroon ng pasulpot-sulpot na steam plume o singaw sa bunganga ng bulkan nitong Huwebes kaalinsabay ng pag-ulan kung saan umabot ng dalawang kilometro pataas ang usok patungong timog-kanluran.
Ikinatuwa ng Malacañang ang napaulat na pagtaas ng kumpiyansa ng publiko sa bakuna kontra COVID-19.
Ito ang inihayag ni Presidential Spokesperson Harry Roque matapos lumalabas sa survey ng Social Weather Stations (SWS) mula Abril 28 hanggang Mayo 2 na 51% ng mga adult Filipinos ay tiwala sa ginawang evaluation ng gobyerno sa COVID-19 vaccines.
Binanggit din sa survey na ang 58 percent ng mga Pinoy na tiwala sa pagbusisi ng pamahalaan sa mga COVID-19 vaccines ay nagsabing handa rin silang magpaturok ng bakuna.
Dahil dito, sinabi ni Roque na patuloy nilang kukumbinsihin ang publiko na magpabakuna laban sa impeksiyon.
Halos tatlong milyong aplikasyon para sa voter registration at iba pang requests ang natanggap ng Commission on Elections (Comelec) mula noong nakaraang taon.
Ayon sa Comelec, as of Mayo 15, nasa 2,904,347 applications na ang nakuha nila mula sa iba’t ibang panig ng bansa.
Mas marami umano ang mga naitalang bilang ng mga aplikasyon mula Enero hanggang Marso ngayong taon na nasa 776,194.
Matatandaang umangkarada na muli ang voter registration sa Metro Manila at iba pang kalapit-lalawigan noong Mayo 17 kung saan patuloy din ang satellite voter registration sa mga barangay.
Pinapayagan na ang hanggang ‘30% capacity’ sa mga simbahan at iba pang religious gatherings sa mga lugar na nasa ilalim ng general community quarantine (GCQ).
Ito ang muling nilinaw ni Department of Justice Secretary Menardo Guevarra matapos baguhin ng IATF ang mga alituntunin ukol sa seating capacity sa mga gawaing pangrelihiyon.
Bukod sa NCR Plus, sa ilalim din ng GCQ ang Apayao, Baguio City, Benguet, Kalinga, Mountain Province, Abra, at iba pang rehiyon hanggang Mayo 30.
Opisyal nang uupo sa susunod na buwan si outgoing Capiz Archbishop Jose Cardinal Advincula bilang 33rd Archbishop of Manila.
Ito ang kinumpirma ni Manila Apostolic Administrator Bishop Broderick Pabillo matapos itong italaga ni Pope Francis noong Marso.
Papalitan ni Advincula si Luis Antonio Cardinal Tagle na itinalaga naman bilang Prefect of the Congregation for the Evangelization of People sa Vatican.
Pangungunahan naman ni Papal Nuncio to the Philippines, Archbishop Charles Brown ang misa para sa pagkakaluklok kay Advincula sa Manila Cathedral sa Hunyo 24.
Target ng Mandaluyong City government na maabot ang ‘herd immunity’ kontra COVID-19 sa Oktubre ngayong taon.
Ayon sa LGU, para mabakunahan ang tinatayang 325,127 residents sa pagitan ng Setyembre at Oktubre ay kailangang umabot sa 5,000 ang kanilang vaccination capacity kada araw.
Patuloy naman ang house-to-house vaccine operations para sa mga bedridden senior citizens sa Mandaluyong at naglalaan din ang lokal na pamahalaan ng libreng shuttle services sa mga vaccination centers.
Lusot na sa House Committee on Appropriations ang panukalang batas na layong maglaan ng P405.6 bilyon para sa tuloy-tuloy na pagbangon ng ekonomiya ng bansa.
Ayon kay Albay Rep. Joey Salceda, sa ilalim ng Bayanihan to Arise As One Act o Bayanihan 3 bill ay maglalaan ang Bangko Sentral ng Pilipinas ng ‘additional advances’ ng hanggang sampung porsiyento ng average income ng national government nang walang interes.
Nakasaad sa panukala na pagkakalooban ng P1,000 na ayuda ang bawat Pilipino kahit na ano pa ang katayuan nito sa buhay.
Dahil aprubado na sa komite, itutulak naman ang bill sa plenaryo para sa isa pang sigwada ng deliberasyon.
Inanunsiyo ng Israeli military na nawasak nito ang bahay ng isa sa pinakamataas na lider ng Hamas militants sa Gaza sa gitna ng patuloy na pagbayo ng mga bomba sa Palestine.
Sa ulat ng AFP, pinuntirya ng mga sundalo ng Israel sa kanilang operasyon ang magkapatid na Muhammad at Yehiyeh Sinwar na siyang pinakamatandang lider ng Hamas sa lugar.
Matatandaang noong Sabado ay binomba rin ng Israeli troops ang bahay ng isa pang lider ng Hamas na si Khalil al-Hayeh.
Hindi naman binanggit ng Israel kung may napatay sila sa mga nasabing pag-atake.
Nawalan ng kuryente ang buong bayan ng Rapu-Rapu, kabilang ang Batan Island, sa Albay.
Ito’y makaraang ipag-utos ng National Power Corporation (NPC) ang pagputol sa power supply sa bayan dahil sa kabiguan ng daan-daang mga konsyumer na bayaran ang inisyal na P15 milyon mula sa P32 milyon na unpaid bills sa Albay Power Energy Corp. (APEC).
Paliwanag ni APEC Institutional Relations & Customer Support Department head Lesley Capus, mahigit anim na raan lamang mula sa halos dalawang libong kustomer ang nakapagbayad kasunod ng ibinigay nilang apat na araw na pitch-in collection period o katumbas ng dalawang porsiyento ng kabuuang bilang ng kanilang mga konsyumer.
Unang nawalan ng power supply ang Batan Island at sumunod naman ang Rapu-Rapu.
Giit ni Capus, sapat na ang konsiderasyon at pagkakataong ibinigay nila sa mga APEC customers para sa bayaran ang kanilang obligasyon sa kompanya kaya’t kinailangan nilang putulin ang supply ng kuryente sa nasabing lugar.
Pinagkalooban ng tulong ng Department of Education (DepEd) ang limang guro at dalawang volunteer-teachers ng Hubo Elementary School sa Magallanes, Sorsogon na nakaligtas matapos lumubog ang sinasakyan nilang bangka habang bumibiyahe patungong paaralan.
Sa isang pahayag, sinabi ni DepEd Secretary Leonor Briones na ang mga titser ay binigyan ng financial assistance at psychosocial support ng kanilang field office sa lalawigan dulot ng naranasang physical at emotional trauma ng mga ito.
Bukod dito, sinabi ni Briones na handa ring palitan ng Schools Division Office ang mga nasira o nawalang equipment ng mga guro at binigyan din ng sila ng sapat na leave credits upang tuluyang maka-recover sa trahedya.
Matatandaang na-rescue ang mga guro noong Mayo 3 makaraang lumubog ang sinasakyan nilang bangka nang hampasin ng malakas na hangin at alon.