Gilbert Perdez

Handa nang sumalang sa pagbabakuna ang mga miyembro ng Philippine National Police o PNP.

Katunayan, ayon kay PNP Chief Gen. Guillermo Eleazar, ready na rin ang kanilang priority list at hinihintay na lamang nila ang vaccine allocations para sa Pambansang Pulisya.

Kasama ang mga PNP personnel sa “A4″ o essential frontliners category kaya’t inaasahang mababakunahan ang mga ito sa susunod na buwan.

Bilang PNP chief, si Eleazar ang unang babakunahan, kasunod ang mga naka-deploy sa labas ng mga himpilan ng pulisya, supervisors, at maging ang mga nakatutok sa administrative works.

Naitala ng Pilipinas ang pinakamataas na daily vaccination rate mula nang umarangkada ang vaccination program noong Marso ngayong taon.

Ayon kay National Task Force Against COVID-19 Chief Implementer Carlito Galvez Jr., umabot sa 229,769 doses ang naiturok noong Huwebes kaya’t nabasag nito ang 120,529 jabs na naitala naman noong Mayo 15.

Sa kabuuan, nasa 3,718,308 doses na ang naipamahagi sa iba’t ibang panig ng bansa sa priority groups na A1, A2 at A3 na kinabibilangan ng mga healthcare workers, senior citizens, at persons with comorbidities.

Target namang mabakunahan ang mga nasa hanay ng economic at government front-liners, kabilang ang nasa indigent communities.

Nadagdagan ng 7,981 ang bilang ng mga narekober sa COVID-19 infection sa Pilipinas.

Dahil dito, pumalo na sa 1,103,945 ang mga survivors sa bansa o katumbas ng 93.7 percent ng kabuuang bilang ng mga naitatalang kaso mula nang magsimula ang pandemya noong nakaraang taon.

Umakyat naman sa 1,178,217 ang total cases dahil sa 6,831 na nadagdag na bagong kaso.

Sa kasalukuyan, nasa 54,326 na ang active cases.

Bunsod naman ng pagpanaw ng halos dalawang daang pasyente, sumirit na sa 19,946 ang death toll sa buong kapuluan.

Umusad na sa Kongreso ang panukalang batas na magtatatag ng dalawang ahensya ng gobyerno na tutugon sa global health crisis tulad ng COVID-19 pandemic.

Ito’y makaraang isumite ng House appropriations panel sa plenaryo ang bill na lilikha ng Philippine Center for Disease Prevention and Control (CDC) at Virology Science and Technology Institute.

Batay sa panukala, binanggit na ang pagtatayo ng dalawang ahensya ay makatutulong sakaling magkaroon muli ng pandemya sa hinaharap.

Kinasuhan sa Office of the Ombudsman ang isang kongresista dahil sa umano’y pananatili nito sa puwesto sa isang local electric cooperative.

Batay sa reklamo ng National Association of Electricity Consumers for Reforms Inc. o NASECORE, inakusahan nito si Rep. Presley de Jesus ng PHILRECA party-list ng paglabag sa anti-Graft and Corrupt Practices Act.

Ayon sa NASECORE, kahit nahalal na si de Jesus ay hindi pa rin pinapakawalan ng mambabatas ang kanyang puwesto bilang presidente ng Board of Directors ng Isabela-I Electric Cooperative, Inc. o ISELCO-I.