Gilbert Perdez

Maging mapagmatyag!

Ito ang panawagan ni Armed Forces of the Philippines chief-of-staff Gen. Cirilito Sobejana sa mga lokal na opisyal at mamamayan kasunod ng pag-atake ng Bangsamoro Islamic Freedom Fighters (BIFF) sa bayan ng Datu Paglas sa Maguindanao.

Sinabi ni Sobejana na bagama’t maayos na ang sitwasyon ay hindi pa rin nawawala ang banta sa seguridad dahil hindi pa naman tuluyang nadudurog ang mga terorista.

Matatandaang nakasagupa ng mga sundalo ang isang pangkat ng BIFF sa pangunguna ng isang Mohiden Animbang hanggang sa umatras ang mga ito.

Ayon kay Joint Task Force Central spokesperson Lt. Col. John Baldomar, matagumpay ding na-deactivate ng kanilang puwersa ang apat na pampasabog na itinanim ng mga terorista malapit sa palengke at sa gilid ng national highway.

Wala namang naitalang nasaktan o nasawi sa naturang insidente.

Makikipag-ugnayan ang pulisya sa mga lokal na pamahalaan ukol sa paghahanda ng mga holding areas para sa mga lumalabag sa minimum health standards tulad ng mali o hindi pagsusuot ng face mask.

Paliwanag naman ni Philippine National Police chief Gen. Guillermo Eleazar, ang mga mahuhuling pasaway ay maaaring pansamantalang ilagay muna sa police custody.

Gayunman, nilinaw ni Eleazar na ang magiging penalty o parusa laban sa mga violators ay ibabase pa rin sa umiiral na ordinansa ng bawat pamahalaang lokal.

Samantala, nanawagan naman sa mga pulis si Eleazar na huwag parusahan o saktan ang mga nahuhuli nilang pasaway dahil mananagot sa kanya ang mga ito.

Tumataginting na P316 milyong halaga ng mga smuggled items ang nasabat ng mga elemento ng Bureau of Customs (BOC) sa Navotas at Pasay City.

Ayon kay Customs Commissioner Rey Leonardo Guerrero, unang sinalakay ng kanyang mga tauhan ang isang storage facility sa Navotas kung saan nakumpiska mula rito ang ilang frozen food items, kabilang ang duck meat, na tinatayang nagkakahalaga ng P16 milyon.

Nang inspeksiyunin naman ang isa pang storage facility sa Pasay, nakasamsam ang mga awtoridad ng mga pekeng luxury brand clothing items na umano’y nagkakahalaga ng P300 milyon.

Kasalukuyan pang iniimbentaryo ang mga nasabat na kontrabando habang ang mga may-ari naman ng mga pasilidad ay kapwa sasampahan ng mga kaukulang kaso.

Namamayagpag umano ang mga iligal na online sabong o e-sabong.

Dahil dito, muling nilinaw ng Philippine Amusement and Gaming Corporation (PAGCOR) na dalawang kompanya pa lang ang pinapayagan nila na magpalabas ng sabong sa internet.

Ayon kay PAGCOR chairman Andrea Domingo, tanging ang Lucky 8 Starquest ni Atong Ang at Belvedere Corp. naman ni Bong Pineda pa lang ang may lisensya para magpalabas ng sabong online.

Aniya, limang kompanya ang nag-apply ng lisensya pero ang mga nasabing gaming firm pa lamang ang nakapagbayad ng performance bond na nagkakahalaga ng P75 milyon bawat isa.

Isiniwalat ni Domingo na ang mga kompanyang, “Encuentro”, “Magnus”, at “Oriental Capital Venture” ay wala pang nababayarang kaukulang fees at taxes kaya’t bawal itong magpalabas ng sabong sa kanilang websites tulad ng kingsportslive.com at sabonginternational.com.

Samantala, nagpasya ang Lucky 8 Starquest ng Pitmaster Live na bawiin ang authorization para sa kompanyang Diversified Financial Network Inc. (DFNN) na pag-aari ng isang Raymond Garcia na sinasabing kumukuha o tumatanggap ng mga taya sa sabong online.

Hinimok ni House Minority Leader Martin Romualdez ang Health Department at iba pang eksperto sa bansa na makilahok sa talakayan hinggil sa panawagan para i-waive ang patent protection para sa COVID-19 vaccine.

Ayon kay Romualdez, nararapat lamang na lumahok ang Pilipinas sa negosasyon ng vaccine manufacturers kung papaano makakukuha nito oras na matuloy ang suspensyon sa intellectual property protections nito.

Giit ni Romualdez na suportado niya ang hakbang ng Estados Unidos na itulak ang pagtatanggal ng patent para sa mga bakuna sa gitna ng nagpapatuloy na banta ng COVID-19 pandemic.

Mababatid na una nang nanawagan ang India at South Africa na pansamantalang alisin ang intellectual property protections nito para makatulong sa pagpapalakas ng produksyon sa mga developing countries na kakaunti pa lamang sa ngayon ang mga natatanggap na bakuna kontra COVID-19.

Pinagkalooban na ng Food and Drug Administration (FDA) ng certificate of product registration o CPR ang ivermectin na gawa sa Pilipinas bilang isang anti-parasitic drug para sa tao.

Ayon kay FDA Director General Eric Domingo, ang sertipikasyon ay inisyu nila pabor sa Lloyd Laboratories na gumagawa ng nasabing gamot sa bansa.

Gayunman, hindi nilinaw ng FDA kung pinapayagan na nila itong gamitin bilang gamot laban sa COVID-19.

Matatandaang kinastigo ni Senate President Vicente Tito Sotto III ang mabagal na pag-apruba ng ahensya sa ivermectin bilang potensyal na gamot sa coronavirus.