Gilbert Perdez

Labindalawa  (12) pang Pilipino sa labas ng bansa ang nasawi dahil sa COVID-19.

Dahil dito, ayon sa Department of Foreign Affairs o DFA, sumampa na sa 1,159 ang death toll sa hanay ng mga Pinoy abroad.

Umakyat naman sa 18,524 ang total cases bunsod ng 45 na bagong kaso.

Bukod dito, 27 pa ang gumaling kaya’t pumalo na sa 11,333 ang total recoveries habang sumirit naman sa 6,032 ang mga aktibong kaso sa ibayong dagat.

Nagpahayag ng suporta ang Department of Tourism (DOT) sa pagtatayo ng isang mega vaccination facility sa Nayong Pilipino Foundation sa Parañaque City.

Ito’y makaraang isulong ng National Task Force Against Covid-19 ang pagkakaroon ng pasilidad na mag-aalok ng drive-thru at walk-in services at kayang maserbisyuhan ang tinatayang 12,000 indibidwal kada araw.

Samantala, isiniwalat ng DOT na ito ay dinedisenyo na ni architect Felino “Jun” Palafox Jr., katuwang ang  isang architectural design group, kung saan hindi ito nalalayo sa itinayong mobile field hospital at drive-thru vaccination site sa Rizal Park.

Maaari nang lumabas ng bahay ang mga Pilipino na edad 15 hanggang 17 at 65 na gustong magpa-rehistro para sa Philippine Identification System (PhilSys).

Ito ang inanunsiyo ni Presidential Spokesperson Harry Roque makaraang maglabas ng resolusyon ang Inter-Agency Task Force (IATF)  na nagsasaad na ang pagpaparehistro sa PhilSys ay maituturing na isang “essential government service” at suporta na rin sa vaccine deployment.

Sa ilalim ng Republic Act 11055 o PhilSys Act na nilagdaan ni Pangulong Rodrigo Duterte noong 2018, obligadong kumuha ng PhilID o national ID ang lahat ng mga Filipino citizens at mga dayuhang nasa bansa.

Layon nitong mapalitan ang iba’t ibang government IDs para na rin sa kaginhawaan ng publiko na nakikipag-ugnayan sa pribado man o pampublikong establisimyento.

Inaasahang magagamit ang national ID para makapag-bukas ng bank account at maging sa digital transactions tulad ng cashless payment system at iba pa.

Handang ipatupad ng Department of the Interior and Local Government (DILG) at Philippine National Police ang direktiba ni Pangulong Rodrigo Duterte na hulihin ang mga hindi nagsusuot ng face mask o face shield.

Ayon kay Interior Secretary Eduardo Año, ito’y upang magtuloy-tuloy ang pagbaba ng bilang ng mga tinatamaan ng coronavirus disease 2019  (COVID-19) sa bansa.

Bukod dito, sinabi ni Año na mahalagang ipagpatuloy ang mahigpit na pagpapatupad ng lahat ng minimum health standards at protocols, gayundin ang implementasyon ng curfew hours.

Inatasan din umano ni Año ang PNP na tiyakin na ang panghuhuli ng mga violators ay nakabase sa batas at mga ordinansa.

Lahat ng mga biyaherong papasok sa Pilipinas ay obligadong sumalang sa 14 na mandatory quarantine kahit pa nabakunahan ang mga ito kontra coronavirus disease 2019  (COVID-19).

Ito ang inihayag ni Presidential Spokesperson Harry Roque makaraang aprubahan ng Inter-Agency Task Force  (IATF) ang bagong quarantine at health protocols para sa mga inbound travelers.

Batay sa IATF resolution, lahat ng mga biyahero ay kinakailangang sumalang sa sampung araw na quarantine sa isang pasilidad at pagkatapos nito ay sasailalim naman ito sa home quarantine sa loob ng apat na araw.

Giit ni Roque, kinakailangan ding magkaroon ng ugnayan sa lokal na pamahalaan para masigurado na nasusunod ang home quarantine sa natitirang apat na araw.

Maliban dito, obligado rin ang mga biyahero na sumalang sa RT-PCR test sa ikapitong araw nito sa bansa.

Mahigit 3 milyong bagong voter registrants na ang inaprubahan ng Commission on Elections (Comelec).

Ayon kay Comelec Commissioner Rowena Guanzon, tinatayang 3,222,137 na mga aplikasyon na ang natanggap nila sa nakalipas na anim na buwan.

Dahil naman sa idineklarang modified enhanced community quarantine o MECQ, suspendido pa rin ang voter registration hanggang Mayo 14 sa National Capital Region o NCR Plus na kinabibilangan ng Metro Manila, Bulacan, Cavite, Laguna, at Rizal.

Pagkatapos naman ng mahigpit na quarantine measures sa NCR Plus at iba pang lugar sa bansa, inaasahang magpapatuloy ang voter registration.

Magtatapos naman ang pagpapatala ng mga bagong botante hanggang Setyembre 30, 2021.