Gilbert Perdez

Titiyakin ng administrasyon ni Pangulong Rodrigo Duterte na makakatanggap ng mga benepisyong nararapat sa kanila ang lahat ng frontline health care workers sa bansa.

Ito ang inihayag ni Presidential Spokesperson Harry Roque, kasabay ng paghingi ng paumanhin sa pagkaka-delay ng hazard pay para sa mga medical front-liners.

Matatandaang nagsagawa ng protesta ang ilang medical workers bilang bahagi ng paggunita sa National Health Workers’ Day kung saan idinaing nila ang mababang sahod at naantalang mga benepisyo para sa kanila na inaabot na umano ng mahigit isang taon mula nang mag-umpisa ang pandemya.

Ayon kay Roque, tiniyak din sa kanya ni Health Secretary Francisco Duque III na ang bahagi ng natitirang pondo sa ilalim ng Republic Act 11469 o Bayanihan to Heal As One Act (Bayanihan 1) ay ilalaan para sa hazard pay ng mga health workers.

Ipinag-utos ng Civil Service Commission (CSC) ang pagpapalawig ng deadline para sa mga government officials at employees sa paghahain ng kanilang SALN o 2020 Statement of Assets, Liabilities and Net Worth.

Ayon sa CSC, bibigyan ng hanggang May 30, 2021 ang mga opisyal at kawani para makapagsumite ng kanilang SALN.

Paliwanag ng ahensya, ito’y bunsod pa rin ng inilabas nilang guidelines ukol sa paghahain ng SALN sa mga lugar na apektado ng state of calamity o emergency kung saan binibigyan ng isa pang buwan ang mga ito para maisumite ang nasabing dokumento.

Ang Pilipinas ay nasa ilalim ng state of calamity dulot ng coronavirus pandemic hanggang Setyembre 12, 2021.

Mas lalo pang paiigtingin ng pamahalaan ang kampanya nito laban sa child trafficking.

Ito’y kasunod ng pagtatapos ng huling high-level dialogue sa pagitan ng mga opisyal ng Pilipinas at Estados Unidos na may kaugnayan sa US-Philippines Child Protection Compact (CPC) Partnership.

  Sa nasabing diyalogo, pangunahing tinalakay ang pag-iimbestiga at pag-usig sa mga kasong may kinalaman sa online sexual exploitation of children (OSEC).

Kabilang din sa mga tututukan ay ang pagtukoy at pagtugon sa mga kasong may kinalaman sa child labor trafficking at pagkakaloob ng tulong sa mga biktima.

Isinusulong ng isang mambabatas ang pagkakaroon ng dagdag na relief measures para sa mga manggagawang Pilipino dulot ng pandemya.

Sa ginanap na Task Group on Economic Recovery and National Employment Recovery Strategy Job Summit, isiniwalat ni Senadora Imee Marcos na aabot sa 80 porsiyento ng mga nasa informal sector ang lubhang apektado ng krisis o ang mga nasa lowest-paid brackets.

Sinabi ni Marcos na kabilang sa mga nagpapahaba ng lockdowns ay ang mahinang social protection at medical coverage para sa sektor ng paggawa.

Mas maigi rin aniya kung mas palalawakin pa ang wage subsidies sa labor sector at maging ang unemployment insurance benefits ng Social Security System (SSS).