Gilbert Perdez

Halos 6,000 contact tracers ang nakatakdang i-deploy sa iba’t ibang lugar sa National Capital Region (NCR).

Ayon sa Department of the Interior and Local Government (DILG), batay sa nilagdaang agreement ay magtatrabaho ang mga ito sa loob ng tatlong buwan at sasahod ng P537 kada araw.

Ang tinatayang 5,754 contact tracers ay na-hire sa pamamagitan ng Tulong Panghanapbuhay sa ating Disadvantaged/Displaced (TUPAD) Worker Program ng labor department.

Mahigit P280 milyon ang inilalaang pondo ng DOLE para sa naturang programa.

Sumampa na sa 966,080 ang bilang ng mga gumaling sa COVID-19 sa Pilipinas.

Ito’y makaraang makapagtala ang Department of Health (DOH) ng 9,072 na bagong recoveries.

Batay sa pinakahuling datos mula sa DOH, nagkaroon din ng 8,343 na bagong kaso kaya’t umakyat na sa 1,054,983 ang bilang ng mga tinamaan ng coronavirus sa bansa.

Sa nasabing bilang, nasa 72,472 naman ang active cases.

Dahil naman sa pagkamatay ng 77 pang pasyente, pumalo na sa 17,431 ang death toll sa buong kapuluan.

JUST IN: Kaso ng COVID-19 sa bansa, nadagdagan pa ng 8,346 ngayong Linggo, May 2.

Pumalo na sa kabuuang 1,054,983 ang bilang ng kumpirmadong kaso ng COVID-19 sa bansa. Mayroon namang 71,472 naitalang active cases. | https://t.co/HHOy7zaafm pic.twitter.com/hk7Xfe3mVj

— DWIZ Newscenter (@dwiz882) May 2, 2021

Nanawagan ang Malacañang sa mga kritiko ni Pangulong Rodrigo Duterte na hayaan itong isulong ang maingat, calibrated at kalkuladong foreign policy bilang tugon sa isyu sa West Philippine Sea.

Ginawa ni Presidential spokesperson Harry Roque ang pahayag matapos igiiit nina retired Supreme Court Associate Justice Antonio Carpio at dating Foreign Secretary Albert del Rosario na mahalaga ang matapang na aksiyon sa gitna ng dumaraming mga barko ng China sa rehiyon.

Ngunit binigyang diin ni Roque na hindi nakatutulong sa bansa ang mga pahayag nina Carpio at del Rosario.

Ayon kay Roque, hindi kailanman tinatalikuran ng Presidente ang claims at karapatan ng bansa sa nasabing teritoryo.

Labis na pinag-iingat ang publiko ng ilang alkalde sa Metro Manila sa basta-bastang paggamit ng Ivermectin laban sa COVID-19.

Ito’y dahil hindi pa umano sapat ang mga patunay para masabing epektibo ito sa pagpuksa ng nakamamatay na virus.

Ang panawagan ay ginawa ni Pasig Mayor Vico Sotto makaraang mamudmod ng hindi rehistradong ivermectin ang dalawang mambabatas sa Quezon City kahit kulang-kulang ang mga reseta ng ilang pasyente.

Maging si Health Undersecretary Maria Rosario Vergeire ay muling ipinahayag na wala pang sapat na ebidensya para irekomenda ng Department of Health o DOH ang ivermectin bilang lunas o pananggalang sa nasabing impeksiyon.

Kasabay nito, binigyang diin naman ni Taguig Mayor Lino Cayetano na hindi rin ine-endorso ng kanilang lungsod ang paggamit ng ivermectin laban sa coronavirus.

Ayon kay Cayetano, tatalima lang umano sila kung ano irerekomenda ito ng mga eksperto.