Gilbert Perdez

Mariing ipinanawagan ng isang medical expert sa pamahalaan na pag-aralan ang paggamit ng gamot na “Leronlimab” sa mga pasyente ng COVID-19.

Ito’y makaraang matuklasan na nakatulong umano ito kaya’t nakarekober agad si dating Pangulong Joseph Estrada.

Ayon kay Dr. Randy Nicolas, associate clinical professor for surgery sa UP-PGH, nakatulong ang anti-inflammatory drug na “leronlimab” sa ‘respiration’ o pagpapaluwag ng paghinga ng dating presidente.

Nang magkritikal ang kalagayan nang mahawa ng virus ay na-admit sa ICU si Erap at muling binigyan ng ikalawang dose ng nasabing gamot.

Naging dahilan umano iyon upang agad na gumaling ang dating presidente.

Kabilang ang “Leronlimab” sa mga investigational drugs ng COVID-19 at gawa ito ng kompanyang CytoDyn sa Estados Unidos na sinasabing orihinal na ginawa laban sa HIV.

Tinamaan ng COVID-19 ang 32 pang Pilipino sa ibang bansa.

Dahil dito, ayon sa Department of Foreign Affairs (DFA), sumampa na sa kabuuang 11,271 ang impeksiyon doon habang nananatili naman sa 1,145 ang death toll dulot ng virus.

Pahayag ng DFA, mayroong 5,941 na mga pasyenteng Pinoy ang nananatili sa pagamutan o ginagamot sa ibayong dagat.

Batay pa rin sa datos ng DFA, mas marami ang mga gumaling sa Asia at Pacific Region.

Inaasahang aarangkada ngayong araw ang job summit na isa sa magiging Labor Day activity ng gobyerno sa pamamagitan ng zoom video conferencing.

Kasabay ng pagdiriwang ng araw ng mga manggagawa, ilalatag ang National Employment Recovery Strategy para sa taong 2021-2022 makaraang sumampa sa 4.2 milyon ang mga tambay o walang trabaho sa bansa.

Bukod dito, nakatakda ring lagdaan ni Pangulong Rodrigo Duterte ang isang Executive Order o EO na may kinalaman sa National Employment Recovery Strategy (NERS).

Sinasabing ang NERS ay isang employment recovery plan para ngayong taon hanggang 2022 na layuning bumuo ng polisiya o mga panuntunan na maaaring magpalawak sa access sa trabaho, kabuhayan, at training opportunities.

Upang magpatuloy at magkaroon ng mas marami pang trabaho, prayoridad din sa ilalim ng NERS ang pagbibigay ng suporta sa mga kasalukuyang negosyo sa bansa.

Muling humingi ng paumanhin sa publiko si Pangulong Rodrigo Duterte.

Ito’y matapos aprubahan ng punong ehekutibo ang kahilingan ng mga doktor kabilang ang  Department of Health (DOH) na palawigin pa ng dalawang linggo ang modified enhanced community quarantine sa NCR Plus.

Dahil dito, nanawagan ang pangulo sa mga Pinoy na patuloy na sumunod sa mga ipinatutupad na quarantine protocols upang hindi na dumami pa ang mga tinatamaan ng COVID-19.

Matatandaang inihayag ni Duterte na hindi nakapagtatakang lampas na ng isang milyon ang mga nagka-impeksiyon dahil sa dami aniya ng mga hindi sumusunod sa batas.

Kasalukuyan nang nagsasagawa ng policy consultation sa mga stakeholders ang Department of Education (DepEd) upang madetermina ang nararapat o angkop na mga hakbang sa pagbubukas ng klase para sa school year 2021-2022.

Gayunman, nilinaw ng ahensya na nasa kamay pa rin naman ni Pangulong Rodrigo Duterte ang huling desisyon sa class opening alinsunod sa itinatakda ng batas.

Sinasabing maglalabas ng mga panuntunan ang DepEd pagkatapos ng nasabing konsultasyon.

Handa na sa pisikal na pagsalubong sa Labor Day ang sektor ng paggawa at iba’t ibang militanteng grupo ngayong araw.

Ito ang kauna-unahang aktibidad ng mga manggagawa sa Pilipinas simula nang magpataw ng kaliwa’t kanang lockdown ang pamahalaan noong Marso 2020.

Matatandaang huling nagkaroon ng labor day protests ang kilusang manggagawa noong Mayo 1, 2019 bago pa mamerwisyo sa ating bansa ang coronavirus disease (COVID-19).

Noong nakaraang taon, ginawang online ng mga militanteng grupo ang kanilang protesta sa anila’y pang-aapi ng gobyerno sa uring manggagawa.

Ayon kay Elmer Labog, pambansang tagapangulo ng Kilusang Mayo Uno o KMU, kabilang sa mga ipapanawagan nila ay ang P10,000 cash aid para sa mahihirap at nawalan ng trabaho sa gitna ng lockdown, isang daang pisong wage subsidy sa mga manggagawa at P15,000 production subsidy para sa mga magsasaka.

Titiyakin umano ng mga militanteng grupo na nasusunod ang sapat na physical distancing at health protocols para na rin makaiiwas sa hawaan ng COVID-19 sa gitna ng isasagawa nilang protesta.

Wala pang pahayag ang Philippine National Police (PNP) kung paano nila pakikitunguhan ang mga magpoprotesa ngayong araw.