Sumampa na sa 1,461,749 ang kabuuang bilang ng mga gumaling sa COVID-19 sa buong bansa.
Ito’y makaraang makapagtala ang Department of Health (DOH) ng 6,778 na bagong recoveries.
Batay sa datos ng DOH, nakapagtala naman ito ng 6,216 na bagong impeksiyon kaya’t umakyat na sa 1,543,281 ang total cases sa bansa.
Sa nasabing bilang, nasa 54,401 ang mga aktibong kaso.
Samantala, sumirit naman sa 27,131 ang death toll kasunod ng pagpanaw ng mahigit dalawang daang pasyente (241).
Patay ang dalawang lalaki sa ikalawang gabi ng lumalawak na protesta na nag-ugat sa kakapusan ng suplay ng tubig sa Khuzestan Province sa Iran.
Ayon sa ulat, nakakaranas ng matinding tagtuyot ang ilang lungsod at bayan sa Iran kung saan maliban sa mga tao ay labis ding naaapektuhan ang agriculture at livestock farming.
Isiniwalat naman ni Acting Governor Omid Sabripour na isang raliyista ang nagpaputok ng baril sa ere pero biglang bumalik ang mga bala patungo sa mga nagpoprotesta na ikinasawi ng ilan sa mga ito.
Samantala, ibinunyag din ng residenteng si Mostafa Naimawi na napatay ang kanyang anak ng mga rioters at hindi ng mga kasapi ng government security forces.
Dinukot at tinortyur umano ng hindi kilalang mga salarin ang anak na babae ng Ambasador ng Afghanistan sa Pakistan.
Ayon sa mga awtoridad, si Silsila Alikhil na anak ni Ambassador Najib Alikhil ay kinidnap sa Islamabad at sinaktan ngunit masuwerteng nakauwi ito nang ligtas o buhay.
Nagpahayag naman ng pagkabahala ang foreign ministry ng Afghanistan sa seguridad at kaligtasan ng iba pang diplomats, staff members, at pamilya ng mga ito sa pakistan.
Samantala, plano rin umano ng Afghan government na mag sampa ng pormal na reklamo ukol sa nasabing insidente.
20 ang naitalang patay sa ilang insidente ng pagguho ng lupa at pader dulot ng masamang panahon sa Mumbai, India.
Ayon sa Indian Meteorological Department, halos walang tigil ang pag-ulan sa Mumbai at iba pang kalapit-lugar mula pa noong Sabado.
Samantala, nangako naman si Prime Minister Narendra Modi ng financial compensation para sa mga namatayang pamilya.
Pinataob ng Meralco Bolts ang San Miguel Beermen sa score na 93-87 sa kanilang laro sa 2021 PBA Philippine Cup na ginanap sa Ynares Sports Arena sa Pasig City.
Si Chris Newsome ang bumida sa panig ng Bolts matapos kumamada ng 17 points habang nagdagdag naman si Aaron Black ng 14 points.
Dahil dito, naitala ng Meralco ang ikalawang panalo sa kasalukuyang torneo kasunod ng ginawa nitong pagdurog sa Northport Batang Pier sa kanilang season-opener noong Biyernes.
Sa kalaboso ang bagsak ng isang 30 gulang na lalaki matapos umanong mahulihan ng 640,000 pesos na halaga ng hinihinalang shabu habang papasok sa lungsod ng Davao.
Ayon sa pulisya, si alyas “ding” ay natimbog ng Task Force Davao sa inilatag nitong checkpoint sa Barangay Lasang Bunawan.
Maliban sa drug paraphernalia, nakuha rin ang tinatayang 40 gramo ng umano’y shabu mula sa lalaki na nakatakdang sampahan ng kasong paglabag sa Comprehensive Dangerous Drugs Act.
Napatay ng mga sundalo ang isa umanong miyembro ng grupong Dawlah Islamiya habang dalawang iba pa ang nahuli sa bayan ng Shariff Saydona Mustapha sa Maguindanao.
Pahayag ni Lt. Col. Benjamin Cadiente, Commanding Officer ng 33rd infantry battalion ng Philippine Army, isang sundalo rin ang nasugatan sa bakbakan.
Aniya, nagtungo ang tropa ng pamahalaan sa Barangay Nabundas makaraang makatanggap ng ulat na may mga terorista sa lugar kung saan naganap ang engkuwentro.
Nasabat naman mula sa mga suspek ang isang M114 rifle at dalawang pampasabog o improvised explosive device.
Samantala, nilinaw naman ng Joint Task Force Central na handa at bukas sila para sa mga rebeldeng nais magbagong-buhay o magbalik-loob sa pamahaaan.
Dead on arrival sa ospital ang isang rider habang sugatan naman ang tatlong menor de edad na angkas nito makaraang maaksidente sa Banate, Iloilo.
Kinilala ang nasawi na si Stephen Bernales, 24 na taong gulang, habang hindi naman tinukoy ang pagkakakilanlan ng mga bata.
Sa imbestigasyon, galing Passi City ang mga biktima nang mabangga ang sinasakyan nilang motorsiklo sa poste sa Barangay Manugapaya sa Banate.
Napuruhan at nasawi si Bernales habang nakalabas na ng pagamutan ang tatlong bata.
Ayon sa mga awtoridad, walang suot na helmet ang mga biktima nang mangyari ang naturang aksidente.
Laglag sa kamay ng mga awtoridad ang sinasabing misis ng isang sub-leader ng Abu Sayyaf Group sa Jolo, Sulu.
Pahayag ng Joint Task Force Sulu, ang umano’y asawa ni ASG Sub-Commander Mundi Sawadjaan ay nahuli sa isang bahay sa Barangay Bus-bus.
Nakumpiska mula sa suspek ang dalawang granada, dalawang bote ng ammonium nitrate fuel oil, dalawang piraso ng detonating oil, at isang safety fuse na pinaniniwalaang sangkap sa paggawa ng pampasabog.
Hawak na ng Jolo Municipal Police Station ang hindi pinangalanang suspek na nakatakdang sampahan ng kasong paglabag sa Anti-Terrorism Act.
Hindi ‘immune from suit’ ang Bise Presidente ng Pilipinas.
Ito ang binigyang din ni dating Senator at Incumbent Sorsogon Governor Francis “Chiz” Escudero makaraang ihayag ni Pangulong Rodrigo Duterte na tatakbo siya bilang Pangalawang Pangulo upang magkaroon ng legal immunity.
Giit ni Escudero, malinaw ang nakasaad sa 1987 constitution na hindi ligtas sa anumang kaso ang Vice President ng bansa na sinuportahan naman nina Albay 1st Dist. Rep. Edcel Lagman at dating Supreme Court Public Information Office Chief Theodore Te.
Sinabi ni Te na ayon sa batas at tradisyon, walang proteksiyon sa mga kaso ang Pangalawang Pangulo ng bansa.