Inaasahang sasabayan ng ulan ang huling State of the Nation Address (SONA) ni Pangulong Rodrigo Duterte bukas.
Ito’y dahil ayon kay PAGASA Weather Division Officer-In-Charge Vicente Palcon Jr., mananatiling dominanteng weather system ang hanging Habagat hanggang sa susunod na limang araw.
Bagama’t walang nagbabadyang bagyo, sinabi ni Palcon na inaasahang iiral pa rin ang maulap na kalangitan na may pabugso-bugsong mga pag-uulan sa western section ng Luzon, kabilang ang Metro Manila.
Sumirit na sa 1,548,755 ang kabuuang bilang ng COVID-19 infections sa bansa.
Ito’y makaraang makapagtala ang Department of Health (DOH) ng 5,479 na karagdagang kaso.
Dahil naman sa 5,573 na bagong recoveries, sumampa na sa 1,467,269 ang kabuuang bilang ng mga gumaling sa sakit.
Sa nasabing bilang, nasa 54,262 ang active cases.
Samantala, nadagdagan naman ng 93 ang bilang ng mga pumanaw dahilan upang umakyat sa 27,224 ang death toll sa buong kapuluan.
Nakapagtala ang Department of Health (DOH) ng 55 karagdagang kaso ng COVID-19 Delta variant.
Dahil dito, ayon sa DOH, umakyat na sa 119 ang kabuuang bilang ng mas nakakahawang variant sa bansa.
Inihayag ng ahensya na ang 37 sa mga bagong impeksiyon ay local cases habang Returning Overseas Filipinos (ROF) naman ang 17 iba pa.
Sa kasalukuyan, bineberipika pa ng DOH kung ang isa pang kaso ay ROF o local case.
Bigo si Filipino shooter Jayson Valdez sa men’s 10-meter rifle competition sa Tokyo Olympics.
Ito’y makaraang malaglag si Valdez sa ika-44 na puwesto mula sa 47 na kalahok sa event.
Walo lamang mula sa nasabing bilang ang nakaabante sa finals.
Naglabas ng kanyang bagong album ang singer na si Iñigo Pascual.
May pamagat na “Options”, ang kanyang ikalawang album ay ibinida ni Pascual sa isang show sa Kapamilya network.
Sa nasabing show, inawit ni Pascual ang kantang “Love U Right” kasama si AC Bonifacio.
Naglalaan umano ng P6 milyon ang isang partylist group kada buwan para sa libreng gamot ng mga mahihirap sa bansa.
Ayon kay ACT-CIS Cong. Eric Yap, maliban sa mga gamot, namamahagi rin sila ng gatas at diapers para sa mga magulang na walang kakayahang bumili nito.
Ginagawa aniya nila ito mula pa noong maupo ang kanilang partylist sa Kongreso.
Ang punong tanggapan ng ACT-CIS ay matatagpuan sa Timog Avenue sa lungsod ng Quezon.
Unti-unti nang nagbubukas ang mga kompanya at negosyo sa Abu Dhabi, United Arab Emirates o UAE na nagbibigay sa mga Pinoy o Overseas Filipino Workers ng mga oportunidad sa trabaho.
Katunayan, ayon kay Labor Attaché Manuel Dimaano, mula Enero hanggang Hunyo ngayong taon ay nakatanggap sila ng 4,000 job order requests o manpower requests mula sa mga kompanya sa nasabing bansa.
Nabatid na binuksan na ng Abu Dhabi ang pintuan nito para sa mga Household Services Workers o HSWs at medical workers tulad ng mga nurses.
Ibinabala ng Department of Health o DOH na karamihan sa mga na-o-ospital at dinadapuan ng sakit sa labas ng bansa dahil sa Delta variant ay hindi nabakunahan kontra COVID-19.
Bunga nito, muling nanawagan sa publiko si Health Undersecretary Maria Rosario Vergeire na magpabakuna sa lalong madaling panahon.
Ayon kay Vergeire, batay sa datos, 98%ng mga na-ospital sa Estados Unidos at nagkaroon ng malalang impeksiyon ay walang natanggap na bakuna laban sa coronavirus.
Sa Pilipinas, sinasabing sa labingwalong kaso ng Delta variant ay 16 ang walang bakuna habang dalawa naman ang fully-vaccinated.
Dinakip ng mga ahente ng National Bureau of Investigation o NBI ang dating government witness na si Mary Rose “Rosebud” Ong at tatlong iba pa dahil sa umano’y pagbebenta ng AstraZeneca vaccination slots sa mga Chinese nationals sa Pasay City.
Ayon sa NBI, kabilang sa mga kinasuhan sina Rosebud, Peter Ong (kapatid ni Rosebud), Warlito Mabanan, at Ferdinand Mabalo na Barangay Secretary sa nasabing lungsod.
Nag-ugat ang kaso sa reklamo ng isang James Christian Sucgang at Chinese national na si Sam Lo dahil sa umano’y pagbebenta ng vaccination slots ng isang grupo sa Pasay.
Ang mga suspek ay nahaharap sa mga kasong estafa at paglabag sa Ease of Doing Business Act at Anti-Graft and Corrupt Practices Act.
Matatandaang isa si Rosebud sa mga tumestigo sa Kuratong Baleleng rubout case noong 1990s laban kay dating Philippine National Police chief at ngayo’y Sen. Panfilo Lacson.
Labis na ikinababahala ng mga eksperto ang patuloy na pagtaas ng COVID-19 cases sa Davao City.
Ayon kay OCTA Research Fellow Ranjit Rye, batay kasi sa datos ng Department of Health o DOH, pitong linggo nang nangunguna ang lungsod sa may pinakamataas na kaso sa bansa simula noong nakaraang buwan.
Sa monitoring list ng grupo na may petsang Hulyo 13 hanggang Hulyo 19, nasa 219 ang naitatalang kaso sa Davao na mas mababa sa 226 na kaso noong naunang linggo ngunit nangunguna pa rin sa talaan kumpara sa ilan pang high-risk cities.
Giit ni Rye, ang pitong linggong dire-diretsong mataas ang kaso ng COVID-19 ng Davao ay masasabing indikasyon na hindi gumagana ang istratehiyang ipinatutupad ng lokal na pamahalaan kaya’t mahalagang magkaroon ng bagong polisiya.
Dahil dito, inirerekomenda ng OCTA ang pagdedeklara ng General Community Quarantine (GCQ) para sa siyudad na mas “upscale” ang restrictions kung saan ipinauubaya naman nila ang desisyong ito kay City Mayor Sara Duterte upang mabilis na mapababa ang kaso.
Wala pang komento sa ngayon ang Davao city government hinggil sa pinakabagong report ng OCTA Research at DOH.