PATAY ang dalawang Turkish soldiers habang sugatan naman ang dalawang iba pa matapos tambangan ang sinasakyang armored vehicle ng mga ito sa Northern Syria.
Ayon sa defense ministry ng Turkey, agad silang naglunsad ng retaliatory attacks sa mga hinihinalang kuta ng Syrian Kurdish People’s Protection Units o YPG na sinasabing konektado sa Kurdistan Workers Party.
Ang YPG ay itinuturing ng United States at European Union bilang isang teroristang grupo.
PINADAPA ng Magnolia Hotshots ang Barangay Ginebra sa score na 89-79 sa unang Manila Clasico ngayong PBA Season.
Sa isa pang laro, hindi nakaporma sa San Miguel Beermen ang NorthPort Batang Pier sa score na 88-86 sa kanilang laro na ginanap sa Ynares Sports Arena sa Pasig City.
Samantala, inilampaso naman ng NLEX Road Warriors ang TerraFirma Dyip, 108-94, sa nasabi pa ring venue.
IDINEKLARANG dead on arrival sa ospital ang isang binatilyo matapos mahulog sa kanal ang minamaneho nitong motorsiklo sa Roxas City, Capiz.
Kinilala ang biktima na si alyas “Bonbon”, labimpitong taong gulang, at nakatira sa Barangay Dayao. Ayon sa mga awtoridad, nakipagkarera umano sa iba pang motorsiklo ang biktima hanggang sa nawalan ito ng kontrol at nalaglag sa kanal sa gilid ng kalsada.
Patuloy ang imbestigasyon sa nasabing insidente.
NANLABAN kaya napatay ng mga awtoridad ang isang drug suspect sa ikinasang buy-bust operation sa Labo, Camarines Norte.
Ayon sa pulisya, nakabili ng dalawampu’t limang gramo ng umano’y shabu na nagkakahalagang 150,000 pesos ang isang pulis na nagpanggap na buyer sa nasawing suspek na si alyas “Jack” at kasamahan nito.
Pagkatapos ng transaksiyon ay nakatunog umano ito na awtoridad ang kanilang katransaksiyon kaya nagpaputok ito. Napilitang gumanti ang mga pulis na nagresulta sa pagkamatay ni alyas “Jack”.
Tinutugis naman ang pulisya ang kasamahan ng nasawing suspek na tumakas lulan ng isang kotse.
Bunga ng malalakas na alon at masamang panahong dala ng hanging Habagat, nasa 23 bahay ang napinsala sa tabing-dagat ng Tanza, Cavite.
Ayon sa Municipal Disaster Risk Reduction and Management Office, tinatayang 700 indibidwal o katumbas ng 200 pamilya ang inilikas dulot ng pagbaha at malalakas na alon.
Kabilang sa mga apektado ay ang mga bahay sa tabi ng dagat sa Capipisa, Calibuyo at Barangay Amaya 5.
Naglunsad na umano ng malawakang COVID-19 testing sa mga evacuation centers matapos mabatid na ilan sa mga bakwit ay may iniindang sakit tulad ng ubo at lagnat.
Apat ang sugatan makaraang araruhin ng isang dump truck ang isang bahay at mga nakaparadang motorsiklo sa Almeria, Biliran.
Ayon sa Almeria Police, kabilang sa mga nasugatan ang tatlong pahinante at truck driver na agad namang sinaklolohan ng mga residente at dinala sa pagamutan.
Nawalan umano ng preno ang truck habang pababa ng barangay proper kaya’t nasalpok nito ang dalawang motor at isang bahay sa Barangay Caucab.
Iniimbestigahan pa rin ng mga awtoridad ang nasabing aksidente.
Bibigyan umano ng ayuda ang tatlong mangingisdang nasagip ng mga awtoridad makaraang lumubog ang sinasakyan nilang bangka sa karagatang sakop ng Ternate, Cavite.
Hindi naman tinukoy ng Ternate Municipal Disaster Risk Reduction and Management Office ang pagkakakilanlan ng mga biktima.
Kasabay nito, nagbabala ang Philippine Coast Guard (PCG) na bawal munang pumalaot ang mga mangingisda dahil sa masamang panahon.
Nabatid napilitan umanong mamalakaya ang mga biktima dahil wala naman silang ibang mapagkakakitaan.
Sugatan ang dalawang forest rangers na nakatalaga sa Masungi Georeserve Foundation sa Rizal matapos pagbabarilin ng ‘di kilalang mga salarin.
Ayon kay Masungi Managing Trustee Billie Dumaliang, ang isang park ranger ay tinamaan sa ulo habang sa leeg naman nasapol ang isa pa ngunit stable na umano ang kalagayan ng mga ito.
Matatandaang inirekomenda ng Department of the Interior and Local Government (DILG) ang pagsasampa ng mga kaukulang kaso laban sa ilang local officials at establisimyento sa baras dahil sa umano’y encroachment sa Upper Marikina River Basin Protected Landscape.
Samantala, inihayag naman ni DENR CALABARZON Director Nilo Tamoria na nagpadala na sila ng mga environment officers sa lugar para imbestigahan ang naturang insidente.
Sumampa na sa halos P8-M ang halaga ng pinsala ng baha sa agrikultura at imprastruktura sa bayan ng Baco sa Oriental Mindoro.
Bunga nito, inihayag ng Baco Local Government Unit (LGU) na pinag-aaralan na ngayon ang pagdedeklara ng State of Calamity sa nasabing bayan dulot ng kalamidad.
Samantala, nasa 800 pamilya naman mula sa 18 barangay ang apektado ng mga pagbaha.
Mas mahigpit na border control at kahandaan ng mga ospital.
Ito ang inirekomenda ng Department of Health (DOH) sa pulong ng Inter-Agency Task Force kasama si Pangulong Rodrigo Duterte sa harap na rin ng banta ng mas nakahahawang Delta variant ng COVID-19.
Maliban dito, inirekomenda rin ni DR. Anna Ong Lim ng DOH Technical Advisory Group sa mga lokal na pamahalaan ang pagpapatupad ng localized lockdown at mahigpit na pagmo-monitor sa endorsed arrivals o mga pumapasok sa kanilang mga nasasakupan.
Ayon pa kay Lim, mahalaga ring palakasin ang health care system sa iba’t ibang lugar sa bansa.