Nadagdagan ng 49 ang bilang ng pulis na gumaling sa COVID-19.
Dahil dito, ayon sa Philippine National Police (PNP) Health Service, sumampa na sa 29,206 ang total recoveries sa kanilang hanay.
Umakyat naman sa 30,434 ang kabuuang bilang ng mga tinamaan ng COVID-19 sa pambansang pulisya dahil sa 106 na bagong kaso.
Sa nasabing bilang, nasa 1,144 ang active cases.
Samantala, dahil naman sa pagpanaw ng dalawa pang alagad ng batas ay sumirit na sa 84 ang death toll sa PNP.
Bawal muna ang pagdaraos ng public masses simula ngayong araw, ika-31 ng Hulyo, hanggang ika-20 ng Agosto.
Ito’y bilang tugon sa desisyon ng gobyerno na isailalim sa Enhanced Community Quarantine (ECQ) ang Metro Manila sa susunod na linggo.
Sa magkahiwalay na abiso, inanunsiyo ng dioceses ng Pasig, Cubao, Novaliches, Parañaque, at Caloocan at Archdiocese of Manila ang suspensiyon ng public masses sa mga simbahan at kapilya sa loob ng halos tatlong linggo.
Dahil dito, pansamantala ay gagawin munang virtual ang mga misa para maiwasan ang pagkakaroon ng mass gatherings at mapigil ang pagtaas ng kaso ng COVID-19.
Umusad na sa championship round ng women’s featherweight sa Tokyo Olympics ang Filipina boxer na si Nesthy Petecio.
Ito’y makaraang masungkit ni Petecio ang 4-1 split decision laban sa Italyanang si Irma Testa sa semifinal round.
Kung papalarin ay makukuha ni Petecio ang ikalawang gintong medalya para sa Pilipinas habang pilak naman ang masisikwat niya sakaling mabigo sa susunod na round.
Makakaharap naman ni Petecio ang mananalo sa pagitan ng mga pambato ng Japan at Britanya.
Patay ang dalawang crew members ng isang oil tanker sa umano’y piracy incident sa karagatang sakop ng Oman.
Ang mga nasawi ay kinabibilangan ng isang briton at romanian na pawang mga tauhan ng “zodiac maritime” na pag-aari ng isang Israeli firm na nakabase naman sa London.
Isinisisi naman sa Iran ng US, Israel at iba pang bansa ang naturang pag-atake.
Pasok na sa final round ng pole vault event sa Tokyo Olympics ang pambato ng Pilipinas na si EJ Obiena.
Ito’y makaraang makuha ni Obiena ang ika-10 puwesto nang maitala ang 5.75-meter mark.
12 atleta lamang sa qualification phase ang umabante sa finals.
Samantala, pasok na rin sa quarterfinals ng men’s flyweight ang Pinoy boxer na si Carlo Paalam.
Naglabas ng bagong single ang “The Voice Kids” alumnus na si Juan Karlos Labajo matapos ang ilang taong pamamahinga.
Pinamagatang “Boston,” sinasabing ang kanta ay tungkol sa pagbabalik-tanaw sa nakaraan.
Nabatid na ni-record ni Labajo ang kanyang bagong single sa sarili nitong home studio nang hindi kasama ang kanyang banda.
Darating na sa bansa sa Lunes, Agosto 2, ang 415,000 doses ng Astrazeneca vaccine na donasyon ng United Kingdom (UK).
Ito ang inanunsiyo ni outgoing British Ambassador to the Philippines Daniel Pruce kasabay ng kanyang farewell call sa tanggapan ni Foreign Affairs Secretary Teodoro Locsin Jr. Sa Department of Foreign Affairs (DFA).
Sinabi naman ni Pruce na ang alokasyong ito ay bahagi ng unang tranche ng isang daang milyong vaccine doses na naipangako ng Britanya sa mundo ngayong taon.
Tinatayang 350,000 foreign workers ang kailangan ngayon ng Japan para sa 14 na industriya.
Sa isang virtual forum, isiniwalat na Labor Attaché Marie Rose Escalada na kabilang sa mga makikinabang sa mga job opportunities na ito ang mga Pinoy sa ilalim ng Special Skilled Worker (SSW) visa.
Sinabi ni Escalante na ang mga aplikante ay dapat 18 taong gulang pataas, pasado sa Japanese language proficiency test at skills test, o kaya’y nakatapos na ng kanilang technical intern training.
Mahigit 20 milyong Pilipino ang nakatapos na sa ikalawang step ng pagpaparehistro para sa Philippine Identification System o PhilSys.
Ayon kay Philippine Statistic Authority Undersecretary Dennis Mapa, kabuuang 20,724,895 individuals na ang nakunan ng kanilang biometric information sa iba’t ibang lugar sa bansa.
Aniya, ang patuloy na pagtaas ng bilang ng mga nagpaparehistro ay makatutulong upang maabot ng gobyerno ang target nitong 50 hanggang 70 milyong registrants sa katapusan ng taon.
LIBO-LIBONG mamamayan mula Ontario, Canada ang inilikas bunsod ng malawakang wildfire sa North America.
Nabatid na mahigit isang daang sunog sa kagubatan na ang naitatala sa northwestern Ontario malapit sa First Nation communities na mararating lamang sa pamamagitan ng eroplano o bangka.
Matatandaang noong isang linggo ay nagpadala ng isang daang bumbero ang Mexico sa Ontario para tumulong sa malawakang sunog.