Gilbert Perdez

Sumirit na sa P24.4 milyon ang pinsala sa mga pananim at palaisdaan sa pagbuga ng asupre ng Bulkang Taal sa lalawigan ng Batangas.

Batay sa datos ng Department of Agriculture (DA), karamihan sa mga apektado ay ang mga palaisdaan at pananim na calamansi, palay at kamoteng kahoy sa mga bayan ng Agoncillo, Laurel, at Talisay.

Umasa naman si DA Assistant Director Dennis Arpia na walang masyadong napinsala sa iba pang lugar na hindi pa nila napupuntahan.

Sa kasalukuyan, nananatili ang alert level 3 sa Bulkang Taal.

Dahil sa aktibong monitoring at surveillance na ginagawa ng Department of Health-Region 10 ay na-detect nito ang dalawang Delta variant sa dalawang lungsod sa Northern Mindanao.

Ito’y makaraang isiwalat ng DOH central office na sa 16 na Delta variant cases, anim dito ay mula sa Misamis Oriental, lima sa Cagayan de Oro City, at isa naman sa Gingoog City.

Ayon kay DOH Undersecretary Maria Rosario Vergeire, karamihan naman sa mga nasabing pasyente ay gumaling na.

Ang mga botante ang magpapasya kung susuportahan nila ang tambalan ng mag-ama na sina Pangulong Rodrigo Duterte at Davao City Mayor Inday Sara Duterte.

Ito ang inihayag ni ACT-CIS Cong. Eric Yap sa isang radio interview ukol sa tandem ng mag-amang Duterte bilang Presidente at Vice President sa 2022 National Elections.

Ayon kay Yap, sa araw mismo ng eleksyon magkakaalaman kung gusto ng mga tao ang mag-ama na lumabas sa isang survey.

Matatandaang sa lumitaw sa pinakabagong survey ng Pulse Asia na nangunguna ang tambalan ng mag-ama bilang Pangulo at Pangalawang Pangulo sa halalan.

Si Yap ay kilalang tagasuporta ng pamilya Duterte simula pa nang maupo ito sa kongreso noong 2019.

Aabot sa halos 100 kabahayan ang nilamon ng apoy sa naganap na sunog sa lungsod ng Davao.

Base sa inisyal na ulat ng Bureau of Fire Protection o BFP, nagsimula ang sunog sa bahagi ng Dos Punta Dumalag Road, Barangay Matina Aplaya Davao City.

Kabilang sa labis na tinupok ng apoy ang Diego Silang Elementary School sa nabanggit na lugar.

Sa ngayon patuloy pang inaalam ng mga otoridad ang pinagmulan ng sunog.