Gilbert Perdez

Isa ang sugatan matapos araruhin ng isang SUV ang anim na sasakyan sa bayan ng Castillejos, Zambales.

Ayon sa traffic Bureau, unang nabangga ang isang berdeng e-trike sa highway sa Barangay San Nicolas bago tinamaan ang isang motorsiklo at iba pang mga sasakyan hanggang sa Barangay San Jose.

Kritikal naman ang isang rider na patuloy na ginagamot sa San Marcelino District Hospital.

Kasong reckless imprudence resulting in multiple physical injury and damage to properties ang isasampang kaso laban sa driver ng naturang SUV.

Ibinunyag ni Pangulong Rodrigo Duterte na tatakbo siya bilang pangalawang Pangulo sa susunod na eleksiyon kung ito’y nangangahulugan ng pagkakaroon niya ng legal immunity.

Sa kanyang talumpati sa ginanap na national assembly ng PDP-Laban sa Royce Hotel and Casino sa Pampanga, sinabi ni Duterte na alam niyang plano ng kanyang mga kritiko na kasuhan siya pagkatapos ng anim na taon niyang termino sa susunod na taon.

Matatandaang ilang beses na ring ipinagtanggol ng mga kaalyado ng Pangulo ang posibleng pagtakbo niya sa Vice Presidential election dahil hindi naman umano ito ipinagbabawal ng saligang batas.

Inihalal si Energy Secretary Alfonso Cusi bilang bagong Pangulo ng PDP-Laban kasabay ng isinagawang national assembly kahapon ng hapon.

Kabilang naman sa mga dumalo sa assembly sa Clark, Pampanga si Pangulong Rodrigo Duterte na Chairman ng partido kung saan tuluyang naalis si Sen. Manny Pacquiao bilang party president habang binakante naman ang lahat ng mga posisyon dito.

Kasabay ng oath-taking ceremony ng mga bagong opisyal ng PDP-Laban, binigyang diin ng Pangulong Duterte na suportado niya ang liderato ni Cusi habang minaliit nito ang pagtatangka umano nina Pacquiao at Sen. Koko Pimentel na kontrolin ang partido.

Magugunitang ang ama ni Pimentel na si dating Aquilino ‘Nene’ Pimentel Jr. ang nagtatag ng naturang partido.

Natagpuan ng Philippine Navy ang dalawang bangkay ng ilan sa mga nawawalang pasahero ng isang bangka na tumaob sa karagatang sakop ng Bakungan Island sa Patikul, Sulu.

Kinilala ng Naval Forces Western Mindanao ang mga nasawi na sina Hja Suhula Radjuli, 70 taong gulang, at Sitti Kalasahan Radjuli, 33 taong gulang.

Bukod sa mga natagpuang patay, 17 iba pa ang nasagip, kabilang ang isang taong gulang na bata.

Sa imbestigasyon, hinampas umano ng malalaking alon ang bangkang “Friendly” kaya’t tumaob ito malapit sa naturang isla.

Wala nang aktibong kaso ng Delta variant ng COVID-19 sa 35 pasyente na tinamaan nito dahil sa pagpanaw ng dalawa habang gumaling naman ang iba pa.

Ayon kay Health Undersecretary Maria Rosario Vergeire, isa sa mga kumpirmadong nasawi sa bagong variant ay mula sa MV Athens habang galing naman sa Maynila ang isa pang pasyente.

Gayunman, isiniwalat ni Vergeire na isang residente ng Antique ang pumanaw at hinihinalang dulot ito ng Delta variant pero patuloy pa nila itong bineberipika.

Tuloy-tuloy naman ang ginagawang “intensive contact tracing” ng DOH sa lahat ng mga indibidwal na nagpositibo sa bagong variant upang matukoy kung konektado ang mga ito o kung may nagaganap nang local transmission.

Tinatayang P33 milyong halaga ng local o foreign currencies at iba pang monetary instruments ang nasabat ng Bureau of Customs (BOC) mula noong 2020.

Batay sa report ng Intelligence Group-Customs Intelligence and Investigation Service o IG-CIIS ng customs, tinangkang ipuslit ang bansa ang mga nasabing halag ng salapi na karamiha’y nakasilid lamang sa baggage ng mga pasahero.

Ayon sa ahensya, dapat kumuha ng authorization mula sa Bangko Sentral ng Pilipinas (BSP)ang mga biyahero na maglalabas ng pera sa bansa na nagkakahalaga ng higit limampung libong piso.

Para naman sa mga foreign currencies at iba pang monetary instruments na higit sa 10,000 us dollars ang katumbas na halaga ay kailangang ideklara ito sa Customs Baggage Declaration Form at Foreign Currency Declaration Form.

Umakyat na sa 1,428,504 ang kabuuang bilang ng mga gumaling sa coronavirus disease 2019 o COVID-19 sa Pilipinas.

Ito’y makaraang makapagtala ang Department of Health o DOH ng 7,213 na recoveries.

Batay sa pinakabagong case bulletin ng DOH, nagkaroon ng 6,040 na bagong impeksiyon dahilan upang pumalo sa 1,502,359 ang total cases sa buong bansa.

Sa nasabing bilang, nasa 47,257 naman ang mga aktibong kaso.

Samantala, sumampa naman sa 26,598 ang death toll matapos pumanaw ang mahigit isang daan pang pasyente.

Hinimok ng pamunuan ng Catholic Bishops’ Conference of the Philippines o CBCP ang mga Katolikong mananampalataya at mga Diocesan administrators na mag-alay ng panalangin kasabay ng paggunita ng “Martyrs’ Day” sa Myanmar bukas, Hulyo 19.

Batay sa isang circular, nanawagan si CBCP assistant secretary general Fr. Carlo Del Rosario sa mga pari na makiisa sa selebrasyon na idineklara bilang “Day of Solidarity with Myanmar.”

Ipinag-utos din na patunugin ang mga kampana sa lahat ng mga simbahan sa bansa bandang alas- 6 ng hapon sa nasabing araw.

Matatandaang noong Hulyo 19, 1947 ay pinagbabaril ng mga armadong lalaki ang ilang independence leaders ng Myanmar habang nagsasagawa ng cabinet meeting sa Yangon kaya’t idineklara ito bilang Martyrs’ Day.