Umarangkada na ang pagbabakuna sa mga preso sa Tagum City Jail.
Pahayag ni Jail Senior Insp. Jul Akbar Jamiri, warden ng male dormitory, nasa 75 preso ang unang nakatanggap ng unang dose ng bakuna kontra COVID-19 na Sinovac.
Nabatid na target mabakunahan ang lahat ng 296 inmates sa nasabing piitan hanggang susunod na dalawang linggo.
Sumampa na sa 1,397,403 ang bilang ng mga gumaling sa coronavirus disease 2019 o COVID-19 sa Pilipinas.
Ito’y makaraang makapagtala ang Department of Health (DOH) ng 6,127 na karagdagang recoveries.
Batay sa pinakabagong datos ng DOH, nakapagtala naman ito ng 5,916 na bagong kaso kaya’t sumirit na sa 1,473,025 ang kabuuang coronavirus infections sa bansa.
Sa nasabing bilang, nasa 49,701 ang active cases o 3.4% ng kabuuang bilang ng mga tinamaan ng virus.
Samantala, dahil naman sa pagpanaw ng mahigit isang daan pang pasyente ay umakyat na sa 25,921 ang death toll sa buong kapuluan.
Dumating na sa bansa ang 348 overseas filipino workers (OFW) mula Dubai at Abu Dhabi sa United Arab Emirates(UAE).
Ayon kay Labor Secretary Silvestre Bello III, ito na ang ika-apat na batch ng repatriation mula nang magdeklara ng travel restrictions ang Inter-Agency Task Force (IATF) laban sa pitong bansa.
Sinabi ni Bello na may apat pang repatriation flights na nakatakdang dumating sa bansa sa Hulyo 12, 17, 27 at 30.
Niyanig ng magnitude 4.6 na lindol ang Sultan Kudarat.
Ayon sa Philippine Institute of Volcanology and Seismology o Phivolcs, natunton ang sentro ng lindol sa layong 15 kilometro timog-kanluran ng bayan ng Kalamansig.
Nabatid na tectonic ang pinagmulan ng pagyanig na may lalim na 30 kilometro.
Wala namang iniulat na pinsala at wala ring inaasahang aftershocks sa nasabing lindol.
Nakatanggap ng tulong mula sa gobyerno ang tinatayang 200 magsasaka at mamamalakaya, gayundin ang 30 dating mga rebelde sa mga mahihirap na komunidad sa Bohol.
Bukod sa mga sapatos at bisikleta, sinabi ni Sen. Bong Go na karamihan sa mga benepisyaryo sa bayan ng Dauis ay nakatanggap din ng food packs, vitamins, face masks at face shields.
Ang mga bata naman ay binigyan ng mga computer tablets para sa kanilang pag-aaral habang ang mga dating kasapi ng New People’s Army (NPA) ay nabigyan ng tulong sa pamamagitan ng Barangay Development Program ng National Task Force to End Local Communist Armed Conflict o NTF-ELCAC.
Patay ang isang mag-asawa at maging ang kanilang tatlong taong gulang na anak na lalaki matapos mahagip ng rumaragasang Sport Utility Vehicle (SUV) ang sinasakyang motorsiklo ng mga ito sa Roman Highway, Abucay, Bataan.
Ayon kay Abucay Police Chief Major Leopoldo Estorque, Jr., dead on the spot si Den Mark Magramo at ang live-in partner nitong si Jossanye Sarmiento dulot ng matinding impact ng salpukan.
Hindi rin umabot nang buhay sa ospital ang kanilang anak na si Jed Mark Magramo.
Sa imbestigasyon, pakaliwa na sana patungong Sitio Grego sa Barangay Calaylayan ang motorsiklo nang salpukin ng SUV na minamaneho ng isang Rissadel Mendoza na Human Resources Manager ng Subic Bay Metropolitan Authority (SBMA).
Ayon sa pulisya, si Mendoza ay mahaharap sa mga kasong reckless imprudence resulting in death & damage to property.
Mariing itinanggi ng Commission on Higher Education na inipit nito ang Smart Campus grant para sa Cagayan State University (CSU).
Paliwanag ni CHED Chair Prospero de Vera III, ang CSU ay hindi kwalipikado dulot ng umano’y unliquidated fund transfers.
Ang paglilinaw ay ginawa ni de Vera matapos ibunyag ni CSU Vice President Ranhilio Aquino sa social media na ang development ng isang Smart Campus ay naipangako na sa kanila ni Commissioner Perfecto Alibin.
Gayunman, inipit umano ang pondo dahil nais ng CHED na i-takeover ang unibersidad na kanila namang tinutulan.
Ngunit binigyang diin ni de Vera na may natuklasan nila may unliquidated fund transfers pa ang CSU kaya’t hindi na ito kwalipikado para sa nasabing grant.
Nagbukas ng isa pang bakuna center ang Philippine Red Cross (PRC) sa SM Olongapo Downtown sa Olongapo City, Zambales.
Sa soft launch ng vaccination site ay nasa 44 individuals ang agad na nabigyan ng bakunang gawa ng Moderna.
Maliban sa mga Red Cross staff at volunteers, nagsilbi ring mga observers sa dry run ng operasyon ng center ang mga kinatawan mula sa Olongapo City health office.
Gumagawa ng mga hakbang ang pamahalaan upang mapuksa ang kagutuman at kahirapan sa bansa.
Ang pahayag ay ginawa ni Cabinet Secretary Karlo Nograles kasunod ng napaulat na nasa 49% ng pamilyang Pilipino ang nagsasabing sila ay mahirap habang nasa 17% naman ang nagsabing hindi sila dukha.
Sa survey ng Social Weather Stations (SWS) noong Abril 28 hanggang Mayo 2, sinasabing ang numerong iyon ay katumbas ng 12.4 milyon na nagsabing sila ay mahirap.
Kasabay nito, 33% naman ang naniniwalang sila ay ‘borderline poor’ o nasa linya pa rin ng karukhaan.
Ayon kay Nograles, head ng Inter-Agency Task Force on Zero Hunger, hindi naman nakakagulat ang nasabing datos bunsod na rin ng mga limitasyon sa hanap-buhay na dulot ng COVID-19 pandemic restrictions.
Wala pang pinal na kasunduan ukol sa kompensasyon para sa bangka ng mga Pilipinong mangingisda na binangga at pinalubog ng isang Chinese vessel sa Recto Bank noong Hulyo 2019.
Ayon kay Department of Justice Undersecretary Adrian Sugay, nagpapapatuloy pa ang negosasyon kaugnay ng napaulat na P6 milyong settlement sa pagitan ng mga mangingisdang Pinoy at mga may-ari ng Yuemaobinyu 42212.
Matatandaang sinalpok at inabandona ng bangka ng China ang Gem-Ver1 kung saan lulan dito ang 22 Pinoy fishermen bago nasagip ng isang Vietnamese vessel.