Gilbert Perdez

Pinaiimbestigahan ng isang mambabatas sa kongreso ang panibagong insidente ng hazing sa hanay ng militar.

Ayon kay ACT-CIS Rep. Eric yap, nais niyang busisiin at matuldukan ang mga hazing, hindi lamang sa Philippine Merchant Marine Academy (PMMA),  kundi sa lahat ng Military Academy ng gobyerno.

Ang pahayag ay ginawa ni Yap matapos matagpuang patay si PMMA 4th Class Cadet Jonas Bondoc nang mabiktima umano ng hazing sa kanilang barracks sa San Narciso, Zambales.

Binigyang diin ni Yap na hindi niya  maintindihan kung bakit kailangang saktan ang mga kadete gayung para sa edukasyon lang kaya naroon sila sa academy.

Matatandaang noong 2001 at 2011 ay may mga namatay na rin na kadete sa PMMA pero nabalewala umano ang mga nasabing insidente.

Nangako naman ang kongresista na bukod sa “In aid of legislation”, nais din nilang may managot sa malagim na sinapit ni Bondoc.

Maliban sa pag-aalburoto ng Bulkang Taal ay maaaring makapagpalala ng sitwasyon sa COVID-19 ang banta ng mga posibleng mamuong bagyo ngayong kalagitnaan ng taon.

Ito ang ibinabala ni Dr. Peter Julian Cayton ng University of the Philippines (UP) pandemic response team sa gitna ng ginagawang paglikas ng mga residente sa ilang lugar sa lalawigan ng Batangas.

Ayon kay Cayton, kadalasan tumataas ang mga kaso tuwing may evacuation dahil sa dikit-dikit o siksikan ang mga tao.

Nabalot ng takot ang mga manggagawa sa isang construction site sa bayan ng San Juan sa Ilocos Sur matapos mahukay ng mga ito ang mahigit 200 anti-aircraft ammunitions mula pa sa panahon ng ikalawang digmaang pandaigdig.

Pahayag ni Police Captain Christopher Ramat, Hepe ng San Juan Police Station, nadiskubre ng mga construction workers sa Barangay Sabangan ang mga pampasabog na may habang pitong pulgada bawat isa at hinihinalang ibinaon ng mga Hapon noong world war 2.

Nasa custody na ng Ilocos Sur Police Provincial Office ang mga antigong bala.

Nakapagtala ang Department of Health (DOH) ng 5,966 na bagong kaso ng COVID-19 sa bansa dahilan para sumirit sa 1,436,369 ang bilang ng impeksiyon.

Batay sa pinakabagong datos ng DOH, nagkaroon naman ng 6,987 na bagong recoveries kaya’t sumampa sa 1,358,512 ang kabuuang bilang ng mga gumaling sa sakit.

Ito’y nangangahulugan na nasa 52,708 na ang active cases.

Samantala, dahil naman sa pagpanaw ng 86 pang pasyente ay pumalo na sa 25,149 ang death toll sa buong kapuluan.

Inaprubahan na ng pamahalaan ang Interzonal travel para sa mga fully-vaccinated individuals.

Ayon kay Presidential Spokesperson Harry Roque, ito’y batay sa Resolution No. 124-B na inilabas ng Inter-Agency Task Force(IATF).

Gayunman, sinabi ni Roque na dapat magpakita ng domestic vaccination card ang biyahero o kaya’y certificate of isolation mula sa Bureau of Quarantine.

Isasalang pa rin naman sa health & exposure screening ang mga travelers na kumpleto na sa bakuna pagdating nila sa kanilang destinasyon.

Kung ang isang fully-vaccinated person naman ay close contact ng hinihinalang tinamaan o may COVID-19, isasailalim ito sa mas maikling quarantine period kung walang sintomas na nararamdaman sa loob ng pitong araw.

Maliban dito, sinabi ni Roque na susundin ang testing at isolation protocols kapag nagpositibo ito o kaya’y nakitaan na ng mga sintomas.

Mahigit 2.7 milyong indibidwal na ang fully-vaccinated sa bansa o katumbas ng 4.7% ng 58 milyong Pilipino na target mabakunahan para maabot ang herd immunity ngayong taon.

Hindi bababa sa 29 ang kumpirmadong patay habang sugatan naman ang 50 iba pa sa pagbagsak ng isang C130 military aircraft sa Jolo Airport sa Sulu.

Ayon kay Defense Secretary Delfin Lorenzana, lulan ng military aircraft ng Philippine Air Force (PAF) ang 96 na army personnel, kabilang ang tatlong piloto at limang crew.

Nawawala naman ang 17 pang sakay ng eroplano.

Sa inisyal na impormasyon, palapag na sana ng paliparan ang PAF aircraft nang mangyari ang insidente.

Nagpapatuloy ang rescue operations at imbestigasyon sa pagbagsak ng nasabing aircraft.