DWIZ 882

Hindi pa nakakapagpasya ang Senate Blue Ribbon Committee kung itutuloy ang pagsasagawa ng imbestigasyon hinggil sa mga maanomalyang flood control project.

Ayon kay Senador Erwin Tulfo, sa susunod na linggo pa inaasahang mabubuo ang komite dahil hinihintay pa ang pagtatalaga ng mga miyembro mula sa minorya upang mapag-usapan na ang magiging direksyon nito.

Bukod dito, sinabi rin ni Senador Tulfo na pag-uusapan pa ng komite kung dapat pa bang magdaos ng hiwalay na imbestigasyon o kung ipauubaya na nila ito sa Ombudsman.   l mula sa panulat ni Reianne Antiquina

Sinimulan na ng Land Transportation Franchising and Regulatory Board (LTFRB) ang pagtalakay sa mga petisyon ng limang transport groups para sa taas-pasahe.

Kinumpirma ito ni LTFRB Chairman Vigor Mendoza the Second upang makagawa na ng kaukulang hakbang para sa posibleng fare adjustment para sa mga pampasaherong jeep, bus, UV express, taxi, at motorcycle taxi.

Partikular na pinag-aaralan ng ahensya ang hirit ng piston na sampung pisong dagdag-pasahe.

Kabilang din sa sinusuri ang mga petisyon ng Metro Comet Transport Service Cooperative, UV Express National Alliance of the Philippines, United Transportation Coalition of the Philippines at MANIBELA.

Tiniyak naman ni Chairman Mendoza na magpapatupad sila ng makaturangang fare adjustments para sa transportation sector, habang pinangangalagaan din ang kapakanan ng mga commuter sa gitna ng pabago-bagong presyo ng langis dulot ng tensyon sa gitnang silangan.  l mula sa panulat ni Reianne Antiquina

Lumobo pa sa mahigit 19 trilyong pesos ang kabuuang utang ng Pilipinas nitong katapusan ng Hunyo.

Ayon sa Bureau of the Treasury, mas mataas ito ng 518.9 bilyong pesos kumpara sa 18.5 trilyong pesos noong Mayo, at higit ding mataas sa 17 trilyong pesos na naitala noong Hunyo ng nakaraang taon.

Nilinaw ng B.T.R. na bunsod ng mas malaking domestic at foreign borrowings na ginamit sa pagpopondo ng mga programa at proyekto ng pamahalaan ang pagtaas ng utang ng bansa.

Kung saan, umabot sa 12.8 trilyong pesos ang domestic debt habang nasa 6.2 trilyong pesos ang external debt.

Samantala, sinabi ni R.C.B.C. Chief Economist Michael Ricafort na maaaring mangailangan pa ng dagdag na pangungutang ang gobyerno sa mga susunod na buwan para pondohan ang pinabibilis na paggastos, partikular sa imprastraktura. | Sa panulat ni Jordan Gutierrez

Lumagda ang Embahada ng Estados Unidos sa Pilipinas at ang pamahalaang panlalawigan ng Zamboanga del Sur sa isang Memorandum of Agreement (MOA) para sa pagpapatupad ng ₱30.8-milyong programa sa pagsasanay ng mga law enforcer laban sa terorismo.

Sa ilalim ng kasunduan, maglalaan ang U.S. Department of State, sa pamamagitan ng Antiterrorism Assistance (ATA) Program, ng permanenteng training facilities sa Pagadian City. Dito isasagawa ang regular na specialized training para sa mga tauhan ng Philippine National Police (PNP).

Ayon kay U.S. Embassy Acting Senior Regional Security Officer Daniel Art, patunay ang naturang investment ng tiwala ng Estados Unidos sa kakayahan ng PNP at ng hangarin nitong higit pang palakasin ang seguridad ng Pilipinas at ng Amerika sa pamamagitan ng matibay na ugnayan ng dalawang bansa.

Mula pa noong 2006, mahigit 10,000 Filipino law enforcement personnel na ang sumailalim sa ATA Program upang mapahusay ang kanilang kakayahan sa pag-iimbestiga, pagtugon, at pagpigil sa mga banta ng terorismo. Tinatayang nasa 2,000 PNP personnel at iba pang law enforcers ang sasailalim sa pagsasanay sa bagong pasilidad sa Pagadian bawat taon.

Sinabi naman ni Zamboanga del Sur Gov. Divina Grace Yu na makatutulong ang partnership upang higit na mapalakas ang kakayahan ng mga law enforcer sa pagpigil at paghadlang sa mga teroristang aktibidad, gayundin ang pagpapanatili ng seguridad at katatagan hindi lamang sa Zamboanga del Sur kundi maging sa buong Mindanao at bansa.

Kasabay rin nito ang paggunita ng Estados Unidos at Pilipinas sa ika-80 anibersaryo ng diplomatikong ugnayan, inaasahang higit pang pagtitibayin ng naturang programa ang kooperasyon ng dalawang bansa sa larangan ng seguridad at pagpapatupad ng batas.

Ipinatigil ng Pasig Regional Trial Court Branch 152 ang pagpapatupad ng National Capital Region Wage Order Number 27, na nagtatakda ng 85-pesos minimum wage hike sa Metro Manila.

Epektibo ang T.R.O. o Temporary Restraining Order simula pa nitong Hulyo a-bente kwatro hanggang Agosto a-trese, habang nakatakda naman ang pagdinig sa hiling na preliminary injunction sa  Agosto 13.

Inihain ang petisyon ng Readycon Trading and Construction Corporation at R-2 Builders Incorporated, na nagsabing magdudulot ang naturang wage hike ng malaking dagdag-gastos sa kanilang operasyon.

Iginiit ng Readycon na maaaring magdulot ang umento sa sahod ng pagbawas ng mga empleyado, paghinto ng operasyon, at paghina ng kakayahang kumuha ng mga bagong proyekto.

Gayunman, kinilala ng Pasig R.T.C. ang karapatan ng mga manggagawa sa makatarungang sahod at ng mga negosyo sa makatwirang kita habang dinidinig ang nasabing ligal na usapin.

Nauna nang ipinatupad nitong Hulyo a-bente singko ang paunang 60 pesos sa kabuuang 85 pesos wage increase sa Metro Manila, habang ang natitirang 25 pesos ay nakatakdang ipatupad sa Enero ng susunod na taon. | Sa panulat ni Jordan Gutierrez

Naghain ng petition for bail si Senador Jinggoy Estrada para sa Sandiganbayan 5th Division, na humahawak ng kanyang kasong plunder kaugnay sa sinasabing flood control kickback scheme.

Ito’y makaraang ibasura ng anti-graft court ang kanyang naunang motion to fix bail dahil sa pagiging premature.

Batay sa kanyang pitong pahinang petisyon, inihayag ni Senador Estrada na mahina ang mga kasong plunder na inihain laban sa kanya kaya’t karapatan niyang makapagpiyansa.

Ipinunto ng mambabatas na batay sa 1987 Constitution na maaari lamang pagkaitan ng piyansa ang isang akusado kung malakas ang “evidence of guilt.”

Binigyang-diin ni Estrada sa kanyang petisyon na walang matibay na ebidensya na direkta o hindi siya direktang nagkamal ng nakaw na yaman na 573.7 million pesos noong July 2024 hanggang March 2025 o ng kahit anong halaga.