DWIZ 882

Bumuo na ang Department of Energy (DOE) ng joint task force kasama ang Energy Regulatory Commission (ERC), National Electrification Administration (NEA), at mga electric cooperative upang pangunahan ang pagpapatupad ng direktiba ni Pangulong Ferdinand Marcos Jr. na alisin ang system loss charges at kaugnay nitong value-added tax sa singil sa kuryente.

Ayon kay Energy Secretary Sharon Garin, tututukan ng task force ang mga technical, regulatory, at legislative na hakbang para maisulong ang mas mababang singil sa kuryente, mas mahusay na serbisyo, at mas matibay na proteksyon sa mga konsyumer.

Nakikipagpulong na aniya ang DOE sa Meralco at iba pang private distribution utilities upang matiyak ang maayos na pagpapatupad ng mga reporma.

Paiigtingin na rin ng pamahalaan ang kampanya laban sa power theft at ang modernisasyon ng distribution networks para mabawasan ang system losses. l mula sa panulat ni Jordan Gutierrez

Nilinaw ng Energy Regulatory Commission  na hindi malulugi ang mga power distribution utility kahit alisin sa bayarin ng mga konsyumer ang non-technical system loss charges, na dulot ng pagnanakaw ng kuryente, iligal na koneksyon, at meter tampering.

Ayon kay ERC Chairperson Francis Saturnino Juan, nasa 1 percent hanggang 1.5 percent lamang ng kabuuang system loss ang naturang gastos kaya maliit lamang ang magiging epekto sa kita ng mga utility.

Sa pagdinig ng Senado, sinabi rin ng ERC at Department of Energy na kapag inalis ang naturang singil, mapipilitan ang mga electric cooperative na paigtingin ang kampanya laban sa pagnanakaw ng kuryente at pagbutihin ang kanilang operasyon.

Gayunman, iginiit ng Meralco na mangangailangan ito ng dagdag na tauhan, kagamitan, at puhunan upang masugpo ang power theft. Pero binigyang-diin ni Senate Energy Committee Chairman Erwin Tulfo na hindi dapat ipasa sa mga konsyumer ang gastos sa pagpigil sa pagnanakaw ng kuryente.

Nilinaw ng Meralco na sinasalo na nila ang system losses na lampas sa itinakdang price cap ng ERC, at ang anumang nakokolekta mula sa mga kaso ng power theft ay ibinabalik sa mga konsyumer sa pamamagitan ng mas mababang generation charges. l mula sa panulat ni Jordan Gutierrez

Naniniwala ang Malakanyang na walang dahilan para amyendahan ang mga umiiral na batas kaugnay ng pag-withdraw at pag-monitor ng confidential funds.

Ito ang naging tugon ni Palace Press Officer Claire Castro, kasunod ng testimonya ng dalawang bank managers sa impeachment trial ni Vice President Sara Duterte.

Iginiit ni Usec. Castro na sapat ang mga umiiral na batas, at hindi naman problema ang pag-withdraw ng malaking halaga kung naaayon naman ito sa batas.

Ang tunay na isyu aniya ay ang mga lumalabag at umaabuso sa pondo ng bayan.  l mula sa panulat ni Reianne Antiquina

Kinumpirma ng Malakanyang na hindi pa pinal ang pagpapatupad ng Pax Silica Project.

Ayon kay Palace Press Officer Claire Castro, bukas ang pamahalaan na repasuhin ang proyekto kung may kailangang baguhin sa mga probisyon nito.

Isinasaalang-alang aniya ng pamahalaan ang mga isyu kabilang ang posibleng epekto nito sa suplay ng tubig at kuryente.

Naniniwala rin ang Palace Official na hindi makakaapekto ang pagtalakay sa mga isyu at mas mainam na talakayin na ito sa mga kinauukulang ahensya upang agad na maresolba ang mga isyu.  l mula sa panulat ni Reianne Antiquina

Sinimulan nang ilunsad ng House of Representatives ang launching ng “LegisHear: Bawat Batas Mahalaga” na pambansang legislative consultation at oversight program na isinagawa sa lalawigan ng Isabela.

Pinangunahan ni House Speaker Faustino “Bojie” Dy III ang kauna-unahang aktibidad ng Kamara na dinaluhan ng 1,500 participants.

Ang inaugural launch ng programa ay sinuportahan ni House Secretary General Cheloy Garafil; local mayors ng Isabela, kabilang na si Echage Mayor Ino Dy na national president ng League of Municipalities of the Philippines.

Mahigit dalawampung ahensya ng gobyerno din ang nakiisa sa LegisHear upang alamin at tugunan ang pangangailangan ng mamamayan.

Layon ng aktibidad na gawing mas bukas, mas mabilis ang pagtugon, at mas mailapit sa mamamayan ang Kongreso sa pamamagitan ng direktang konsultasyon sa iba’t ibang lalawigan.  | via Geli Mendez (Patrol 30)

Babawasan ng Department of Social Welfare and Development (DSWD) ang target na bilang ng mga benepisyaryo ng 4Ps o Pantawid Pamilyang Pilipino Program sa susunod na taon.

Ayon sa DSWD, ibababa sa 3.5 million na pamilya, mula sa dating 4.4 million ang target na benepisyaryo sa susunod na taon.

Bumaba ang poverty incidence o bilang ng mahihirap na pamilya sa bansa batay sa 2023 data ng Philippine Statistics Authority.

Iginiit naman ng ahensya na walang kinalaman dito ang tinapyasang budget nito sa susunod na taon.  l mula sa panulat ni Reianne Antiquina

Inihirit ng transport group na MANIBELA sa pamahalaan ang rollback sa presyo ng produktong petrolyo at pag-amyenda sa Oil Deregulation Law.

Ayon kay MANIBELA President Mar Valbuena, ginagamit ng mga kumpanya ng langis ang nasabing batas para samantalahin ang mga consumer.

Dapat anyang amyendahan na ang naturang batas upang higit na mapangalagaan ang kapakanan ng taumbayan, sa halip na patuloy na magsilbi lamang sa interes ng mga negosyante at malalaking kompanya ng langis.

Bukod dito, hinimok din ni Valbuena sina Energy Secretary Sharon Garin at Pangulong Ferdinand Marcos Junior na magpatupad na ng unbundling sa presyo ng produktong petrolyo upang maging mas malinaw ang batayan ng pagpepresyo.  l mula sa panulat ni Reianne Antiquina

Namumuro ang malakihang rollback sa presyo ng mga produktong petrolyo sa unang linggo ng Agosto.

Batay sa tatlong araw na pagtataya sa MOPS o Mean of Platts Singapore, nasa (1.70) piso at sitenta sentimos ang inaasahang bawas-presyo sa kada litro ng diesel, habang (1.80) piso at otsenta sentimos naman sa bawat litro ng gasolina.

Tinatayang (2.80) dos pesos at otsenta sentimos naman ang ibabawas sa kada litro ng kerosene o gaas.

Ayon kay Jetti Petroleum President Leo Bellas, maaaring lumaki ang bawas-presyo sa mga natitirang araw ng pagtataya ngunit posible pa rin ang price increase dahil sa mga panibagong pag-atake sa gitnang silangan.

Karaniwang inaanunsyo ng mga kumpanya ng langis ang opisyal na presyo tuwing Lunes at ipinatutupad naman tuwing Martes.    l mula sa panulat ni Reianne Antiquina

Pinayagan na ni Pangulong Ferdinand Marcos Junior ang Bureau of Internal Revenue na buksan ang mga kahon ng tax records ni Vice President Sara Duterte at ng kanyang asawa na si Attorney Manases Carpio.

Kinumpirma ito ni Palace Press Officer Claire Castro matapos isumite ng BIR ang mga dokumento sa Senate Impeachment Court bago ang itinakdang deadline kahapon.

Giit ng Malakanyang, hindi magiging hadlang si Pangulong Marcos sa paglabas ng katotohanan at tumatalima lamang ito sa mga umiiral na batas at tamang proseso.

Sa ilalim ng National Internal Revenue Code, kailangan ang pahintulot ng Pangulo bago mailabas ang tax records ng isang taxpayer na iniimbestigahan.   l mula sa panulat ni Reianne Antiquina