DWIZ 882

Tiniyak ni House Secretary General Cheloy Garafil na tuloy-tuloy at puspusan ang pagtatrabaho ng Kamara sa kabila ng sabay-sabay na mahahalagang gawain ng Kongreso.

Sa isang ambush interview sa Echague, Isabela matapos ang launching ng LegisHear: Ang Bawat Batas Mahalaga, sinabi ni Garafil na magiging abala ang mga miyembro ng Mababang Kapulungan sa mga susunod na araw dahil sa paglulunsad ng LegisHear, pagsisimula ng budget hearings, pagpapatuloy ng mga committee hearing, maging ang impeachment trial laban kay Vice President Sara Duterte, at ang pagtupad ng mga kongresista sa kanilang mga responsibilidad sa kani-kanilang distrito.

Kinilala ni Garafil ang dedikasyon ng mga mambabatas na nagsisilbing House prosecutors sa impeachment trial, na ayon sa kanya ay nagagampanan pa rin ang kanilang tungkulin bilang mga kinatawan ng kanilang mga nasasakupan habang humaharap sa paglilitis.

Binigyang-diin ni Garafil na kayang pagsabayin ng Kamara ang lahat ng mandato nito sa ilalim ng Saligang Batas upang maipagpatuloy ang paglilingkod sa taumbayan. | via Geli Mendez (Patrol 30)

Ibinunyag ni Ombudsman Jesus Crispin Remulla na iniimbestigahan na ng kanyang tanggapan ang reklamong graft laban sa mag-inang sina Senador Loren Legarda at Batangas Representative Leandro Leviste.

Ayon kay Remulla, kaugnay ito ng mga umano’y “ghost” electricity contract na nagkakahalaga ng hindi bababa sa sampung bilyong piso.

Gayunman, iginiit ng Ombudsman na daang bilyong piso ang nakulimbat mula sa kaban ng bayan.

Matatandaang nadawit si Leviste matapos nitong ibenta ang kanyang kumpanyang Solar Philippines sa negosyanteng si Manny Pangilinan matapos nitong makakuha ng prangkisa upang maglagay ng mga solar microgrid sa buong bansa noong administrasyon ni dating Pangulong Rodrigo Duterte.

Sinabi naman ng MGEN Corp., na pagmamay-ari ni Pangilinan, na nakakuha ito ng sariling prangkisa mula sa Kongreso at iba pa ito sa SP New Energy Corp. na binili ng MGEN mula kay Leviste. | Sa panulat ni Anjo Riñon

Tiniyak ng Land Transportation Franchising and Regulatory Board (LTFRB) na magpapatuloy na sa Agosto ang pagpapatupad ng Fuel Subsidy Program para sa mga tsuper at operator ng mga pampublikong sasakyan.

Ayon kay LTFRB Chairperson Vigor Mendoza, kasalukuyan pang tinatapos ng ahensya ang halaga ng subsidiya at ang saklaw ng mga benepisyaryo upang matiyak na agad itong maipatutupad.

Sa ngayon, pinag-aaralan na ng ahensya ang pagbibigay ng fuel discount na nasa labinlima hanggang dalawampung piso kada litro, depende sa magiging pinal na pagtaya ng Department of Energy sa inaasahang pagtaas ng presyo ng diesel sa susunod na linggo.

Layunin ng programa na maibsan ang epekto ng patuloy na pagtaas ng presyo ng langis sa mga Public Utility Vehicle operator at driver, habang tinitiyak ang tuloy-tuloy na pagbibigay ng maayos na serbisyo sa mga commuter.—sa panulat ni Reabelle Medina

Lumobo pa sa mahigit 19 trillion pesos ang kabuuang utang ng Pilipinas nitong katapusan ng Hunyo.

Ayon sa Bureau of the Treasury (BTR), mas mataas ito ng 518.9 billion pesos kumpara sa 18.5 trillion pesos noong Mayo, at higit ding mataas sa 17 trillion pesos na naitala noong Hunyo ng nakaraang taon.

Nilinaw ng BTR na bunsod ng mas malaking domestic at foreign borrowings na ginamit sa pagpopondo ng mga programa at proyekto ng pamahalaan ang pagtaas ng utang ng bansa.

Kung saan, umabot sa 12.8 trillion pesos ang domestic debt habang nasa 6.2 trillion pesos ang external debt.

Samantala, sinabi ni RCBC Chief Economist Michael Ricafort na maaaring mangailangan pa ng dagdag na pangungutang ang gobyerno sa mga susunod na buwan para pondohan ang pinabibilis na paggastos, partikular sa imprastraktura. l mula sa panulat ni Jordan Gutierrez

“Trabaho lang kami”

Ito ang naging tugon ni House Speaker Faustino “Bojie” Dy III, matapos makakuha ng walumpung porsyentong trust ratings sa survey ang bawat district representatives mula sa mga Pilipino.

Ayon kay Speaker Dy, patuloy sa pagsusumikap ang bawat mga kongresista na maibalik ang suporta at tiwala ng taumbayan.

Aminado ang lider ng Kamara na marami pang pagkukulang ang mga mambabatas kaya ito ang dahilan kung bakit inilunsad ang “LegisHear: Bawat Batas Mahalaga.”

Naniniwala si Speaker Dy na magiging malaking bahagi ang LegisHear upang lalong mapaganda at malaman ng Kamara ang tunay na sentimyento tungo sa mas maayos at mas magandang mga batas na kanilang ihahain para sa bansa.

Una nang inihayag ni Speaker Dy na kanilang palalawigin ang LegisHear sa Luzon, Visayas, at Mindanao upang mas mabilis na matugunan at mailapit ang Kongreso sa mamamayan. | via Geli Mendez (Patrol 30)

Ikinalungkot ni Labor Secretary Francis Tolentino ang pansamantalang pagsuspinde ng Pasig Regional Trial Court sa 85-pesos minimum wage increase sa National Capital Region (NCR).

Gayunman, inihayag ng kalihim na iginagalang niya ang utos ng korte, habang tiniyak ng Department of Labor and Employment (DOLE) na patuloy nitong pangangalagaan ang kapakanan ng mga manggagawa alinsunod sa batas.

Samantala, kinondena ng ilang labor groups ang nasabing temporary restraining order sa pagpapatupad ng umento sa sahod sa Metro Manila.

Ayon sa NAGKAISA Labor Coalition at Partido Manggagawa, labag sa Labor Code ang pagharang ng korte sa mga aksyon ng wage boards at National Wages and Productivity Commission (NWPC).

Iginiit ng NAGKAISA na naaantala ng naturang kautusan ang matagal nang hinihintay na dagdag-sahod ng mga minimum wage earner sa gitna ng patuloy na pagtaas ng presyo ng mga bilihin.

Binigyang-diin naman ng Partido Manggagawa na ang pagkaantala ng wage hike ay katumbas ng pagkakait sa karapatan ng mga manggagawa sa dagdag na kita. l mula sa panulat ni Jordan Gutierrez

Iginiit ng Malacañang na nagkaroon ng pagkukulang ang mga bangko sa hindi pagre-report sa Anti-Money Laundering Council ng mga sinasabing “unusual” cash withdrawals mula sa confidential fund ng Office of the Vice President at Department of Education.

Ayon kay Palace Press Officer Undersecretary Claire Castro, lumitaw ito matapos ang testimonya ng dalawang dating Landbank branch managers sa nagpapatuloy na impeachment trial.

Mahalaga aniya na masunod ang proseso ng pagre-report sa mga kahina-hinalang transaksyon.

Binigyang-diin ni Usec. Castro na kung itinuturing na “unusual” ang isang transaksyon, nararapat itong suriin at alamin kung kailangan itong i-report sa AMLC, sino man ang may-ari ng account.

Dagdag pa ng Palace Press Officer, sapat na ang umiiral na mga batas kaugnay ng anti-money laundering, ngunit nagkakaroon ng problema kapag hindi ito naipapatupad nang maayos, kaya’t mahalaga ang transparency at accountability sa paggamit ng confidential funds. —sa panulat ni Reabelle Medina mula kay Gilbert Perdez (Patrol 13)

Lumobo pa sa mahigit 19 trillion pesos ang kabuuang utang ng Pilipinas nitong katapusan ng Hunyo.

Ayon sa Bureau of the Treasury, mas mataas ito ng 518.9 billion pesos kumpara sa 18.5 trillion pesos noong Mayo, at higit ding mataas sa 17 trillion pesos na naitala noong Hunyo ng nakaraang taon.

Nilinaw ng BTR na bunsod ng mas malaking domestic at foreign borrowings na ginamit sa pagpopondo ng mga programa at proyekto ng pamahalaan ang pagtaas ng utang ng bansa.

Kung saan umabot sa 12.8 trillion pesos ang domestic debt habang nasa 6.2 trillion pesos ang external debt.

Samantala, sinabi ni RCBC Chief Economist Michael Ricafort na maaaring mangailangan pa ng dagdag na pangungutang ang gobyerno sa mga susunod na buwan para pondohan ang pinabibilis na paggastos, partikular sa imprastraktura. —sa panulat ni Jordan Gutierrez

Nanindigan si Atty. Manases “Mans” Carpio na dapat dumaan sa pagsusuri ang legalidad ng pagpapalabas ng kanilang income tax records ni Vice President Sara Duterte.

Binigyang-diin ni Atty. Carpio na iginagalang nila ang kapangyarihan ng Senate Impeachment Court at susunod sila sa mga nararapat na proseso, ngunit naniniwala siyang may mahahalagang usaping legal na dapat munang linawin hinggil sa pagpapahintulot sa paglabas ng kanilang tax records.

Ayon pa kay Atty. Carpio, wala namang ipinapakitang tax assessment o tax deficiency ang Bureau of Internal Revenue maging kay VP Sara, kasabay ng pagkukuwestyon nila kung nasunod ang mga itinakdang proseso bago inisyu ang authorization.

Ang admissibility at halaga ng evidentiary documents ay nasa pagpapasya ng Senate Impeachment Court, alinsunod sa Konstitusyon, batas, at mga alituntunin nito.

Kasabay nito, nanawagan si Atty. Carpio sa publiko na ihiwalay ang mga legal na paratang, mga pag-usad sa proseso, at mga napatunayang katotohanan.