DWIZ 882

Iginiit ni Senate impeachment court spokesperson Atty. Reginald Tongol na may sapat na legal na batayan ang naging hakbang ng impeachment court na isama ang SALN, tax records, at bank records ni Atty. Man Scarpio, asawa ni Vice President Sara Duterte, sa impeachment proceedings.

Ito ay matapos kuwestiyunin ng kampo ng Bise Presidente ang hakbang, dahil hindi naman umano impeachable official si Scarpio.

Ayon kay Tongol, nakasaad sa Republic Act No. 6713 o Code of Conduct and Ethical Standards for Public Officials and Employees na ang Statement of Assets, Liabilities and Net Worth (SALN) ng isang opisyal ay inihahain kasama ang kanyang asawa.

Patay ang isang 13-anyos na estudyante matapos umanong saksakin ng 14-anyos niyang kamag-aral sa loob ng isang pampublikong high school sa Barangay Daniel Fajardo, Las Piñas City noong Hulyo 31.

Ayon sa Southern Police District (SPD), nagkaroon ng alitan ang dalawang estudyante habang recess bago bunutin ng suspek ang isang patalim at saksakin ang biktima sa dibdib.

Agad na dinala ng mga guro ang biktima sa ospital, ngunit idineklara itong dead on arrival ng mga doktor.

Inihahanda na ng pulisya ang kaukulang reklamo laban sa 14-anyos na suspek, na itinuturing na Child in Conflict with the Law (CICL), alinsunod sa umiiral na batas at juvenile justice protocols.

Tiniyak din ng SPD na paiigtingin ang seguridad at koordinasyon sa mga paaralan upang maiwasan ang kahalintulad na insidente.

Sinabi ni public interest lawyer Atty. Renato Bautista Jr. na maaaring maharap sa disciplinary action ang isang abogado kung mapatutunayang sadya nitong nagpakalat ng maling impormasyon sa publiko.

Ang pahayag ay kasunod ng kontrobersiya sa spliced video na ibinahagi ni Senador Pia Cayetano hinggil sa naging pahayag ni Akbayan Party-list Rep. Chel Diokno sa impeachment trial, na umani ng batikos dahil sa pagiging misleading nito.

Ipinaliwanag ni Bautista na ipinagbabawal sa ilalim ng Section 38 ng CPRA ang sinasadya o malisyosong pagpapakalat ng misinformation. Aniya, ang “knowingly or maliciously” ay hindi simpleng pagkakamali o kapabayaan, kundi isang sadyang kilos.

Sinabi rin ni Atty. Bautista na sa mga kasong may kinalaman sa dishonesty at misinformation, hindi aniya nag-aatubili ang Korte Suprema na magpataw ng pinakamabigat na parusang administratibo sa isang abogado—ang disbarment—kung ito ang nararapat batay sa magiging resulta ng proseso at ebidensya

Sinabi ni Energy Regulatory Commission (ERC) Chairman Atty. Francis Saturnino Juan na sisimulan ng ahensya ang pag-aaral sa kasalukuyang system loss cap upang matukoy kung gaano kalaking bahagi nito ang dulot ng non-technical losses (katulad ng pagnanakaw, defective na metro, o kapabayaan).

Aniya, layunin ng pag-aaral na alamin kung maaari pang mapababa ang pinapayagang system loss charges at matukoy kung kailan ito maaaring ipatupad.

Bibigyan din aniya ng sapat na panahon ang mga distribution utilities upang makapaghanda at makagawa ng kaukulang plano, kabilang ang pagpapalakas ng kanilang mga hakbang laban sa mga non-technical losses.

Kinuwestiyon ni dating House Speaker Ferdinand Martin Romualdez ang patuloy umanong paggamit ng Office of the Ombudsman sa testimonya ng ilan sa mga “maleta boys” na nagpakilalang dating bodyguards ng pugante at former Congressman Zaldy Co. para sa kasong isasampa laban sa kaniya na aniya’y matagal nang nawalan ng kredibilidad at nahaharap na ngayon sa kasong cyberlibel at perjury.

Iginiit niya na ang tanging hinihingi niya ay pantay na pagtrato sa ilalim ng batas habang nagpapatuloy ang preliminary investigation kaugnay ng kontrobersiya sa umano’y flood control scam.

Ayon kay Cong. Romualdez, mahirap umanong ituring na patas ang imbestigasyon kung ang mga testigong dati nang ibinasura at ngayon ay may kinakaharap pang kaso ay patuloy pa ring ginagamit laban sa kanya.

Sa kabila nito, tiniyak ni Cong. Romualdez na haharapin niya ang proseso ng imbestigasyon. “Hindi ako uurong sa laban na ito. Hindi ako matitinag. Gawin natin ang tama,” dagdag pa ng kongresista.

Pinayagan ng Sandiganbayan Third Division ang pansamantalang paglaya ni dating Senador Ramon “Bong” Revilla Jr. sa gitna ng pagkakasangkot nito sa kasong graft at malversation.

Ayon kay Sandiganbayan Third Division Clerk of Court Dennis Pulma, tanging si Revilla lang ang pinayagang makapagpiyansa ng isang milyong piso, at hindi ang mga kapwa akusado nito.

Sinabi naman ng abogado ni Revilla na si Atty. Rean Balisi na patunay lamang ng pagpayag ng korte na makapagpiyansa ang kanyang kliyente na walang kinalaman ang dating senador sa inirereklamo laban dito.

Nakauwi na rin kagabi si Revilla upang makapiling ang kanyang pamilya, habang natuwa rin ang mga tagasuporta ng dating senador sa social media post nito kung saan kasama niya ang kanyang angkan sa ilan sa mga litrato.

Matatandaang sangkot sina Revilla at iba pang indibidwal sa umano’y ghost project sa Pandi, Bulacan na nagkakahalaga ng P92.8 million.

Iginiit din ng dating senador na wala siyang kinalaman sa reklamo laban sa kanya. | Sa panulat ni Anjo Riñon