DWIZ 882

Inatasan ng Energy Regulatory Commission (ERC) ang utility giant na Meralco na isauli ang kabuuang ₱9.5 billion overrecoveries noong Enero hanggang Disyembre 2025 sa mahigit walong milyong costumers nito.

Ipatutupad ang refund sa loob ng anim na buwan, o hanggang sa maibalik ang buong halaga. Ang refund ay katumbas ng P0.3448 kada kilowatt-hour (kWh) para sa lahat ng customer classes.

Mas malaki naman ang matatanggap ng residential (hopusehold)customers na P0.5861 kada kWh, katumbas ng tinatayang P117.22 bawas sa buwanang bayarin ng mga customer na gumagamit ng 200 kWh.

Sinabi ni Department of National Defense (DND) Secretary Gilbert Teodoro Jr. na nararapat na magbitiw ang mga opisyal ng gobyerno, lalo na ang mga inihalal ng Pilipino sa kanilang mga puwesto, kung hindi nila kayang panindigan ang posisyon ng Pilipinas sa West Philippine Sea

Aniya, obligasyon ng bawat opisyal ng gobyerno na tumupad sa kanilang sinumpaang tungkulin na pangalagaan ang Konstitusyon at ipatupad ang mga umiiral na batas.

Dagdag pa niya, mahalagang makita ng publiko ang tunay na motibo ng mga opisyal na may ganitong paninindigan.

Ito ang naging tugon ng former Chairman ng Presidential Anti-Corruption Commission (PACC) na si Greco Belgica sa gitna ng mga alegasyon laban kay Senador Alan Peter Cayetano kaugnay ng kuwestiyonableng flood control projects sa Taguig.

Ayon kay Belgica, ang senador ay isang Kristiyanong kapatid na naninindigan para sa tama. Aniya, ang uso ngayon ay pinakukulong ang mga naninindigan.

Iginiit din niya na hindi sila magpapatinag, maninindigan sa tama, at hindi papayagang manaig ang mali sa tama.

“Pwede nila tayo kasuhan, ipakulong o ipapatay. Pero hindi nila dapat mapigil ang katotohanan. Nasa atin ang katotohanan. Nasa atin ang ilaw at nasa atin ang buhay,” dagdag pa niya.

Ikinakasa na ng Southern Police District (SPD) ang pagsasampa ng kasong kriminal laban sa isang 14-anyos na Child in Conflict with the Law (CICL) na sinaksak ang 13-anyos na kaklase nito sa dibdib na kalaunan ay ikinasawi ng biktima sa Las Piñas National High School noong Biyernes ng Hapon, Hulyo 31.

Sinabi ng SPD na ang lahat ng kinakailangang dokumento para sa pagsasampa ng reklamo ay tinatapos na ng Station Investigation and Detection Management Section (SIDMS). Ayon sa pulisya, ang prosesong kanilang isinisagawa ay alinsunod sa umiiral na batas at juvenile justice protocols, sa pakikipag-ugnayan sa mga social welfare officer.

Nag-ugat umano ang insidente dahil sa pagtatalo ng magkaklase sa ₱10 na sukli mula sa biniling bottled water sa school canteen. Nangyari ang pananaksak sa harap ng isang classroom sa fourth floor ng nabanggit na eskuwelahan.

Nakatakdang makipagpulong ang Land Transportation Franchising and Regulatory Board sa mga transport group upang talakayin ang mga nakabinbing petisyon para sa dagdag-pasahe dahil sa patuloy na pagtaas ng presyo ng langis sa Lunes, August 3.

Kabilang sa mga lalahok ang mga kinatawan ng jeepney, UV Express, motorcycle taxi, taxi, at mga commuter group.

Ayon kay LTFRB Chairperson Vigor Mendoza II, layunin ng pagpupulong na mabigyang pagkakataon ang bawat grupo na ipaliwanag ang batayan ng kanilang petisyon, habang maihahayag din ng mga commuter ang kanilang mga pananaw at katanungan.

Kasama sa mga naghain ng petisyon ang PISTON, Manibela, Metro Comet Transport Service Cooperative, UV Express National Alliance of the Philippines, at United Transportation Coalition of the Philippines.

Humihiling ang Manibela ng dalawang pisong dagdag-pasahe, habang sampung piso naman ang hinihingi ng PISTON mula sa kasalukuyang minimum na labintatlong piso.

Iginiit ng LTFRB na maingat nitong babalansehin ang kapakanan ng mga operator at commuter bago magdesisyon at isasaalang-alang din ng ahensya ang kakayahan ng publiko na makayanan ang dagdag-gastos at ang posibleng epekto nito sa presyo ng mga pangunahing bilihin at serbisyo.—sa panulat ni Reabelle Medina

Naglunsad ang Department of Agriculture ng IUU Fishing Reporting Center sa Puerto Princesa City, Palawan, layunin nitong hikayatin ang mga mangingisda at residente na mag-report ng illegal fishing activities.

Batay sa datos ng DA, tinatayang nasa 5.3 bilyong piso ang taunang pagkalugi sa illegal fishing.

Ayon kay Agriculture Secretary Francisco Tiu Laurel Jr., mahalagang maprotektahan ang suplay ng isda at kabuhayan ng mga lehitimong mangingisda.

Anya, bahagi ito ng mas pinaigting na kampanya laban sa illegal fishing at para sa pangangalaga ng yamang-dagat.—sa panulat ni Reabelle Medina

Ibinahagi ni Caloocan Bishop Pablo Virgilio Cardinal David ang kanyang pagninilay sa isyu ng Pax Silica at ng planong pagtatayo ng isang pasilidad sa New Clark City sa Tarlac.

Ayon kay Cardinal David, ang tunay na isyu ay hindi tungkol sa pagsulong ng pambansang interes, kundi kung makatutulong ang Pax Silica upang maitaguyod ang scientific capability, technological innovation, at industrial resilience ng bansa.

Ikinatatakot kasi ng Cardinal na posibleng para lamang sa kapakanan ng ibang bansa ang Pax Silica habang ginagamit ng naturang inisyatiba ang lupa, likas na yaman, tubig, kuryente, tax incentives, at mga manggagawa ng Pilipinas.

Gayunman, iginiit niya na tunay na pakikipag-tulungan na magpapalakas sa bansang pagtatayuan ng pasilidad ang dapat maging pakay ng Pax Silica.

Bumatay rin si Cardinal David sa encyclical ni Pope Leo XIV na “Magnifica Humanitas,” kung saan nasasaad na dapat manatiling lingkod ng sangkatauhan ang teknolohiya tulad ng artificial intelligence. | Sa panulat ni Anjo Riñon

Sinabi ni Senate impeachment court spokesperson Atty. Reginald Tongol na maaari lamang makalahok sa impeachment trial sina Sen. Jinggoy Estrada at Sen. Rodante Marcoleta kapag natugunan ang mga legal na kondisyon para sa kanilang pagdalo.

Partikular kay Estrada, ipinaliwanag ni Tongol na kailangan munang matapos ang kanyang preventive suspension at payagan siyang makapagpiyansa ng Sandiganbayan bago siya muling makadalo sa mga sesyon ng Senado.

Ayon pa kay Tongol, mahalagang personal na naroroon ang isang senador upang magampanan ang kanyang tungkulin bilang mambabatas at bilang senator-judge sa impeachment court.

Dahil dito, sinabi niyang hindi mabibilang ang partisipasyon ng isang senador sa impeachment proceedings hangga’t hindi siya pinapayagang makabalik at dumalo nang personal sa Senado.