DWIZ 882

Namumurong bumaba ang presyo ng mga produktong petrolyo ngayong unang linggo ng Agosto.

Batay sa galaw ng global prices sa unang apat na trading days, posible ang rollback na singkwenta sentimos hanggang piso kada litro ng diesel, habang piso hanggang piso singkwenta sentimos sa gasolina.

Ayon kay Jetti Petroleum President Leo Bellas, bumaba ang presyo ng Brent crude matapos ang pagtaas nito sa mahigit 100 dollars kada bariles noong nakaraang linggo, dahil sa nakaumang tigil-putukan sa pagitan ng Estados Unidos at Iran.

Gayunman, nananatiling mataas ang panganib sa suplay ng krudo dahil sa limitadong pagdaan ng langis sa Strait of Hormuz, muling paglala ng tensyon sa Gitnang Silangan, at pagbaba ng oil inventories ng Estados Unidos.  l mula sa panulat ni Jordan Gutierrez

Epektibo simula ngayong araw, Agosto a-tres, ang panibagong taas-presyo sa LPG o liquefied petroleum gas.

Ayon kay Regasco President Arnel Ty, tataas ng dos pesos singkwenta’y singko sentimos kada kilo ang presyo ng LPG, katumbas ng dagdag na 27 pesos 50 centavos  sa bawat 11-kilogram na LPG cylinder.

Nauna nang nagpatupad ng price increase nitong Agosto a-primero ang Petron Gasul na tres pesos kada kilo, o katumbas ng 33 pesos na dagdag sa presyo ng bawat 11-kilong tangke.

Nilinaw ng mga kumpanya ng langis na tumaas ang shipping cost sa LPG dahil sa nagpapatuloy na tensyon at kaguluhan sa Gitnang Silangan, na nakaapekto sa pandaigdigang suplay at transportasyon ng mga produktong petrolyo. l mula sa panulat ni Jordan Gutierrez

Nakaalerto na ang Department of Social Welfare and Development (DSWD) kasunod ng pagpasok ng Bagyong Luis sa bansa.

Inatasan na ni DSWD Secretary Rex Gatchalian ang lahat ng field offices na makipag-ugnayan sa mga lokal na pamahalaan at mahigpit na bantayan ang sitwasyon sa mga lugar na posibleng maapektuhan ng sama ng panahon.

Nakahanda na rin ang family food packs at iba pang relief supplies sa mga bodega ng DSWD para sa agarang pagtugon sakaling kailanganin.

Tiniyak ng kagawaran na may mahigit 4.9 milyong family food packs ang nakaimbak sa buong bansa na maaaring ipamahagi sa mga maaapektuhang komunidad. l mula sa panulat ni Jordan Gutierrez

Bahagyang tumaas ang antas ng tubig sa Angat Dam matapos ang ilang araw na pag-ulan.

Batay sa monitoring ng PAGASA Hydrometeorology Division, umabot sa 155.45 metro ang water level ng dam kahapon, mas mataas ng 4.60 metro kumpara sa 150.85 metro na naitala noong Hulyo 30.

Sa kabila ng pagtaas, nananatili pa ring mas mababa ang antas ng tubig sa critical low water level na 160 metro at may agwat pang 54.55 metro sa normal high-water level na 210 metro.

Patuloy na mino-monitor ng mga otoridad ang lagay ng dam dahil ito ang pangunahing pinagkukunan ng tubig sa Metro Manila at mga karatig-lugar.  l mula sa panulat ni Jordan Gutierrez

Hiniling ng Trade Union Congress of the Philippines (TUCP) sa Pasig City Regional Trial Court Branch 152 na agad alisin ang temporary restraining order (TRO) na pumipigil sa pagpapatupad ng ₱85 minimum wage increase sa Metro Manila.

Bago ang pagdinig ng korte ngayong araw, Agosto 3, sa aplikasyon para sa writ of preliminary injunction, iginiit ng grupo na walang sapat na batayan ang TRO laban sa NCR Wage Order No. 27, na magbibigay sana ng unang bugso na ₱60 umento noong Hulyo 25.

Ayon sa TUCP, apektado ng TRO ang mahigit 1.1 milyong minimum wage earners sa National Capital Region (NCR). Umaabot umano sa ₱60 milyon kada araw o halos ₱1.6 bilyon sa loob ng isang buwan ang nawawalang sahod ng mga manggagawa habang nananatiling epektibo ang naturang kautusan.

Iginiit din ng TUCP na labag sa Article 126 ng Labor Code, Republic Act No. 6727 o Wage Rationalization Act, at mga alituntunin ng National Wages and Productivity Commission ang pagpapalabas ng temporary restraining order.

Dahil dito, hiniling ng labor group sa korte na ibasura ang mga petisyon ng Readycon Trading and Construction Corporation at R-2 Builders Incorporated at payagang maipatupad ang wage order upang matanggap na ng mga manggagawa ang nakatakdang dagdag-sahod.  l mula sa panulat ni Jordan Gutierrez

Bumaba ang average retail price ng well-milled rice sa bansa sa ikalawang bahagi ng Hulyo ng kasalukuyang taon.

Ayon sa Philippine Statistics Authority (PSA), mula Hulyo 15 hanggang Hulyo 17, naitala ang average na presyo na ₱55.69 kada kilo, mas mababa kumpara sa ₱56.15 noong ikalawang bahagi ng Hunyo.

Bumaba rin ang presyo ng karneng baboy sa ₱306.16 kada kilo mula ₱307.60 noong unang bahagi ng Hulyo.

Patuloy namang tumaas ang presyo ng kamatis, na umabot sa ₱115.26 kada kilo mula ₱97.07 noong unang bahagi ng Hulyo.

Nilinaw ng PSA na mas mataas din ang presyo ng kamatis kumpara sa parehong panahon noong 2025, habang ang presyo ng baboy ay nananatiling mas mababa kumpara sa antas nito noong nakaraang taon. l mula sa panulat ni Jordan Gutierrez

Pinalawig ng Land Transportation Franchising and Regulatory Board (LTFRB) hanggang sa katapusan ng Agosto ang fuel discount program para sa mga driver at operator ng jeepney at UV Express.

Ayon kay LTFRB Chairman Vigor Mendoza II, buwan-buwan nilang rerepasuhin ang programa upang matukoy kung kailangan pa itong ipagpatuloy batay sa galaw ng presyo ng langis sa pandaigdigang merkado.

Magpapatuloy, aniya, ang pagbibigay ng sampung pisong diskwento kada litro ng gasolina. Pinalalawak din ang bilang ng mga gasolinahang kalahok sa programa upang mas maraming benepisyaryo ang makinabang.

Sa datos ng LTFRB, halos 100,000 public utility vehicles sa buong bansa ang nakikinabang sa fuel discount araw-araw. Tanging mga operator ng jeepney at UV Express na may prangkisang inisyu ng ahensiya ang maaaring mag-avail ng naturang diskwento. l mula sa panulat ni Jordan Gutierrez

Tiniyak ng Meralco o Manila Electric Company na ipatutupad nito ang direktiba ng Energy Regulatory Commission na isauli ang ₱9.5 bilyong over-recoveries o sobrang nakolektang singil sa mga consumer.

Ayon sa Meralco, isasagawa ang refund sa loob ng anim na buwan bilang suporta sa hakbang ng pamahalaan na mabawasan ang gastos ng mga consumer sa kuryente.

Nilinaw ni Meralco Senior Vice President at Head of Regulatory Management Atty. Jose Ronald Valles na ang average refund ay 34-sentimo kada kilowatt-hour (kWh) para sa lahat ng customer classes, habang aabot sa 59 sentimo kada kWh para sa residential customers.

Aniya, ang refund ay bunga ng dalawang refund applications na inihain ng Meralco noong 2025 at unang bahagi ng 2026, na sumasaklaw sa mga billing period mula Enero hanggang Disyembre 2025. l mula sa panulat ni Jordan Gutierrez

Tatalakayin na ngayong araw ng Land Transportation Franchising and Regulatory Board (LTFRB), kasama ang ilang transport group, ang mga petisyon hinggil sa taas-pasahe.

Ayon kay LTFRB. Chairman Vigor Mendoza II, masasakop ng naturang pagdinig ang halos lahat ng uri ng public land transportation sa bansa tulad ng jeep, U.V. Express, taxi, at motorcycle taxi.

Kabilang sa mga naghain ng petisyon ang transport group na Manibela, na humihirit ng ₱2 dagdag-pasahe para sa mga jeep.

Samantala, naghain naman ng hiwalay na petisyon ang grupong PISTON para sa ₱10 dagdag sa minimum na pasahe sa jeep.  | Sa panulat ni Reianne Antiquina

Binatikos ni Davao City Representative Paolo “Pulong” Duterte ang panawagan ni Department of National Defense (DND) Secretary Gilbert Teodoro Jr. na dapat magbitiw sa puwesto ang mga opisyal ng gobyerno na umano’y pumapanig sa China sa usapin ng West Philippine Sea (WPS).

Iginiit ng kongresista na ang mga halal na opisyal ay iniluklok sa puwesto ng taumbayan at hindi ni Sec. Teodoro. Aniya, kung may ebidensya ng pagtataksil sa bayan ang sinumang opisyal, nararapat itong idaan sa tamang legal na proseso sa halip na panawagang magbitiw sa puwesto.

Dagdag pa niya na ang pagiging makabayan ay hindi nasusukat sa pagbansag ng “pro-China” sa mga may ibang pananaw at ang tunay na pagmamahal sa bayan ay naipapakita sa serbisyo publiko.

Sinabi rin ni Duterte na tungkulin ng Defense Secretary na palakasin ang pambansang depensa at hindi ang magdikta sa mga halal na opisyal. Aniya, sa isang demokratikong bansa, ang mga botante ang may kapangyarihang magtanggal ng mga inihalal na opisyal, hindi ang sinumang miyembro ng Gabinete.