DWIZ 882

Naghain ng petition for bail si Senador Jinggoy Estrada para sa Sandiganbayan 5th Division, na humahawak ng kanyang kasong plunder kaugnay sa sinasabing flood control kickback scheme.

Ito’y makaraang ibasura ng anti-graft court ang kanyang naunang motion to fix bail dahil sa pagiging premature.

Batay sa kanyang pitong pahinang petisyon, inihayag ni Senador Estrada na mahina ang mga kasong plunder na inihain laban sa kanya kaya’t karapatan niyang makapagpiyansa.

Ipinunto ng mambabatas na batay sa 1987 Constitution na maaari lamang pagkaitan ng piyansa ang isang akusado kung malakas ang “evidence of guilt.”

Binigyang-diin ni Estrada sa kanyang petisyon na walang matibay na ebidensya na direkta o hindi siya direktang nagkamal ng nakaw na yaman na 573.7 million pesos noong July 2024 hanggang March 2025 o ng kahit anong halaga.

Tumanggi si Senador Panfilo “Ping” Lacson sa anumang “ceasefire” matapos niyang ilantad ang umano’y mga anomalya sa mga proyektong pang-impraastraktura sa Taguig City.

Ayon kay Sen. Lacson, naipasa na niya sa Office of the Ombudsman ang mga ebidensya ng umano’y double billing at iba pang irregularidad, at ilalahad pa ang ibang detalye sa pagdinig ng Senate Blue Ribbon Committee kaugnay ng mga flood control projects.

Handa anya ang mambabatas na ipagtanggol ang kanyang integrirad matapos kwestiyunin ni dating Senate President Alan Peter Cayetano ang pagtaas ng kanyang net worth.

Nanindigan din si Sen. Lacson, na ang pagkago ng kanyang yaman ay mula sa mga lehitimong negosyo sa loob ng tatlong taon na wala siya sa Senado. | —sa panulat ni Reabelle Medina

Nag-alok ang bansang Lithuania sa Pilipinas ng teknolohiyang magpapalakas sa cybersecurity nito.

Sa kanyang pagbisita sa Maynila, sinabi ni Lithuanian Foreign Minister Kestutis Budrys na produkto ng ilang dekadang pagtuligsa ng kanyang bansa sa mga “hybrid threat” mula Russia at China ang mga teknolohiyang inaalok nito sa bansa.

Dagdag pa ni Budrys, umaasa siyang mamumuhunan sa Pilipinas ang mga Lithuanian tech firm na nakatuon sa counter-disinformation at cybersecurity.

Ilan din anya sa mga kompanya ang may mga monitoring system na gumagamit ng artificial intelligence; habang may iba ring naghahatid ng serbisyo sa larangan ng security operations, cyber legislation, e-governance infrastructure, at digital public services.

Nabatid na nasa Tier 1, o ang pinakamataas na antas, ang Lithuania sa pinakahuling Global Cybersecurity Index ng International Telecommunication Union noong 2024; habang nasa Tier 2 naman ang Pilipinas simula pa noong 2020. | Sa panulat ni Anjo Riñon

Sinimulan na ng pamunuan ng Minor Basilica and National Shrine of Jesus Nazareno, o mas kilala bilang Quiapo Church, ang paghahanda nito para sa Traslacion 2027.

Isinagawa ang planning meeting noong Hulyo 27 hanggang 28 sa Santa Mesa, Maynila, na pinamunuan ni Quiapo Church Rector, Fr. Ramon Jade Licuanan, at dinaluhan ng Procession Committee at ng Fiesta Council ng naturang simbahan.

Kasama naman sa pagpupulong ang ilang sektor na karaniwang gumagabay at tumutulong sa pagdiriwang ng Kapistahan ng Nuestro Padre Jesus Nazareno tuwing Enero 9 kada taon.

Kabilang din sa mga ipinulong ni Fr. Licuanan ang pamunuan ng Manila Police District upang mapanatiling maayos at ligtas ang naturang pagdiriwang.

Nagtapos naman ang pagpupulong sa pamamagitan ng isang misa na pinangunahan ni Fr. Licuanan. | Sa panulat ni Anjo Riñon

Iginiit ni Murang Kuryente Party-list Representative Arthur Yap na ang mga distribution utility (DU), kabilang ang mga power distributor, ang dapat umanong umako sa gastos na dulot ng systems loss at hindi ito ipasa sa mga konsyumer.

Ayon kay Cong. Yap, bago aprubahan ng Energy Regulatory Commission (ERC) ang mga hinihinging rate adjustment ng mga distribution utility, nagsusumite ang mga ito ng investment at business plan na nagsasaad kung paano nila pagbubutihin ang kanilang distribution network.

Ipinaliwanag ng kongresista na binibigyan ang distribution utility ng karapatan mag-charge at kumite mula rito, kaya nararapat lamang na isama na rin nila sa kanilang mga plano ang mga hakbang upang mabawasan ang systems loss.

Aniya, kung lumalala ang systems loss dahil sa hindi maayos na mga linya ng kuryente o sa iligal na koneksyon gaya ng jumper cables, hindi dapat ipasa ang dagdag na gastos sa mga konsyumer. Sa halip, dapat itong sagutin ng mismong distribution utility na may pananagutang panatilihing maayos ang kanilang sistema ng distribusyon ng kuryente.

Hindi papayag si Senator Panfilo “Ping” Lacson sa anumang “ceasefire” matapos niyang ilantad ang mga umano’y anomalya sa mga proyektong pang-imprastraktura sa Taguig City.

Ayon kay Lacson, naipasa na niya sa Office of the Ombudsman ang mga ebidensiya ng umano’y double billing at iba pang iregularidad, at ilalahad pa ang iba pang detalye sa pagdinig ng Senate Blue Ribbon Committee kaugnay ng mga flood control projects.

Iginiit din ng senador na handa niyang ipagtanggol ang kanyang integridad matapos umanong kwestiyunin ni dating Senate President Alan Peter Cayetano ang pagtaas ng kanyang net worth.

Dagdag pa ng senador na ang paglago ng kanyang yaman ay mula sa mga lehitimong negosyo sa loob ng tatlong taon na wala siya sa Senado, at ang integridad ang kanyang pinakamahalagang puhunan na minana niya sa kanyang mga magulang.| Sa panulat ni Jenn Patrolla

Nilinaw ng Department of Energy na hindi maaapektuhan ng planong pagtatayo ng Pax Silica industrial hub ang energy supply sa Luzon grid.

Ayon kay Energy Secretary Sharon Garin, maraming paraan ang maaaring gamitin para suplayan ng kuryente ang pagpapatayo ng naturang AI Hub sa Tarlac.

Kabilang ang pagtatayo ng sarili nitong power plant o pagkakaroon ng hiwalay na planta na eksklusibong magsu-suplay ng kuryente sa naturang data center.

Tiniyak ng DOE na hindi magkukulang ang supply ng kuryente sa mga kabahayan at negosyo kahit malaking energy ang kailangan para maipatayo ang Pax Silica Hub.  l mula sa panulat ni Jordan Gutierrez

Tiniyak ng Department of Justice na ipagpapatuloy nito ang pagbawi ng iba pang pondo ng gobyerno na nawaldas sa maanomalyang flood control projects.

Pinasalamatan din ng kagawaran si Pangulong Ferdinand Marcos Jr. sa pagtitiwala nito sa National Prosecution Service, matapos iulat sa kanyang ikalimang SONA na nasa 841 million pesos na ang nabawing pondo.

Ayon sa DOJ, ang mga halagang naibalik sa national treasury sa pamamagitan ng Land Bank of the Philippines ay mula sa mga indibidwal na sangkot sa kaso na naging state witnesses.

Kabilang dito ang 181.3 million pesos mula kay dating DPWH Engineer Henry Alcantara, 20 million pesos mula sa kontratistang si Sally Santos, 140 million pesos mula kay dating DPWH Engineer Gerard Opulencia, at 450 million pesos mula kay dating DPWH Undersecretary Roberto Bernardo.

Binigyang-diin ng DOJ Na patuloy itong makikipag-ugnayan sa Office of the Ombudsman sa pag-usig sa mga sangkot sa flood control scandal. l mula sa panulat ni Jordan Gutierrez

Ipinatawag na ng Senate Impeachment Court ang dalawang auditor ng COA o Commission on Audit at isang opisyal ng House of Representatives bilang mga testigo sa impeachment trial ni Vice President Sara Duterte sa susunod na linggo.

Haharap sa impeachment court sina COA Auditors Roderick Wamil at Xylene Del Campo sa Agosto a-tres at a-kwatro, habang inaasahan namang tetestigo si Marivic Pareja ng Kamara sa Agosto a-singko.

Inaprubahan ni Presiding Officer Francis Escudero ang kahilingan ng house prosecution panel na maglabas ng subpoena upang obligahin ang tatlong testigo na humarap at magsumite ng mga kaugnay na dokumento.

Bahagi ito ng pagtalakay sa unang artikulo ng impeachment case na tumutukoy sa umano’y maling paggamit ng bise presidente sa 612.5 million pesos confidential funds ng Office of the Vice President at Department of Education.

Nauna nang tumestigo ang dalawang opisyal ng Land Bank of the Philippines na nagsabing may nakita silang “unusual” cash withdrawals mula sa mga account ng OVP at DepEd. l mula sa panulat ni Jordan Gutierrez