DWIZ 882

Tiniyak ng Department of Justice na ipagpapatuloy nito ang pagbawi ng iba pang pondo ng gobyerno na nawaldas sa maanomalyang flood control projects.

Pinasalamatan din ng kagawaran si Pangulong Ferdinand Marcos Jr. sa pagtitiwala nito sa National Prosecution Service, matapos iulat sa kanyang ikalimang SONA na nasa 841 million pesos na ang nabawing pondo.

Ayon sa DOJ, ang mga halagang naibalik sa national treasury sa pamamagitan ng Land Bank of the Philippines ay mula sa mga indibidwal na sangkot sa kaso na naging state witnesses.

Kabilang dito ang 181.3 million pesos mula kay dating DPWH Engineer Henry Alcantara, 20 million pesos mula sa kontratistang si Sally Santos, 140 million pesos mula kay dating DPWH Engineer Gerard Opulencia, at 450 million pesos mula kay dating DPWH Undersecretary Roberto Bernardo.

Binigyang-diin ng DOJ Na patuloy itong makikipag-ugnayan sa Office of the Ombudsman sa pag-usig sa mga sangkot sa flood control scandal. l mula sa panulat ni Jordan Gutierrez

Ipinatawag na ng Senate Impeachment Court ang dalawang auditor ng COA o Commission on Audit at isang opisyal ng House of Representatives bilang mga testigo sa impeachment trial ni Vice President Sara Duterte sa susunod na linggo.

Haharap sa impeachment court sina COA Auditors Roderick Wamil at Xylene Del Campo sa Agosto a-tres at a-kwatro, habang inaasahan namang tetestigo si Marivic Pareja ng Kamara sa Agosto a-singko.

Inaprubahan ni Presiding Officer Francis Escudero ang kahilingan ng house prosecution panel na maglabas ng subpoena upang obligahin ang tatlong testigo na humarap at magsumite ng mga kaugnay na dokumento.

Bahagi ito ng pagtalakay sa unang artikulo ng impeachment case na tumutukoy sa umano’y maling paggamit ng bise presidente sa 612.5 million pesos confidential funds ng Office of the Vice President at Department of Education.

Nauna nang tumestigo ang dalawang opisyal ng Land Bank of the Philippines na nagsabing may nakita silang “unusual” cash withdrawals mula sa mga account ng OVP at DepEd. l mula sa panulat ni Jordan Gutierrez

Inaasahang mahigit 6.3 milyong manggagawang Pilipino ang makikinabang sa panukalang itaas ang personal income tax exemption threshold sa 350-thousand-pesos mula 250-thousand-pesos kada taon.

Ayon kay Finance Secretary Frederick Go, ang mga kumikita ng nasa 250-thousand-pesos hanggang 350-thousand-pesos kada taon ay makakadagdag ng hanggang 15-thousand pesos sa kanilang taunang kita dahil hindi na sila magbabayad ng income tax.

Ang mga kumikita naman anya ng mahigit 350-thousand-pesos ay makikinabang din sa mas mababang buwis at maaaring magkaroon ng hanggang 17,500-pesos na dagdag sa kanilang take-home pay bawat taon.

Tiniyak ng DOF na makikinabang din ang mahigit 78-thousand micro at small enterprises sa panukalang alisin ang minimum corporate income tax para sa mga negosyong nalulugi.

Bagaman inaasahang mababawasan ng nasa 66 billion pesos ang kita ng pamahalaan mula sa mga naturang tax relief, inihayag ng ahensya na naghahanap na sila ng ibang mapagkukunan ng kita, kabilang ang posibleng pagtaas ng koleksyon mula sa excise taxes. l mula sa panulat ni Jordan Gutierrez

Kinumpirma ni Senate Minority Leader Alan Peter Cayetano ang bagong committee assignments ng minority bloc sa Senado, kabilang ang pagtatalaga kay Senador Imee Marcos bilang deputy Minority Leader.

Itinalaga rin si Senador Mark Villar bilang Chairman ng Committee on Public Works; si Senador Imee Marcos sa Committee On Cooperatives; habang si Senador Loren Legarda sa Committees On Culture and Arts at Civil Service, Government Reorganization and Professional Organizations.

Uupo naman si Senador Robin Padilla bilang chairman Ng Committees on Public Information at Cultural Communities and Muslim Affairs; habang si Senador Pia Cayetano Sa Committee on Sustainable Development Goals, Innovation and Futures Thinking.

Pamumunuan ni Senador Camille Villar ang Committee on Government Corporations and Public Enterprises; at si Bong Go sa Committee on Sports.

Samantala, itinalaga si Senador Rodante Marcoleta bilang Chairman ng Committee on Tourism, habang si Senador Jinggoy Estrada sa Committee On Electoral Reforms and People’s Participation.

Sa kabila ito ng kanilang pagkakakulong sa magkahiwalay na kasong plunder sa Sandiganbayan. l mula sa panulat ni Jordan Gutierrez

Handa ang Energy Regulatory Commission na magsumite ng mga obserbasyon at rekomendasyon sa mga panukalang reporma sa power sector kung hihingan ito ng komento.

Ayon kay ERC Chairperson Atty. Francis Juan, layunin ng ahensya na magbigay ng gabay sa pagpapatupad ng direktiba ng pangulo, lalo na sa mga probisyon na may kinalaman sa pass-through charges.

Hindi anya maaaring madaliin ang usapin dahil ang pass-through provisions ay isang global practice sa industriya ng kuryente.

Iginiit ng ERC na kinakailangan ng masusing pag-aaral ang anumang reporma upang maiwasan ang hindi inaasahang epekto sa presyo ng kuryente.

Ibinabala rin ng ahensya na kung hindi sapat ang pagsusuri, maaaring mailipat lamang sa ibang bahagi ng electric bill ng mga konsyumer ang mga gastusing aalisin sa isang billing, sa halip na tunay na mapababa ang kabuuang bayarin sa kuryente. l mula sa panulat ni Jordan Gutierrez