DWIZ 882

Tiniyak ng Malacañang na pabibilisin ang pagpasa sa mga panukalang isinulong ni Pangulong Ferdinand Marcos Junior sa kanyang SONA.

Ayon kay Palace Press Officer Claire Castro, sesertipikahan bilang urgent ang pag-amyenda sa EPIRA Law o Electric Power Industry Reform Act upang tanggalin ang system loss charges na sinisingil sa mga consumer.

Prayoridad din anya ang panukalang itaas ang income tax exemption threshold sa 350-thousand pesos kada taon mula sa kasalukuyang 250-thousand pesos at ang pagtatanggal ng corporate tax sa mga maliliit na negosyo upang mabawasan ang pasanin ng mga pilipino.

Hinihintay na lamang anya na maiprisinta kay Pangulong Marcos ang mga naturang panukala upang ito ay masertipikahan.  l mula sa panulat ni Reianne Antiquina

Pinaiimbestigahan ni Department of Public Works and Highways Secretary Vince Dizon ang mga kawani ng ahensya sa Davao City kaugnay ng matinding pagbaha nitong weekend.

Partikular na pinasisiyasat ni Secretary Dizon ang mga tauhan ng Davao City District Engineering Office dahil sa umano’y kapabayaan, matapos gumuho ang bahagi ng pader sa Ilog Talomo sa Barangay Bangkal.

Natuklasan din sa inspeksyon na hindi nakumpuni ang isang gabion flood-control wall na nasira noon pang 2019.

Bukod sa imbestigasyon, ipinag-utos na rin ng kalihim ang agarang pagsasaayos sa mga bitak sa dike at dredging sa Ilog Talomo.   l mula sa panulat ni Reianne Antiquina

Kinumpirma ng Department of Migrant Workers na sa ngayon ay wala pang naiuulat na Pilipinong nasawi sa magnitude 7.1 na lindol sa Kumamoto, Southern Japan.

Ayon sa DMW, patuloy nilang binabantayan ang estado ng mga OFW sa mga apektadong lugar.

Hinimok din ng ahensya ang mga Pilipino sa Kyushu at mga kalapit na lugar na manatiling alerto para sa mga aftershocks.

Samantala, sinabi ni Japanese Prime Minister Sanae Takaichi na sumampa na sa labingtatlo katao ang kumpirmadong nasawi sa pagyanig at inaasahan na tataas pa ito sa pagpapatuloy ng search and rescue operations. l mula sa panulat ni Reianne Antiquina

Ibinida ni Pangulong Ferdinand Marcos Junior sa kanyang ikalimang State of the Nation Address ang mga nagawa ng Department of Human Settlements and Urban Development at Pag-IBIG fund.

Ayon kay Pangulong Marcos, mahigit kalahating-milyong bahay ang naipatayo sa pamamagitan ng expanded pambansang pabahay para sa pilipino program.

Umabot na rin sa 517-point-45 billion pesos ang nailabas na home loan ng Pag-IBIG fund sa ilalim ng Marcos Administration upang maipatayo ang nasa tatlondaan pitumpung libong housing unit.

Iniulat din ng Pangulo na lalo pang lumawak ang partnership ng Pag-IBIG sa mga private developer at iba pang ahensya ng pamahalaan upang dagdagan ang supply ng mga bahay na akma sa pangangailangan ng mga miyembro.

Pinalawak din ang pag-alok ng ahensya ng mga acquired assets nito sa mga pag-ibig member, at maging ang pagpapababa ng financing rate upang mabawasan ang buwanang hulugan at gawing abot-kaya ang pagmamay-ari ng bahay para sa mas maraming pamilyang Pilipino.   l mula sa panulat ni Reianne Antiquina

Iginiit ng Malacañang na ang mga Electric Utility Companies ang dapat gumawa ng hakbang upang mabawasan ang system losses, sa halip na ipasa ang karagdagang gastos sa mga consumer.

Ayon kay Palace Press Officer Undersecretary Claire Castro, layunin ni Pangulong Ferdinand Marcos Jr., na alisin ang dagdag na singil sa mga nagbabayad nang tama ng kanilang konsumo sa kuryente, habang tinitiyak na hindi maaapektuhan ang operasyon ng mga utility companies.

Kaugnay nito, binigyang-diin ni Usec. Castro na dapat paigtingin ng mga electric utility ang kanilang monitoring laban sa power theft at iba pang sanhi ng system losses upang mabawasan ang pagkalugi sa sistema.

Nilinaw din ng Palace Press Officer na pinag-aaralan pa lamang ang panukala at wala pang usapin tungkol sa pagbibigay ng subsidy sa mga electric cooperative.    l mula sa panulat ni Reabelle Medina

Kinuwestyon ni Meralco Chairman at CEO Manuel Pangilinan kung sino ang sasagot sa halaga ng system loss charges kung tuluyang aalisin ito sa singil sa kuryente.

Kasunod ito ng panawagan ni Pangulong Ferdinand Marcos Jr. na amyendahan ang EPIRA Law o Electric Power Industry Reform Act upang hindi na ipasa sa mga consumer ang system loss charges at ang kaugnay nitong value-added tax.

Ayon kay Meralco Chairman Pangilinan, napakalaki ng magiging epekto nito sa buong power industry dahil saklaw ng naturang pass-through charges ang generation, transmission, at distribution ng kuryente.

Aabot anya sa bilyun-bilyong piso ang halaga ng system loss charges at hindi ito kayang akuin ng industriya ng kuryente nang mag-isa.

Gayunman, inihayag ng Department of Energy na maaaring magbigay ng pautang ang National Electrification Administration sa mga electric cooperative upang ma-upgrade ang kanilang mga pasilidad at mabawasan ang system loss.

Iginiit ng Meralco na bukas sila sa pagtalakay sa pagbabago sa EPIRA at makikipagtulungan sa pamahalaan para sa mga repormang makabubuti sa mga konsyumer habang napapanatili ang matatag na suplay ng kuryente. | Sa panulat ni Jordan Gutierrez

Naghain na rin ng panukalang batas si Senate President Sherwin Gatchalian para maalis ang system loss charge sa singil sa kuryente.

Ayon kay Senate President Gatchalian, sa ilalim ng kaniyang panukala, hindi mawawala ang system loss sa operasyon ng mga power utility, ngunit sasaluhin na ito ng mga electric cooperative at hindi ng mga consumer.

Giit ng mambabatas, kailangang magkaroon ng mas mahigpit na pagbusisi sa fuel pass-through charges upang matiyak na tama ang ipinapasang gastos sa mga konsumer.

Maliban dito, dapat din anyang taasan ang kapangyarihan ng Energy Regulatory Commission para magpataw ng mas mabigat na parusa sa mga lumalabag sa regulasyon.—sa panulat ni Mark Terrence Molave