Susuriin ngayong araw sa impeachment trial ang mga business interests at umano’y transaksiyon sa gobyerno ng mga kumpaniyang may kaugnayan kay Vice President Sara Duterte.
Ayon kay House Lead Prosecutor Gerville Luistro, haharap ngayong Day 27 o Week 12 ang mga opisyal mula sa Securities and Exchange Commission at Philippine Government Electronic Procurement System bilang mga testigo sa Article 2 na tumutukoy sa unexplained wealth o hindi maipaliwanag na yaman ng bise presidente.
Maliban sa Statement of Assets, Liabilities, and Net Worth o SALN ni VP Sara, gagamitin na rin ng prosecution ang mga dokumento mula sa korporasyon at pamahalaan, kabilang ang Gencorp Industries na may mga kontrata sa mga ahensiya ng gobyerno.
Matatandaang ipinasubpoena rin ng Senate Impeachment Court si Davao City Mayor Sebastian “Baste” Duterte para magbigay ng testimonya tungkol sa mga transaksiyon ng Davao City Government sa Gencorp.
Asahan namang tatalakayin ni SEC Dir. Gerardo Del Rosario ang mga rekord ng mga kumpanyang idineklara ni VP Sara sa SALN at transaksiyon sa gobyerno. | Sa panulat ni Geli Mendez
