DWIZ 882

Aminado ang Philippine Nationa Police-National Capital Region Police Office (PNP-NCRPO) na mayroong mali sa pagpapatupad ng kontrobersyal na memorandum kung saan inaatasan ang mga pulis na mangalap na impormasyon tungkol sa mga estudyanteng Muslim.

Ayon kay PNP-NCRPO chief Major General Debold Sinas, marunong naman silang tumanggap ng pagkakamali kaya nga binawi na nya ang memorandum.

Subalit nilinaw ni Sinas na hindi matatawag na profiling ang kanilang ginawa kundi simpleng pagkuha lamang ng contact numbers at statistics na gagamitin ng Salaam Police Center bilang bahagi ng pagpapatibay sa peace building at counter violent extremism ng PNP.

Una rito, tinawag na ‘oppression’ at ‘baseless stereotyping’ ng Bangsamoro Autonomous Region government ang hakbang na ito ng PNP-NCRPO.

Una rito, nabunyag rin ang “Oplan Xmen” ng PNP Makati kung saan nangangalap naman ang mga pulis ng impormasyon tungkol sa mga transgender.

Ipinagpaliban ng Korte Suprema ang pagtalakay sa kasong isinampa laban sa ABS-CBN.

Napag-alamang nasa agenda ng mga mahistrado ang kaso ng ABS-CBN subalit hindi ito tinalakay.

Sa halip, posible umanong mapag-usapan ang kaso ng ABS-CBN sa en banc session sa ika-10 ng Marso.

Matatandaan na nagsampa ng quo warranto petition si Solicitor General Jose Calida laban sa ABS-CBN na naglalayong mapawalang bisa ang prangkisa ng network bago pa ito man ito magpaso.

Maliban sa quo warranto, hiniling rin ni Calida sa Korte Suprema na magpalabas ng gag order laban sa ABS-CBN.

Nasa 70 Pilipino na lamang ang nananatili sa mga ospital sa Japan matapos magpositibo sa 2019 coronavirus disease (COVID-19).

Ayon sa Department of Foreign Affairs (DFA), umabot sa 80 Pinoy mula sa Diamond Princess cruise ship ang nagpositibo sa COVID-19, subalit 10 rito ang pinalabas na ng ospital.

Hindi naman malinaw kung nakasama na sa umuwi sa bansa at naka-quarantine sa New Clark City ang 10 na pinalabas na ng ospital.

Posibleng gawaran ng Bagong Bayani Awards ang mga Pilipinong crew ng MV Diamond Princess cruise ship na na-quarantine sa Japan dahil sa 2019 coronavirus disease (COVID-19).

Ayon kay Labor secretary Silvestre Bello III, kinikilala ng kagawaran ang dedikasyon ng mga Overseas Filipino Workers (OFWs) na nagpatuloy sa pagsisilbi sa mga pasahero kahit pa naka-quarantine.

Ang Bagong Bayani Awards ay ibinibigay sa mga OFWs na nagpapakita ng katangi-tanging kahusayan sa trabaho.

Samantala, ang lahat ng Filipino crew ng Diamond Princess na aktibong miyembro ng Overseas Workers Welfare Administration (OWWA) ay tatanggap ng tig-P10,000 financial assistance.

Samantala, nakikipag-ugnayan na rin ang OWWA sa Magsaysay Maritime Corporation –ang manning agency ng OFWs para pag-usapan ang trabaho ng mga OFWs.

Mahigit 400 crew ng Diamond Princess ang kasalukuang naka-quarantine na ngayon sa New Clark City.

Limampu’t dalawa (52) katao pa ang nasawi sa China dahil sa 2019 coronavirus disease (COVID-19).

Ang lahat ng bagong biktima ay nagmula sa Hubei Province –kung saan matatagpuan ang Wuhan City na syang epicenter ng COVID-19.

406 na bagong kaso rin ng COVID-19 ang naidagdag kung san 401 rito ang galing rin sa Hubei Province.

Dahil dito, umabot na sa mahigit 2,700 ang kabuuang bilang ng mga nasawi dahil sa COVID-19.

Itinanggi ni Cebu Congressman Raul Del Mar ang di umano’y namumuong kudeta sa House of Representatives para mapatalsik bilang House Speaker si Allan Peter Cayetano.

Ayon kay Del Mar, inirerespeto ng mga kongresista ang naging kasunduan sa pagitan nina Cayetano at Cong. Lourd Allan Velasco na paghahatian nila ang termino bilang speaker ngayong 18th Congress.

Una nang sinabi ni Cayetano na kung meron mang gustong manawagan na magbitiw sya sa puwesto, dapat ay gawin nila ito sa plenaryo.

Idinagdag pa ni Cayetano na handa syang umalis bilang House Speaker kapag ayaw na sa kanya ng mayorya ng mga kongresista.

Umugong ang di umano’y namumuong kudeta sa Kamara dahil sa pagmamatigas ni Cayetano na huwag munang talakayin ang franchise bill para sa ABS-CBN.

Pinaigting ng Immigration Officers Association of the Philippines ang pagla-lobby para sa pagpasa ng batas na magtataas sa sahod ng mga taga-Bureau of Immigration (BI).

Ayon kay Er German Robinn, pangulo ng grupo, umaasa silang maipapasa ng Kongreso ngayong taon ang pag-amyenda sa Immigration Act of 1940 kung saan itataas sa salary grade 18 ang kasalukuyang salary grade 11 para sa mga Immigration officers.

Sa ilalim anya ng kasalukuyang batas, nasa 22,000 lamang ang suweldo ng Immigration officer 1 na malayong-malayo sa kanilang counterparts sa Southeast Asian countries.

Aminado si Robinn na na-demoralized sila nang tanggalin ang kanilang overtime pay subalit hindi anya ito dapat maging dahilan para gumawa ng katiwalian.

Binigyang diin ni Robinn na bukas sila sa imbestigasyong isasagawa ng National Bureau of Immigration (NBI) sa kanilang tanggapan.

Mataandaan na humarap sa senado si Immigration Officer 1 Allison Aguas Chiong at ibinulgar ang “pastillas scheme” kung saan binibigyan ng VIP treatment ang mga Chinese nationals sa Immigration kapalit ng pera.