DWIZ 882

Madadagdagan pa ang mga masisibak na kawani ng Bureau of Immigration (BI) dahil sa kontrobersyal na “pastillas scheme”.

Ayon kay Pangulong Rodrigo Duterte, nakikipag-ugnayan na siya sa Civil Service Commission (CSC) para mabigyan siya ng listahan ng mga civil service exam passers na mayroong magandang records academically para kaniyang ipamalit sa mga tinanggal sa pwesto.

Gayunman, sinabi ng pangulo na hindi muna niya pakikialaman ang sitwasyon ni Immigration commissioner Jaime Morente.

Ipauubaya na muna umano niya ang imbestigasyon sa Department of Justice (DOJ) at Kongreso para kaniyang malaman ang susunod na aksyon na gagawin.

Hinikayat ng Department of Foreign Affairs (DFA) ang mga Pilipino sa Iran na makinig at sumunod sa mga abiso na inilalabas ng local health authorities hinggil sa 2019 coronavirus disease (COVID-19).

Kasabay nito pinaalalahanan din ng DFA ang mga Pilipino sa nasabing bansa na sumunod sa mga inilalathalang preventive measure ng Department of Health (DOH) para maiwasan na mahawa ng sa sakit.

Sa ngayon ay wala pang Pilipinong kumpirmadong positibo ng virus sa nasabing bansa.

Magpapasaklolo umano si Pangulong Rodrigo Duterte sa media para desisyunan ang franchise renewal ng ABS-CBN Corp.

Sa panayam ng mga reporter sa Malacañang, inamin ng pangulo na hindi madali ang desisyon para sa tanong kung kaniya na bang papayagan ang renewal ng prangkisa ng media network.

Pakaaabangan kasi ang paglagda ng pangulo sa ABS-CBN franchise renewal bill sakaling makalusot na ito sa Kongreso at Senado.

Kasabay nito, nilinaw naman ng pangulo na wala siyang inimpluwensyahan na kahit sinong mambabatas kaugnay sa renewal ng prangkisa ng ABS-CBN.

Pinangalanan na ng Malacañang ang bagong officer-in-charge ng National Bureau of Investigation (NBI).

Ito ay sa katauhan ni Eric Bito-on Distor, Assistant Director for Intelligence Service.

Hindi maaaring direktang palitan ni Distor bilang direktor NBI ang nagretirong si Dir. Dante Gierran.

Ito ay dahil sa mandato sa ilalim ng NBI modernization law kung saan, ang dapat na maging direktor ng ahensya ay naging abogado sa loob ng 15 taon.

Nanawagan ang grupong Cancer Coalition Philippines (CCPH) sa gobyerno na ipatupad na ang Republic Act 11215 o national cancer control act.

Ayon kay Dr. Rachel Rosario, miyembro ng CCPH, itinuturing na isa sa mga pinakanakamamatay na sakit ang cancer kaya naman inaasahang tataas pa ang kaso ng cancer sa susunod na 11 taon.

Dahil dito aniya, layon ng panukala na tulungan ang mga Pilipino na iwasan o labanan ang sakit na cancer.

Inihirit din ng grupo sa Kongreso na isama sa 2021 general appropriations act ang pondo para sa nasabing batas.

Inihayag ni Labor secretary Silvestre Bello III na sumusunod ang ABS-CBP Corp. sa mga labor standards ng ahensya.

Ayon kay Bello, naayos na ng media network ang mga isyu nito hinggil sa mga kontraktwal nilang empleyado.

Ani Bello, batay sa 2018 audit ng kumpanya, mayroon itong 4,858 na empleyado ngunit posibleng hindi pa aniya kasama rito ang mga manggagawa sa ABS-CBN subsidiaries.

Lusot na sa Senado ang anti-terrorism act of 2020 na ipapalit sa human security act of 2007.

Sa botong 19-2, pumabor sa senate bill no. 1083 na inakda ni Senador Panfilo Lacson na may layong magbigay ng ngipin sa batas kontra terorismo.

Ayon kay Lacson, sa oras na maging batas, mas magiging matatag ang criminal justice kontra terorismo.

Sa ilalim nito, mabibigyan din umano ng dagdag na kapangyarihan ang mga otoridad para lubos na protektahan ang mamamayan.