DWIZ 882

Suportado ni Davao City Mayor Sara Duterte ang renewal ng prangkisa ng ABS-CBN.

Naniniwala si Mayor Duterte na magbabago rin ang pananaw ng kanyang amang si Pangulong Rodrigo Duterte sa ABS-CBN dahil maawain ito lalo na sa mga manggagawa na puwedeng mawalan ng trabaho.

Una rito ay tinanggap na ng pangulo ang paghingi ng paumanhin ng ABS-CBN sa hindi pag-ere ng kanyang political ads noong 2016.

Gayunman, sinabi ng pangulo na nasa kamay pa rin ng Kamara ang kapalaran ng pagrenew sa prangkisa ng ABS-CBN.

Sinagot na ng Office of the Solicitor General (OSG) ang komento ng ABS-CBN sa quo warranto petition na inihain sa Korte Suprema ni Solicitor General Jose Calida.

Binigyang diin ni Calida sa kanyang consolidated reply na hindi hangarin ng quo warranto petition na sagkaan ang kalayaan sa pamamahayag.

Layon lamang anya nito na itama ang mga kamaliang nagawa sa publiko ng ABS-CBN nang lumabag sila sa mga probisyon ng kanilang prangkisa.

Nagpatupad ng total revamp ang Bureau of Immigration (BI) sa mga tauhan nilang nasa Ninoy Aquino International Airport (NAIA) Terminal 1, 2 at 3.

Ayon kay Immigration commissioner Jaime Morente, kahit noong 2016 pa ay mayroon nang ipinatutupad na mga pagbabago sa BI.

Gayunman, nang mabunyag anya ang “pastillas scheme” ay agad nilang binalasa ang mga tauhan nila sa airport.

Napag-alaman na tinatayang 800 tauhan ng Immigration ang naapektuhan ng naturang pagbalasa.

Matatandaan na tauhan mismo ng BI ang nagbunyag na binibigyan ng VIP treatment ang mga dumarating na Chinese nationals kapalit ng pera.

Nagsalita na si Cong. Lord Allan Velasco sa umuugong na balita hinggil sa di umano’y kudeta sa House of Representatives.

Ayon kay Velasco, malayo sa katotohanan ang mga kumakalat na balita na ang layunin lamang anya ay paghati-hatiin ang mga miyembro ng Kamara.

Cong. Lord Allan Velasco, pinabulaanan na may “coup plan” siya laban kay Speaker Alan Peter Cayetano | via @JILLRESONTOC https://t.co/YMrMaWMJmW

— DWIZ Newscenter (@dwiz882) February 27, 2020

Sinabi ni Velasco na wala syang planong sirain ang pinasok nilang kasunduan ni House Speaker Alan Peter Cayetano na paghatian ang termino bilang house speaker.

Sa ilalim ng 15-21 deal sa house speakership, mauupo bilang house speaker si Cayetano hanggang Oktubre ng taong ito, samantalang tatapusin ni vVelasco ang natitira pang panahon bilang house speaker. —ulat ni Jill Resontoc (Patrol 7)

Maswerteng tinamaan ng apat na mananaya ang winning combination ng Grand Lotto 6/55 draw ng Philippine Charity Sweepstakes Office (PCSO).

Ayon sa PCSO, ang winning combination ay 51-37-52-39-38-28.

Nakuha umano ng apat na bettor ang limang winning digits nito.

Dahil ditto, makatatanggap ng tig-P149,170 ang apat na mananaya.

Samantala, bigo pa rin na mapanalunan ang 6/45 Mega Lotto na may jackpot prize na mahigit P63-milyon.

Dinepensahan ng ilang senador ang kanilang pagdalo sa nakalipas na pagdinig sa Senado hinggil sa franchise renewal ng ABS-CBN Corp.

Ito’y matapos batikusin ni House Speaker Alan Peter Cayetano ang mga senador na dumalo sa nasabing pagdinig at tawaging sipsip at epal.

Ayon kay Senador Christopher “Bong” Go, nakatulong ang naturang pagdinig para mas maging malinaw ang isyu na nakakapigil sa renewal ng prangkisa ng media network.

Ani Go, hindi lamang mga senador kun’di maging ang mga Pilipino ay naliwanagan kung ano ang puno’t dulo ng usapin.

Giit pa ni Go, naroon sila sa pagdinig dahil ginagawa lamang nila ang kanilang trabaho.

Naniniwala naman si Senador Manny Pacquiao na walang masama sa kanilang ginawa at ginagawa rin lamang nila ang kanilang bahagi dahil ito ay interes din ng bawat Pilipino.

Gayunman, nirerespeto umano niya ang naging opinyon ni Cayetano hinggil sa ginawang pagdinig sa Senado.

Tiniyak ng Department of Labor and Employment (DOLE) na nakahanda ang pamahalaan sakaling kailanganing ilikas ang mga Pilipino sa South Korea dahil sa banta ng 2019 coronavirus disease (COVID-19).

Ayon kay Labor secretary Silvestre Bello III, sa ngayon ay wala pang pangangailangan o wala pang Pinoy na humihiling na sila ay ilikas at makauwi na ng bansa.

Nananatili pa rin aniyang ligtas ang mga Pinoy sa South Korea dahil sa wala pa ring ulat na naapektuhan ng sakit.

Batay sa pagtaya ng DOLE, aabot sa halos 60,000 ang bilang ng mga Overseas Filipino Workers (OFWs) sa South Korea kung saan karamihan sa mga ito ay mga factory workers, wellness workers, skilled workers at household-service workers.