Isang Haponesa ang muling nagpositibo sa 2019 coronavirus disease (COVID-19) sa ikalawang pagkakataon.
Ang Haponesa na residente ng Osaka sa Western Japan ay nasuring positibo sa COVID-19 matapos makaranas ng sore throat at pananakit ng dibdib.
Una syang nagpositibo sa COVID-19 noong Enero at nakalabas ng ospital noong February 1 matapos makarecover.
Ayon sa Japan health ministry, ito ang unang kaso nila na ang isang pasyente ay nagpositibo sa COVID-19 sa ikalawang pagkakataon.
Kinumpirma ni House Speaker Alan Peter Cayetano na mayroong pagtatangkang patalsikin sya bilang house speaker.
Ayon kay Cayetano, nasa 20 congressmen na di umano’y pinangakuan ng committee chairmanship ang nagkumpirma sa kanya ng nilulutong kudeta sa Kamara.
Ibinunyag ni Cayetano na mismong si Cong. Lord Allan Velasco ang lumalapit at nangangako ng committee chairmanships sa mga kongresista kapalit ng suporta na mapaaga ang pag-upo nya bilang house speaker.
Sa Oktubre nakatakdang magtapos ang termino ni Cayetano bilang speaker at simula naman ng pag-upo ni Velasco.
Matapos ang kontrobersyal nilang kasal, agad sinimulan ng bagong kasal na Matteo at Sarah Guidicelli ang pagbuo sa magiging tahanan ng kanilang bubuuing pamilya.
Makikita sa Instagram post ni Dra. Vicki Belo ang kanyang anak na si Scarlett habang tinutulungan ang mag asawa na mamili ng plato, utensils at cups.
Ang sabi pa ni Dra. Belo sa kanyang post, para sa bagong bahay ng mag asawang Sarah at Mateo ang mga binili nilang utensils.
Nakakatuwa anya si Matteo dahil nagkukunwaring alam nya kung ano ang mga dapat piliin.
Sa kapareho ring araw, namataan naman si Sarah na namimili ng mga damit sa isang mall sa Makati City.
Tuloy ang biyahe ng Philippine Airlines (PAL) at Cebu Pacific sa Korea sa kabila ng ini-anunsyong partial travel ban ng pamahalaan dahil sa mabilis na pagkalat doon ng 2019 coronavirus disease (COVID-19).
Ayon sa PAL at Cebu Pacific, wala pa naman silang pagbabasehan para ikansela ang kanilang flights dahil wala pang inilalabas na pormal na direktiba mula sa pamahalaan.
Kapwa inihayag ng dalawang airlines ang kahandaang sumunod sa travel ban subalit kailangan anila na mayroong implementing rules and regulations mula sa Civil Aeronautics Board.
Una nang ini-anunsyo ng Malacañang ang travel ban sa Gyeongsang Province ng South Korea kung saan nagmula ang mga kaso ng COVID-19.
Itinaas na ng Taiwan sa pinakamataas na lebel ang pagtugon sa pagkalat ng 2019 coronavirus disease (COVID-19).
Mismong si Taiwanese Prime Minister Su Tseng Chang ang nag-anunsyo sa desisyon sa isang cabinet meeting.
Bunga ito ng kalat na kaso ng community transmission ng COVID-19.
Umabot na sa 32 ang naitalang kaso ng COVID-19 sa Taiwan, isa rito ang napaulat na nasawi.
Isa pang Pinoy sa Hong Kong ang nagpositibo sa 2019 coronavirus disease (COVID-19).
Ayon kay Consul General Raly Tejada, nasa isang ospital na ngayon ang 29-taong gulang na Pinay.
Batay sa nakuhang impormasyon ng konsulado, nakarecover na sa kanyang lagnat ang Pilipina at nais nitong dalhin ng konsulada sa ospital ang kanyang mga personal na kagamitan.
Samantala, sinabi ni Tejada na posibleng makalabas na sa ospital ang unang Pilipino na nag positibo sa COVID-19 sa Hong Kong.
Inaasahang palalakasing muli ni Justin Brownlee ang San Miguel Alab Pilipinas sa pagbabalik Pilipinas
Sa pagbabalik ni Brownlee, malaki umano ang pag-asa ng Alab squad na muling masungkit ang ikalawang kampeonato nito sa ASEAN Basketball League (ABL).
Maliban kay Brownlee, pasok rin sa Alab ang dating Columbian Dyip at Magnolia import na si John Fields.
Si Fields ang isa sa mga nanguna sa finals appearance ng Singapore Slingers sa nagdaang season ng ABL.
Tumindi pa ang karahasan sa India sa pagitan ng Hindus at Muslims.
Nag-ugat ang karahasan sa kontrobersyal na citizenship amendment act na nagbibigay ng amnestiya sa mga ilegal na non-Muslim immigrants mula sa Muslim majority countries.
Mistulang warzones ang mga lugar kung saan nagkakaroon ng riot.
Umabot na sa 26 ang nasawi sa mga riot at halos 200 iba pa ang sugatan.
Arestado sa buy-bust operations ang isang dating model ng men’s magazine.
Kinilala ng Philippine Drug Enforcement Agency (PDEA) ang inarestong modelo na si Charlene “Cindy” Mecayer ng Greenwood Executive Village, Barangay Sta. Ana, Taytay, Rizal.
Nakuhanan ng shabu si Mecayer na nagkakahalaga ng P68,000, tatlong piraso ng ecstasy tablet, P500 buy-bust money at mga drug paraphernalia.
Pinagbigyan ng Korte Suprema ang petition for writ of amparo ng asawa ng napatay na miyembro ng New People’s Army (NPA).
Naglabas ng permanent protection order ang Korte Suprema laban sa Philippine National Police (PNP) para kay Vivian Sanchez at sa dalawang anak nito.
Sa kanyang petisyon, sinabi ni Sanchez na tinitiktikan sya ng mga pulis at pinagbabantaang sasampahan ng kaso.
Sa botong 8-5-1, sinabi ng Korte Suprema na mayroong matibay na ebidensya na minomonitor ng PNP ang galaw ng pamilya ni Sanchez dahil sa relasyon nito sa isang hinihinalang miyembro ng NPA.