DWIZ 882

Pinagbawalang makapasok sa Jeddah, Saudi Arabia si Cong. Benny Abante Jr.

Ayon kay Abante, hindi na sila pinasakay sa kanilang flight patungo ng Jeddah mula sa Dubai International Airport matapos matanggap ng airline ang advisory ng Saudi Arabia na sinuspinde ang pagpasok ng pilgrims sa kaharian dahil sa 2019 coronavirus disease (COVID-19).

Sinabi ni Abante na tumutulong na ang Konsulado ng Pilpinas para makakuha sya ng provisional visa sa United Arab Emirates (UAE) habang hinihintay nilang matanggal ang ban sa Saudi Arabia.

Opisyal ang biyahe ni Abante sa Jeddah upang makipag-usap sana sa mga Overseas Filipino Workers (OFWs).

Pinag-aaralan na ng National Telecommuncations Commission (NTC) ang liham ng Kamara na nag-aatas sa kanilang mag-isyu ng provisional authority to operate sa ABS-CBN.

Ayon kay NTC deputy commissioner Edgardo Cabarios, bagamat naglabas na ng patnubay hinggil dito ang Department of Justice (DOJ) ay kailangan pa rin nilang mag-ingat sa pag-aksyon.

Nais anya nilang malaman mula sa DOJ kung kailangan pa nilang mag-antay ng magiging aksyon rin ng Senado patungkol sa liham ng Mababang Kapulungan.

Muling nagpaalala ang Food and Drug Administration (FDA) laban sa pagbili ng baby wipes na hindi rehistrado sa ahensya at maaaring nagtataglay ng delikadong kemikal.

Sa website ng FDA, ang mga tinukoy na brand ng baby wipes ay ang “Dong Bang Baby Tender Baby Wipes Fresh Scented” na kulay orange ang pabalat; “Dong Bang Baby Tender Baby Wipes Fresh Scented” na kulay dilaw ang pabalat at ang “Angel Baby Wipes” na kulay pula.

Subalit sa ordinansa naman ng Baguio City, anim na klase ng baby wipes ang kanilang ipinagbawal na maibenta sa syudad.

Ito ay ang Dong Bang, Dong Bang Yao Baby Tender, Family Treasure Baby Tender, Sky Fire Baby Tender, Giggley Baby Wipes at Super Soft Skin Care Wet Towel.

Mariing itinanggi ni Congressman Lourd Allan Velasco ang akusasyon na mayroon silang nilulutong kudeta laban kay House Speaker Allan Peter Cayetano.

Ayon kay Velasco, nais lamang ng mga nagpapakalat ng balita na magkawatak watak ang Kongreso at madiskaril ang legislative agenda ng Pangulong Rodrigo Duterte.

Binigyang diin ni Velasco na iginagalang nya ang pinasok nilang term sharing agreement ni House speaker Allan Peter Cayetano.

Sa Oktubre pa nakatakdang maupo bilang House speaker si Velasco, batay sa term sharing agreement.

Naka amba ang big time rollback sa presyo ng liquefied petroleum gas (LPG) at iba pang produktong petrolyo.

Sa March 1 inaasahang ipatutupad ang rollback sa presyo ng LPG ng mula P3 hanggang P5 kada kilo o P33 hanggang P55 sa kada regular na tangke.

Samantala, naka-amba rin ang malakihang rollback sa presyo ng diesel at gasolina.

Halos piso na kasi ang ibinaba ng presyo ng diesel sa merkado sa unang tatlong araw pa lamang ng trading.

Ang pagbagsak ng presyo ng langis ay bunga pa rin ng pangamba sa covid 19.

Pinaghahanda ng Meralco ang mga consumers sa mas mataas na bayarin sa kuryente ngayong Marso.

Napuna ng Meralco ang tumataas na konsumo sa kuryente ng mga kabahayan dahil sa umiinit nang temperatura.

Ayon sa Meralco, natural lamang na tataas ang bayarin kung mataas rin ang konsumo.

Hindi pa anila kasama sa dito ang paggalaw ng presyo ng kuryente na binibili nila sa mga planta.

Dumistansya ang Malakanyang sa di umano’y planong pagpapatalsik kay House Speaker Allan Peter Cayetano.

Ayon kay Presidential spokesman Salvador Panelo, hindi nakiki-alam ang pangulo sa panloob na usapin ng Kamara maliban kung idulog ito sa kanya para ayusin ang gusot kung meron man.

Sinabi ni Panelo na wala naman syang naririnig na reklamo ng pangulo sa performance ni Cayetano bilang House speaker.

Posible anya na perception lamang ni Cayetano ang sinasabi nyang kudeta laban sa kanya.

Malaking hamon para sa Bureau of Immigration ang pagpapatupad ng travel ban sa Daegu at North Gyeongsang province ng South Korea.

Ayon kay Dana Sandoval, spokesperson ng Bureau of Immigration, tiyak na mahihirapan ang kanilang mga tauhan na matukoy kung sinu-sino sa mga South Koreans na dumarating sa bansa ang galing sa Daegu at North Gyeongsang.

Karamihan anya ay dumadaan sa mga major international airports kayat posibleng sumakay sila ng kotse o regional flights na hindi makikita sa kanilang mga pasaporte.

Sinabi ni Sandoval na posibleng hingan na lamang nila ng certificates of travel ang mga magmumula sa Daegu at North Gyeongsang.

Bagamat ini-anunsyo ng Malakanyang ang travel ban, hindi pa ito ipinatutupad dahil sa kakulangan ng guidelines.

Natagpuan na ng Department of Health Region 7 ang 26 na turistang Korean na nagmula sa Daegu, South Korea.

Ayon kay Director Jaime Bernadas, 14 sa mga turista ang na-trace nila sa Cebu City at 12 sa Lapu-lapu City.

Sinabi ni Bernadas na hindi na nila i-qua-quarantine ang mga Korean tourists dahil dumating naman sila bago pa ini-anunsyo ang travel ban sa Daegu at North Gyeongsang.

Gayunman, tiniyak ni Bernadas na masusi nilang imomonitor ang mga aktibidad at kinaroroonan ng mga Korean tourists.

Sakali anyang may makitaan ng sintomas sa mga ito ay agad na dadalhin sa ospital.