DWIZ 882

Hindi na kakailanganin pang sumailalim sa 14 na araw na quarantine ng mga Pilipinong magmumula sa iba pang mga bansang apektado rin ng coronavirus disease 2019 (COVID-19) tulad ng Macau at South Korea.

Ito ay sakaling magsagawa rin ng repatriation o paglilikas ng mga Pilipino mula sa mga nabanggit na lugar ang pamahalaan.

Paliwanag ni Health Assistant Secretary Maria Rosario Vergeire, iba kasi ang sitwasyon ng mga umuwi mula Wuhan City sa China na siyang epicenter ng COVID-19 at Diamond Princess cruise ship sa Japan.

Ayon kay Vergeire, kanila lamang ituturing ang mga ito bilang persons under monitoring (PUM) at aatasan na sumailalim sa home-based quarantine.

Mahigpit din aniyang imomonitor ng Department of Health (DOH) ang kondisyon ng mga ito.

Suportado ng buong gabinete ni Pangulong Rodrigo Duterte ang pasya nitong kanselahin o ipawalang bisa na ang Visiting Forces Agreement (VFA) sa pagitan ng Pilipinas at Estados Unidos.

Ito ang iginiit ni Presidential spokesperson Salvador Panelo matapos namang sabihin ni Senador Panfilo Lacson na ilang miyembro ng gabinete ang nagpahayag ng agam-agam sa nakaambang termination ng VFA.

Ayon kay Panelo, suportado ng lahat ng miyembro ng gabinete ang mga ipinatutupad na foreign policy ni Pangulong Duterte.

Gayundin ang mga desisyon ng pangulo na may kinalaman sa kanyang foreign policy kabilang ang pagkansela sa VFA.

Una na rin sinabi ng Palasyo na walang plano ang pangulo na magsagawa ng panibagong negosyasyon sa Estados Unidos para sa nabanggit na kasunduan.

Itinalaga ni Pangulong Rodrigo Duterte si Presidential Anti-Corruption Commission chairman Dante Jimenez bilang bagong co-chair ng Inter-Agency Committee on Anti-Illegal Drugs (ICAD).

Batay sa ipinalabas na listahan ng Malakanyang ng mga bagong appointees ni Pangulong Duterte, inappoint si Jimenez sa ICAD noong February 21.

Pinalitan ni Jimenez sa puwesto si Vice President Leni Robredo na magugunitang sinibak makalipas lamang ang dalawang linggo matapos na italaga sa ICAD.

Si Jimenez ang founding chairman ng Volunteers Against Crime and Corruption (VACC) bago naging pinuno ng PACC.

Samantala, kabilang din sa mga bagong appointees ng pangulo si Foreign Affairs Undersecretary for Policy Enrique Manalo na itinalaga bilang bagong permanent representative ng Pilipinas sa United Nations.

Pinalitan ni Manalo si Rodolfo Robles na inilipat naman bilang Philippine Ambassador Extraordinary and Plenipotentiary to Canada.

Pinangalanan din ng pangulo si Abdullah Hashim bilang bagong miyembro ng Bangsamoro Transition Authority gayundin ang pag-apruba sa promosyon ng iba pang mga senior officials ng Philippine National Police (PNP) at Philippine Coast Guard (PCG).

Nagnegatibo ang dalawa sa tatlong Pinoy repatriates na nakitaan ng sintomas ng 2019 coronavirus disease (COVID-19) habang naka-quarantine sa New Clark City sa Capas, Tarlac.

Ito’y ayon kay Department of Health (DOH) Assistant Secretary Maria Rosario Vergeire kung saan, hinihintay pa aniya ang magiging resulta ng isinagawang laboratory test sa isa pa sa mga naturang repatriates.

Hindi na rin aniya kailangang sumailalim sa panibagong pagsusuri para sa COVID-19 ang dalawang nagnegatibo sa virus, ngunit kailangan pa rin silang i-monitor.

Dagdag pa nito, kapwa maayos ang kondisyon ng tatlo habang nasa isang ospital sa Central Luzon.

Magugunitang ang tatlong Pinoy repatriates ay inilipat sa isang ospital mula sa quarantine facility sa New Clark City matapos makaranas ng sore throat at pag-ubo.

Kabilang din ang mga ito sa mahigit 400 Pinoy na inilikas mula sa M/V Diamond Princess cruise ship sa Japan na tinamaan din ng COVID-19.

Dumami ang bilang ng naitalang aksidente sa Metro Manila noong 2019.

Batay sa annual road crash report ng Metropolitan Manila Development Authority (MMDA), umabot sa mahigit 121,000 ang naitalang aksidente sa kalakhang Maynila.

Mas mataas ito kumpara sa mahigit 116,000 na naitala noong 2018.

Kabilang sa mga sasakyang nasasangkot sa mga aksidente ay ang motorsiklo, kotse, jeep, taxi, bus, truck, van at pedicab.

Dahil ditto, sinabi ng Land Transportation Franchising and Regulatory Board (LTRFB) na kinakailangan nang magpatupad ng safety  improvements sa naturang mga lugar upang maiwasan ang mga aksidente.

Hinikayat ng World Health Organization (WHO) ang lahat ng bansa na magdoble-kayod para mapigilan ang lalo pang pagkalat ng 2019 coronavirus disease (COVID-19).

Ayon kay WHO director general Tedros Adhanom Ghebreyesus, naabot na ng sakit ang kritikal nitong estado kung saan nanganganib na itong maging pandemic.

Ngunit hindi aniya ito ang panahon para matakot, sa halip ay pagkakaiisa at pagtutulungan ng lahat ng bansa para ito mapigilan pang makapaminsala ng maraming buhay.