DWIZ 882

Tinanggal sa trabaho ng Philippine Airlines (PAL) ang nasa 300 nilang mga empleyado bilang bahagi ng kanilang business restructuring plan.

Ito ay upang makabawi sa mga nawalang kita bunsod ng mga ipinatupad na travel restrictions sa ilang mga lugar na apektado ng coronavirus disease (COVID-19).

Sa anunsiyo ng PAL, nagpatupad sila ng voluntary separation initiative para sa mga matatagal na nilang mga empleyado at retrenchment process na nakumpleto na noong Huwebes, Pebrero 28.

Tiniyak naman ng PAL na makatatanggap ng mga nararapat na separation benefits, dagdag na trip pass privileges at tulong sa pamamagitan ng career counseling at paghahanap ng bagong trabaho ang mga tinanggal nilang empleyado.

Dagdag ng PAL, patuloy din silang nakatututok sa pangangasiwa at pag-iingat laban sa mga bantang dulot ng COVID-19 gayundin ang pagtulong sa mga Pilipinong magmumula sa mga lugar na apektado ng virus.

Pinag-aaralan na rin ng pamahalaan ang posibleng pagpapatupad ng travel ban sa Japan, Italy at Iran.

Ito ay sa gitna pa rin ng patuloy na pagtaas ng naitatalang kaso ng coronavirus disease (COVID-19) sa mga nabanggit na bansa.

Ayon kay Cabinet Secretary Karlo Nograles, mahigpit na binabantayan ng inter-agency task force on emerging and infectious diseases ang sitwasyon sa Japan, Italy at Iran.

Sinabi ni Nograles, hindi maaaring balewalain ang lagay ng mga Filipino sa mga nabanggit na bansa lalo na sa Iran kung saan mahigit 20 na ang nasasawi dahil sa COVID-19.

Samantala, kinumpirma naman ni Health Secretary Francisco Duque III na ikinukunsidera ng inter-agency task force ang posibleng pagpapatupad ng travel restrictions sa Japan.

Mahigit 50 pulis ang nasampolan sa panibagong balasahang ipinatupad ng PNP Civil Security Group.

Ayon kay CSG Director Ajor General Roberto Fajardo, 30 sa mga ni-reshuffle na mga pulis ay mga commissioned officers sa kung saan colonel ang pinakamataas na ranggo.

17 naman ang non-commissioned officer habang limang non uniformed personnel ang nasibak din bilang bahagi ng internal cleansing campaign

Aminado si Fajardo na kanyang ikinadismaya ang nakarating sa kanyang ulat na ilan sa mga tauhan niya ang sangkot sa katiwalian.

Samantala, ipinag-utos na rin ni Fajardo ang crackdown sa mga hindi awtorisadong security sa mga VIP at mga dayuhan.

May mga bagong ebidensyang hawak ang NCRPO kaugnay sa kaso ng pagpatay kay Bureau of Corrections (BuCor) Legal Chief Atty. Fredric Anthony Santos

Ayon kay NCRPO Director Major General Debold Sinas, nakakuha na sila ng bagong kopya ng CCTV footage mula sa BuCor compound.

Makikita aniya rito ang paglabas ni Santos sa minimum security compound patungo sa Montessori kung saan siya binaril.

Dagdag ni Sinas, hawak na rin nila ang case folders ni Santos na kanilang inaasahang malaki ang maitutulong sa pagresolba sa kaso ng pagpatay dito.

Sa ngayon aniya ay hinihintay pa nila ang pamilya ni Santos para makipag-ugnayan sa mga imbestigador sa kaso.

Magugunitang nasuspinde si Santos matapos humarap sa pagdinig ng Senado kaugnay ng kontrobersiya sa Good Conduct Time Allowance (GCTA) at nakatakda na sanang bumalik sa trabaho sa darating na Marso.

Mas naging agresibo at marahas ang mga Chinese nationals na miyembro ng mga sindikato at gumagawa ng krimen sa bansa.

Ito ang ibinabala ng Anti-Kidnapping Group ng Philippine National Police (PNP) kasunod ng inilunsad na crackdown ng Chinese Embassy laban sa mga Tsino na mayroon nang criminal record sa bansa.

Ayon kay PNP-AKG Spokesperson Police Major Rannie Lumactod, mas lumalakas ang loob ng Tsino na sangkot sa krimen dahil may mga kasabwat ang itong ilang retiradong pulis at sundalo na tumatayong protective agents ng mga sindikato.

Maliban sa pagdukot ng kapwa nila Chinese national, tinitignan din ng PNP-AKG ang posibilidad na sangkot pa ibang krimen ang mga naaarestong Tsino sa bansa.

Batay sa datos ng PNP-AKG, nasa 13 kaso na ang naitalang kaso ng kidnapping na may kaugnayan sa industriya ng Philippine Offshore Gaming Operators (POGO) noong isang taon.

Ikinalugod ng Philippine Drug Enforcement Agency (PDEA) ang pagkakatalaga kay Presidential Anti-Corruption Commission (PACC) Chairman Dante Jimenez bilang co-chair ng Inter-Agency Committee on Anti-Illegal Drugs (ICAD).

Ayon kay PDEA Director General Aaron Aquino, malaki ang mai-aambag ni Jimenez sa kampaniya kontra illegal na droga na droga ng pamahalaan.

Sinabi ni Aquino, may direktang ugnayan ang illegal na droga sa katiwalian na kapwa inilalaban ni Jimenez bilang anti-corruption czar.

Dahil sa pagkakatalaga kay Jimenez, umaasa si Aquino na mas lalo pang mapaiigting at mapapalakas ang kanilang kampanya laban sa illegal na droga.