DWIZ 882

85 mga Pilipino sa ibang bansa ang kumpirmadong nahawaan ng coronavirus disease (COVID-19).

Ito ay batay sa pinakaguling datos ng Department of Health kung saan 80 sa mga ito ang naitala sa Japan.

Ayon kay Health Secretary Francisco Duque III, 70 sa mga kumpirmadong may COVID-19 sa Japan ang nananatili pa ring naka-confine sa mga ospital sa nabanggit na bansa.

Habang 10 na ang gumaling at nakalabas na ng ospital habang walo naman sa mga ito ang nakabalik na ng Pilipinas.

Samantala, may tig dalawa namang kaso ng mga Filipinong nagkaroon ng COVID-19 sa UAE at Hong Kong habang isa sa Singapore.

Sumalang sa sariling commute challenge ang bagong Pangulo ng Toyota Motor Philippines na si Atsuhiro Okamoto.

Sa kanyang facebook post, sinabi ni Okamoto na sa kanyang unang linggo sa Pilipinas naisipan niyang gumawa ng genchi genbutsu o “go and see” at maranasan ang araw-araw na hirap ng mga Filipino commuters.

Ayon kay Okamoto, una niyang sinubukan ang sumakay ng pampasaherong bus saka nag-roundtrip sa MRT.

Pagbaba naman ng MRT sumakay siya sa isang pampasaherong jeep, pumila nang matagal sa UV express atsaka pumara ng tricycle patungong Tondo Manila.

Sinabi ni Okamoto, dahil sa naranasan, kanyang napagtanto na hindi tulad ng Japan at Singapore, hindi kaya ng kasalukuyang mass transport system ng Pilipinas ang dami mga araw-araw na bumibiyaheng commuters.

Dahil aniya rito, nais niyang maging bahagi ang Toyota sa hamon para mapataas pa ang kalidad ng pamumuhay ng mga Pilipino.

Nagpalabas na ng direktiba ang Civil Aeronautics Board (CAB) sa lahat ng mga airlines hinggil sa ipinatutupad na travel restrictions sa South Korea.

Ito ay sa gitna pa rin ng outbreak ng COVID-19 sa nabanggit na bansa.

Ayon sa CAB, agad na epektibo ang kanilang ipinalabas na abiso alinsunod na rin sa travel advisory mula sa Department of Health (DOH) sa pamamagitan ng isang resolusyon ng inter-agency task force for emerging and infectious diseases.

Sakop anila ng travel ban ang lahat ng mga magtutungo ng South Korea mula Pilipinas.

Gayundin ang mga dayuhang manggagaling sa North Gyeongsang Province, Daegu City at Cheongdo County at magtutungo ng Pilipinas.

Exempted o hindi naman kasama sa travel ban ang mga permanent resident ng South Korea, mga mag-aaral at Overseas Filipino Workers na lalagda sa isang written declaration na nagsasaad na nalalaman nila ang sitwasyon.

Habang papayagan namang makapasok ng Pilipinas ang mga Filipino kasama ang kanilang mga dayuhang asawa o anak, permanent resident at diplomatic visa holders na magmumula ng South Korea basta’t dadaan sa screening at quarantine protocols.

Pinabulaanan ni Marinduque Representative Lord Allan Velasco ang ulat na pinangungunahan niya ang isang kudeta laban kay House Speaker Alan Peter Cayetano.

Ayon kay Velasco, patuloy niyang iginagalang ang napagkasunduan nila ni Cayetano kasama si Pangulong Rodrigo Duterte na hatian sa termino sa pagka-house speaker.

Wala aniya siyang planong sirain ang nabanggit na kasunduan.

Iginiit ni Velasco na posibleng ipinalulutang lamang ang nabanggit na isyu para hatiin ang mga kongresista, magulo ang kanilang mandato at madiskaril ang isinusulong na legislative agenda ng Pangulo.

Una nang sinabi ni House Speaker Cayetano na nagpaplano ng kudeta laban sa kanya si Velasco kung saan ginagamit nito ang isyu sa franchise renewal ng ABS-CBN at pambansang pondo.