DWIZ 882

Mariing kinondena ng Commission on Human Rights (CHR) ang panibagong kaso ng pagpaslang sa isa na namang miyembro ng Hudikatura.

Ito’y makaraang tambangan hanggang sa mapaslang ng hindi pa tukoy na salarin si Atty. Bayani Dalangin sa loob mismong opisina nito sa Talavera, Nueva Ecija kahapon.

Ayon kay Atty. Jackie De Guia, tagapagsalita ng CHR, nakababahala na ang tumataas na bilang ng mga kaso ng pagpatay lalo na sa mga taong gumaganap lamang ng kanilang mandato sa ilalim ng batas.

Nakapanghihinayang ayon kay De Guia na ang target ngayon ng mga walang habas na pagpatay ay iyong mga tao na nagtataguyod ng patas na paglilitis sa mga may sala at nagtatanggol sa mga inosente.

Dahil dito, umapela ang CHR sa Philippine National Police (PNP) na bilisan ang ginagawang imbestigasyon upang agad matugis ang may sala at mapanagot ito sa lalong madaling panahon.

Umaasa ang kampo ni Vice President Leni Robredo na mareresolba na ang lahat ng kinahaharap na isyu ng kampanya kontra iligal droga ng pamahalaan.

Kasunod ito ng pagkakatalaga kay Presidential Anti-Corruption Commission chairman Dante Jimenez bilang bagong co-chair ng Inter-Agency Committee on Anti-Illegal Drugs (ICAD).

Ayon kay Atty. Barry Gutierrez, tigapagsalita ng pangalawang pangulo, sa maikling panahon na pag-upo ni Robredo bilang ICAD co-chair, inilatag nito ang mga bagay na maaaring ayusin o mas palakasin para lalo anitong maging epektibo ang kampanya kontra iligal na droga.

Magandang panahon na aniya ito para tugunan ang mga nabanggit na hamon gayundin ang maipatupad ang mga naging mungkahi ng bise presidente.

Dagdag ni Gutierrez, umaasa rin silang magiging bukas sa tinatawag na “health approach” sa isyu ng iligal na droga ang bagong liderato ng ICAD.

Magugunitang matapos sibakin bilang ICAD co-chair, naglabas ng isang komprehensibong ulat si Robredo kung kanyang sinabi na tanging isang porsyento lamang ng suplay ng iligal na droga at drug money ang nakumpiska ng pamahalaan sa loob ng tatlong taon.

Welcome sa pamunuan ng Philippine National Police (PNP) ang paglakatalaga ni Presidential Anti-Corruption Commission (PACC) chairman Dante Jimenez bilang co-chairman ng Inter-Agency Committee on Illegal Drugs (ICAD).

Ayon kay PNP spokesman P/BGen. Bernard Banac, isa itong magandang hakbang upang mapaigting ang war on drugs ng pamahalaan.

Sinabi pa ni Banac na bilang anti-corruption czar, malawak na ang karanasan ni Jimenez sa criminal justice system kaya’t alam na nito kung paano sosolusyunan ang problema sa iligal na droga lalo’t mai-u-ugnay din ito sa katiwalian.

Sa huli, sinabi ni Banac na tiwala sila na malalabanan na ngayon ng pamahalaan ang iligal na droga at katiwalian ng sabay nang may ibayong dedikasyon at gabay mula sa bagong ICAD co-chair.

Patuloy na umaapela sa publiko ang Bureau of Fire Protection (BFP) na iwasan ang anumang mga maling gawain na pagmumulan ng sunog.

Ito’y ayon kay BFP spokesman F/SSupt. Gerrandie Agonos kasunod na rin ng pagsisimula ngayong araw fire prevention month.

Sa panayam ng DWIZ kay Agonos, karaniwan kasi sa mga madalas pinagmumulan ng mga sunog ang octopus connection sa kuryente gayundin ang pagkakaroon ng short circuit ng appliances sa mga bahay at establisyemento.

Kasunod nito, ipinaalala rin ng BFP sa publiko na laging tandaan ang PADRE o ang Prevention, Awareness, Detection, Reaction at Escape o Evacuate sa tuwing magkakaroon ng sunog.

Maghahain ng petisyon bukas sa Korte Suprema ang ilang dati at kasalukuyang Senador para linawin ang poder nito sa pagbasura sa lahat ng mga tratado o kasunduang pinasok ng Pilipinas sa iba’t ibang mga bansa.

Ito’y sa harap na rin ng debate kung kailangan ba talagang may basbas ng Senado ang ginawang pagkansela ng ehekutibo sa pag-iral ng Visiting Forces Agreement VFA.

Ayon kay Senate President Vicente “Tito” Sotto III, kasama niyang tutulak sa Supreme Court para ihain ang declaratory relief and mandamus sina Senator Panfilo Lacson at Richard Gordon.

Kasama rin nila Sotto sa maghahain ng petisyon sa High Tribunal ang mga dating senador na sina Francisco Tatad at Rodolfo Biazon.

Ayon sa Senate President, sakaling paboran ng Korte Suprema ang Senado, kanila nang uumpisahan ang pagrepaso sa VFA para mapakinabangan pa lalo ng Pilipinas ang alyansa nito sa Amerika.

Aminado ang Bureau of Fire Protection (BFP) na kulang pa rin ang kanilang mga kagamitan para tugunan ang pangangailangan ng publiko para apulahin ang sunog.

Sa panayam ng DWIZ kay BFP spokesman F/SSupt. Gerrandie Agonos, sa kabuuan aniya ay mayruon lamang 2,827 fire engines meron ang BFP sa buong bansa.

Malayo pa aniya ito para sa “ideal” na dami ng fire trucks para sa BFP na nasa 3,606.

Gayunman, malaking tulong pa rin ani Agonos ang mga fire engines na nasa pag-iingat ngayon ng mga lokal na pamahalaan gayundin ng iba’t ibang fire brigade volunteers.

 Dapat po ay mayroong isang fire truck sa bawat 28,000 na bilang ng population sa isang lugar. So kung sa isang lugar po ay may 280,000 na tao, dapat po ay may 10 na fire trucks doon,” ani BFP spokesman F/SSupt. Gerrandie Agonos.

Maliban sa mga kagamitan at sasakyan, inamin din ni Agonos na malaki rin ang kakulangan ng BFP sa mga tauhan.

Kaya naman hinihikayat ni Agonos ang mga kabataan lalo na iyong mga naka-graduate na ng Highschool para magsanay at maging isang bumbero.

Sa kabuuan, ang bilang pa lamang namin ay mahigit na 28,000. Kung titignan natin ang bilang ng fire trucks nationwide, ang ideal number ay 39,000 (bumbero,” dagdag pa ni Agonos.

Umarangkada na ang kampaniya ng Bureu of Fire Protection (BFP) ngayong unang araw ng Marso, hudyat ng pagsisimula ng Fire Prevention Month.

Sa Metro Manila, sinimulan na ito ng motorcade ng may 242 fire engines mula sa iba’t ibang BFP units, local government units (LGUs) at mga fire volunteer brigade sa buong Metro Manila.

Pinangunahan ni BFP-NCR director Fire C/Supt. Wilberto Rico Neil Kwan Tiu ang isang programa kasabay ng paglulunsad ng tema ngayong taon “matuto ka, sunog iwasan na”.

Nagsimula ang programa sa Rotunda ng Mall of Asia Arena sa Pasay City at binaybay ng mga ito ang kahabaan ng Northbound lane ng Edsa hanggang sa makarating sa Quezon Memorial Circle.

Target din ng BFP-NCR na ungusan ang nasungkit na titulo ng Atoka Fire Department sa Amerika nuong 2012 na naitala sa Guinness World Record bilang pinakamaraming fire trucks na lumahok sa isang parada na may 220.

Nailibing na ang ina ni Vice President Leni Robredo na si ginang Sally Gerona.

Ayon kay Atty. Barry Gutierrez, tigapagsalita ng pangalawang pangulo, inihatid sa kanyang huling hantungan si nanay Sally sa Eternal Gardens sa Naga City Camarines Sur kahapon, Pebrero 29.

Aniya, 3 p.m. kahapon nang magsimula ang funeral procession sa labi ni nanay Sally mula Eternal Chapels patungong Minor Basilica of the Our Lady of Peñafrancia para sa isang misa.

Saka ito inihatid sa Eternal Gardens at nailibing pasado 5:30 p.m. kahapon.

Pebrero 22 nang kumpirmahin ni VP Robredo ang pagkasawi ng kanyang nanay Sally.