Patay ang isang mataas na opisyal at head extortionist ng New People’s Army (NPA) makaraang makipagbakbakan sa militar sa Bukidnon.
Kinilala ni Army’s 3rd Infantry Battalion Commander Lt/Col. Oscar Partuza ang nasawing rebelde na si Eduardo Arnado alias ‘Choy’ na deputy secretary ng Guerilla Front 53 at siyang pasimuno umano ng pangingikil ng NPA sa North Cotabato, Davao del Sur, at Bukidnon.
Nangyari ang bakbakan nuong Biyernes sa Sitio Lamparuc, barangay Sampagar bayan ng Damulog kasunod ng ikinasang security operations ng militar bunga ng natanggap na tip hinggil sa presensya ng armadong grupo sa lugar.
Tumagal ng sampung minuto ang bakbakan kung saan nagpulasan na ang mga rebelde sa iba’t ibang direksyon at iniwang nakahandusay ang kanilang lider na wala nang buhay.
Narekober ng militar ang samu’t saring mga armas at bala gayundin ang mga basyo nito at ilang mga subersibong dokumento na iniwan ng mga rebelde.