Nanawagan ang isang grupo sa pamahalaan na palayain na ang mga preso na magaan lamang ang sentensya, mga may sakit at matatanda nang bilanggo.
Hinikayat ng grupong Kapatid ang pamahalaan na gayahin ang ginawa ng Iran nang palayain nila ang mahigit sa 50,000 bilanggo sa harap ng banta ng COVID-19.
Binigyang diin ng grupo na hindi magiging solusyon ang lockdown sakaling mapasok na ng COVID-19 ang mga bilangguan.
Nakipagbati si House Speaker Allan Peter Cayetano kay dating Pangulong Gloria Macapagal Arroyo.
Ayon kay Cayetano, hindi kailanman naging personal para sa kanya ang mga pagbatikos n’ya sa noo’y Pangulong Arroyo.
Nagpahayag ng pag-asa si Cayetano na magsisilbing tulay sa pagitan ng kani-kanilang pamilya ang binuksan nilang bridgeway na nagdudugtong sa Mitra at North Wing Buildings sa House of Representatives.
Matatandaan na isa noon si Cayetano sa mga nangungunang kritiko ni Arroyo bilang Presidente at nanguna pa sa paghahain ng impeachment case noong 2005.
Nagbabala ang Department of Health (DOH) na hindi makakaiwas ang Pilipinas sa community level transmission ng COVID-19.
Ayon kay Health Secretary Francisco Duque III, mas lalawak ang lugar ng mga komunidad na apektado ng COVID-19 sa malapit na hinaharap.
Sinabi ni Duque na inilagay sa code red sublevel 1 ang bansa matapos magkaroon ng isang local transmission.
Agad aniya itong itataas sa sublevel 2 sa sandaling magkaroon ng karagdagang community transmissions kung saan isususpinde na ang pasok sa lahat ng paaralan at posibleng maging sa trabaho.
Kasabay nito, sinabi ni Duque na nakahanda silang magpatupad ng localized lockdown.
Maaari anya itong isang barangay o isang buong bayan, depende sa dami ng mga maapektuhan.
Ibinasura ng Dept. of Education (DepEd) ang panukala na isara na ang school year at otomatiko na lamang ipasa ang lahat ng mag aaral sa harap pa rin ito ng banta ng COVID-19.
Ayon kay Education Secretary Leonor Briones, hindi s’ya papayag sa mass promotion dahil labag ito sa objectives ng DepEd.
Pagdating sa final exams, sinabi ni Briones na maaari naman itong isagawa ng paunti-unti at hindi biglaan ang lahat ng estudyante.
Maaari rin aniyang ituloy ang mga graduation rites kung matitiyak ng school administrations na kaya nilang ipatupad ng mahigpit ang mga regulasyon ng Dept. of Health sa pagkontrol ng dami ng tao.
Una rito, sinuspinde ng Pangulong Rodrigo Duterte ang klase sa NCR hanggang March 14.
Sisitahin ng mga pulis ang mga kabataang makikitang gumagala sa matataong lugar tulad ng internet cafe’s, malls at iba pa.
Ayon kay Major General Debold Sinas, hepe ng PNP NCRPO, kaya sinuspende ang klase sa mga paaralan ay upang manatili sa kanilang mga tahanan ang mga estudyante at hindi para gumala.
Sinabi ni Sinas na pauuwiin lamang naman ng mga pulis ang mga sisitahin nilang kabataan.
Plano rin anya nilang magpatupad ng curfew hours para sa mga kabataan subalit depende ito sa panuntunan ng bawat LGU.
Hindi tataas ang presyo ng mga pangunahing bilihin sa susunod na 60 araw.
Ipinatutupad na ng Dept. of Trade and Industry (DTI) ang price freeze sa lahat ng pangunahing bilihin kasunod ng deklarasyon ng state of public health emergency dahil sa COVID-19 na mayroong bisa sa 60 araw.
Nauna nang nagpatupad ng price freeze ang DTI sa presyo ng mga mahahalagang gamot o medisina sa kasagsagan ng COVID-19 outbreak.
Posibleng ideklara na ng PAGASA ang pagsisimula ng tag-init sa huling linggo ng Marso.
Ayon sa PAGASA, bagamat nararamdaman pa sa ngayon ang epekto ng hanging Amihan lalo na sa umaga unti-unti na itong mawawala at napapalitan ng hangin mula sa Pacific Ocean sa Silangan na nagdadala ng mainit at maalinsangang panahon.
Dahil dito, pinaghahanda na ng PAGASA ang lahat sa mas mainit pang panahon pagpasok ng Abril.
Isa pang bulkan ang nagpapakita ng mga palatandaan ng posibleng pagsabog.
Ayon sa PHIVOLCS, nakitaan nila ng abnormal condition ang Mount Kanlaon sa Negros Oriental kaya’t inilagay na nila ito sa alert level one mula sa dating alert level zero.
Napag-alaman na 80 volcanic earthquakes ang naitala ng PHIVOLCS mula noong March 9.
Sa ilalim ng alert level 1, ipinagbabawal ang pagpasok sa apat na kilometrong radius permanent danger zone.
Aprubado sa ikatlo at huling pagbasa ang panukalang batas na lumilikha ng bagong departamento na nakatutok lamang sa OFW’s.
173 kongresista ang bumoto pabor sa house bill 5832 na kilala rin sa tawag na Dept. of Filipinos Overseas (DFO) act samantalang 11 ang tumutol.
Sakaling maging batas, mapupunta sa DFO ang lahat ng gawain ng POEA, Office of the Undersecretary for Migrant Affairs ng DFA at lahat ng overseas labor offices sa ilalim ng DOLE.
Ang DFO na rin ang mangangasiwa sa OWWA at sa lahat ng attached agencies nito.
Sa ilalim ng panukala, ang lahat ng empleyado sa mga masasakop nitong tanggapan ay malilipat lamang sa DFO.
Tatlo pang dayuhan ang nagpositibo sa COVID-19 matapos na bumisita sa Pilipinas.
Dahil dito, umabot na sa 6 ang kumpirmadong kaso ng mga dayuhang mayroong travel history sa Pilipinas.
Ang mga nadagdag ay isang Japanese national na nanatili sa Pilipinas ng 7 hanggang 9 na araw isang Singaporean national na nanatili sa bansa ng tatlong araw at isang South Korean na mayroong extensive travel history subalit nagpositibo lamang nang manggaling ito sa Pilipinas.