DWIZ 882

Bumaba ng 13% ang sumasakay sa LRT.

Ayon kay LRTA Spokesperson Hernando Cabrera ang pagbaba ng bilang ng pasahero ay malinaw na dahil sa banta ng COVID-19.

Sinabi ni Cabrera na mula sa 132,000 na pasahero noong Enero bumaba ito sa 114,000 nitong linggo.

Posibleng sa huling linggo ng Marso opisyal nang ideklara ng PAGASA ang dry season o panahon ng tag-init.

Ayon sa PAGASA hindi pa kasi ngayon tuluyang nawawala ang northeast monsoon o ang nagdadala ng malamig na hangin sa bansa.

Gayunman unti-unti na rin umanong nararamdaman ang mainit na panahon dahil sa karaniwang nararanasan ang mainit na temperatura simula abril.

Noong nakaraang taon, Marso 22 nang pormal na ideklara ng PAGASA ang dry season.

Pinagsusuot na ng face mask ng Catholic Bishops’ Conference of the Philippines (CBCP) ang lahat ng mga Pari at Lay Ministers kapag magbibigay ng komunyon.

Ito ay nakapaloob sa inilabas na bagong guidelines ng CBCP na susundin ng simbahan bilang pag-iingat sa pagkalat ng coronavirus disease (COVID-19).

Batay sa nilagdaang kalatas ni CBCP Pres. Archbishop Romulo Valles, tuloy pa rin ang pagbibigay ng komunsyon sa mga mananampalataya ngunit ito ay tatanggapin na lamang sa pamamagitan ng kamay.

Mahigpit ding ipinaalala na dapat ay mag-sanitize ng kamay ang mga pari o lay minister bago at pagkatapos ng pagbibigay ng komunyon.

Nakasaad din sa alituntunin na hangga’t maaari ay iwasan muna ang malakihang pagtitipon batay na rin umano sa direktiba ng DOH.

Lusot na sa ikatlo at huling pagbasa ng Kamara ang motor vehicle road user’s tax.

Sa botong 239 na pumabor, limang hindi sumang-ayon habang isa ang abstain, naaprubahan ang house bill 6136.

Layon ng panukalang batas na madagdagan ang binabayarang buwis depende sa gross vehicle weight ng mga sasakyan.

Inaasahang makakalikom ng P210-B ang pamahalaan kapag ito ay tuluyan nang naging batas.

Ilalaan ang malaking bahagi ng kikitain sa public utility vehicle (PUV) modernization program.

Nanindigan si Sen. Richard Gordon na tuloy ang imbestigasyon ng Senado hinggil sa mga kontrobersya na kinasasangkutan ng Philippine Offshore Gaming Operator (POGO).

Ito’y sa kabila umano ng ginagawang pag-depensa ni Pangulong Rodrigo Duterte sa industriya ng POGO sa bansa.

Ayon kay Gordon, Chairman ng Senate Blue Ribbon Committee, tuloy ang imbestigasyon ng kaniyang komite sa mga katiwalian, money laundering at iba pang krimen na may koneksyon sa POGO industry.

Sa katunayan aniya ay nagtakda pa ang komite ng panibagong pagdinig bukas Marso 12 para silipin ang epekto ng POGO sa bansa.

Iginiit ni Gordon na hindi niya maaaring itigil ang pag-iimbestiga sa POGO dahil bukod sa ito aniya ay in aid of legislation ay nais din nilang maiparating sa publiko at sa Pangulo na hindi maganda ang idinudulot sa bansa ng operasyon nito.

Una rito sinabi ng Pangulo na walang dahilan para ipatigil ang POGO sa bansa dahil malinis ang operasyon nito at walang anomalya.

Panahon na umano para ipatupad ang batas para sa “telecommuting” o alternatibong workplace sa mga empleyado.

Ito ang iginiit ni Quezon City Rep. Alfred Vargas sa gitna ng banta ng COVID-19.

Ayon kay Vargas, dapat ay magkaroon na ng ibang lugar kung saan maaaring dalhin ng isang manggagawa ang kaniyang trabaho gaya sa tahanan gamit ang telecommunications o computer technology.

Sinabi ni Vargas na sa pamamaraan aniya na ito mas makasisiguro ang mga empleyado na sila ay malayo sa posibleng exposure ng virus kung sila ay mananatili na lamang sa kanilang bahay.

Paliwanag pa ni Vargas, bagama’t ang orihinal na layunin ng kaniyang iniakdang panukalang batas ay para tugunan ang problema sa matinding trapiko sa Metro Manila, maaari rin aniya itong magamit para maiwasan ang pagkalat ng COVID-19 sa bansa.