DWIZ 882

Aabot sa mahigit 350,000 accounts ng ride-hailing app na Grab ang kanilang sinuspinde dahil sa paggamit ng mga pekeng pangalan noong 2019.

Ito, ayon sa head ng Grab Philippines na si Brian Cu, ay upang mapigilan ang anumang uri ng panloloko sa kanilang app.

Nasa halos 900 users na rin, ani cu, ang kanilang sinuspinde ngayong taon dahil sa kaparehong paglabag.

Dagdag pa ni Cu, bukod sa suspensiyon, naka-ban din ang nasa 125,000 pasahero at customer dahil naman sa labis na ride at order cancellations, paggawa ng maraming Grab accounts, pagbibigay ng hindi makatarungang rating sa mga drivers at iba pang pandaraya.

Mino-monitor din aniya nila ang nasa mahigit 100,000 users dahil naman sa pagiging abusado, pagkabigong magbayad ng tamang pasahe, overloading, at paglalagay ng maling pick-up point.

7 na ang kumpirmadong kaso ng COVID-19 sa lungsod ng San Juan.

Ito mismo ang kunumpirma ni San Juan City Mayor Francis Zamora sa isang forum ngayong umaga.

Kabilang ang 7 kaso sa 33 kumpirmadong COVID-19 cases sa bansa, na una nang ini-anunsyo ng Department of Health (DOH).

Ayon kay Zamora, 4 sa 7 COVID-19 case sa San Juan ay bumisita rin sa prayer hall sa Greenhills —–lugar na pinuntahan din ng mga nauna nagpositibo sa virus.

May travel history naman aniya sa Bali, Indonesia ang dalawa sa mga ito habang iniimbestigahan pa ang isa pa sa mga kaso.

Ayon sa Alkalde, kasalukuyan silang naka-confine sa iba’t-ibang ospital ngunit nasa “stable condition” naman aniya ang mga ito.

Mas maikli umano ang running time ng mga locally-developed test kits para sa COVID-19.

Ayon kay Food and Drug Administration (FDA) Director General Eric Domingo, kaya ng mga test kits na dinevelop ng mga scientist mula sa University of the Philippines (UP),na maglabas ng resulta sa loob lamang ng dalawang oras. Lubhang mabilis ito kaysa sa 24 oras na running time ng mga testing tool na nagmumula sa Japan at kasalukuyan ding ginagamit na pang-diagnosed sa COVID-19 sa bansa.

Magugunitang kahapon lamang ay inaprubahan na ng FDA ang paggamit ng mga locally-developed test kits na gagamitin na pang-detect sa mga kumpirmadong kaso ng COVID-19.

Ayon pa kay Domingo, mas mura ang mga ito at nagkakahalaga lamang ng P1,500, kumpara sa mga imported kits na nagkakahalaga ng P20,000 hanggang P30,000.

Samantala, nagbabala naman si Domingo sa publiko laban sa pagbili ng mga hindi otorisadong test kits.

Paalala nito, tanging ang Research Institute for Tropical Medicine (RITM) lang at ang UP ang mayroong mga otorisadong testing centers para sa COVID-19 sa bansa.

Dumulog ang grupong National Federation of Tourist Transport Service Cooperatives sa Kamara para hilingin na imbestigahan ang pagpayag ng Land Transportation Franchising and Regulatory Board (LTFRB) na makapag-operate ang mga travel at rent-a-car companies nang walang kaukulang regulasyon.

Ayon kay Atty. Cesar Evangelista, legal counsel ng grupo, hindi patas para sa hanay ng mga regulated transport service cooperatives ang operasyon ng mga kumpanyang sakop ng ipinalabas na circular ng LTFRB dahil hindi aniya kumpleto ang kanilang license to operate.

Sinabi rin ni Evangelista na bukod sa pagiging tourist transport, nagsisilbi rin umano itong shuttle services na mga private companies gaya ng Philippine Offshore Gaming Operator (POGO) nang hindi gumagamit ng certificate of public convenience.

Bukas naman umano ang house committee on cooperatives development para maimbestigahan ang inihaing reklamo ng grupo.