Tahasang kinondena ng mga grupo ng airsofter ang paggamit ng kampo ni Senador Risa Hontiveros ng kanilang mga litrato kaugnay ng naganap na pamamaril sa isang paaralan sa Tacloban City.
Ayon sa “PMC Cenger Group,” isang live-action role-playing, o LARP, airsoft group, wala silang anumang kaugnayan sa internet-based extremist group na “764,” na may koneksyon umano sa mga menor-de-edad na shooter sa insidente.
Nabatid na parody ang logo at pangalan ng Cenger ng na-disband na Russian private military contractor na Wagner Group, na itinatag ng yumaong mercenary leader na si Yevgeny Prigozhin.
Gayunman, ipinukol ng Cenger sa pahayag nito na isa lamang itong hobbyist airsoft group na binubuo ng mga indibidwal na mahigpit na tumatalima sa batas, lalo na pagdating sa paggamit ng mga replica firearms na ginagamit sa larong airsoft.
Bagaman naiintindihan ng grupo na nagkamali ang research team ni Hontiveros, iginiit nito na may bigat ang binitawang salita ng senador, at nakasira ito sa reputasyon ng isang lehitimong sports group, lalo na sa mga miyembro nito, at maging sa malawak na airsoft community.
Kinondena rin ng Kilusang Setyembre Bente Uno ang paggamit ng kampo ni Sen. Hontiveros sa naturang LARP group, at sa correspondent nito na si Dominick Guzman, na isa ring airsofter.
Ayon sa KS21, isang hamak na multimedia arts student ng De La Salle University Dasmariñas si Guzman, at wala ring anumang kinalaman sa 764.
Mariin ding kinokondena ng KS21 ang mass school shooting sa Tacloban kahit naiintindihan nito ang paghahangad ng hustisya sa mga biktima ng naturang insidente.
Dagdag pa ng grupo, nakasira ang naging presentasyon ni Hontiveros sa pagdinig ng Senado hindi lamang sa reputasyon ng Cenger kundi pati na rin sa college scholarship ni Guzman.
Gayunman, bukas ang Cenger at KS21 na makipag-ugnayan sa tanggapan ni Hontiveros upang linisin ang mga pangalan nito.
Samantala, sinagot ni Hontiveros ang pagkondena ng Cenger matapos gamitin ng kanyang research team ang mga litrato ng grupo sa pagdinig ng Senado sa Tacloban mass school shooting.
Aminado si Hontiveros na mali ang paggamit ng mga litrato ng Cenger sa pagdinig, ngunit iginiit din niya na dapat imbestigahan ang isang indibidwal na posibleng nakipag-usap sa isa sa mga menor-de-edad na shooter matapos ang insidente.
Bagaman hindi pinangalanan ng senador ang naturang indibidwal, ibinunyag ni Guzman na posibleng nakasama siya dahil marami siyang post online na kumo-kondena sa naturang pamamaril, at posibleng siya o isa sa kanyang mga online contacts ang nag-comment sa post ng isa sa mga shooter.
Gayunman, tahasang kinondena ni Guzman ang kanyang pagkakasangkot sa imbestigasyon ni Hontiveros, at sinabing “walang basehan” at “nakakapanira” ang umano’y kaugnayan niya sa insidente. | Sa panulat ni Anjo Riñon
