DWIZ 882

Pinag-iingat ng National Privacy Commission (NPC) ang publiko laban sa paghahayag ng pagkakakilanlan o anumang personal na impormasyon ng mga persons under investigation (PUIs) o nagpositibo sa 2019 coronavirus disease (COVID-19).

Ayon kay Privacy Commissioner Raymund Liboro, masama ang maaaring maging implikasyon kapag naisapubliko ang pagkakakilanlan ng mga PUIs o pasyenteng nagpositibo sa sakit.

Ani Liboro, posibleng maghatid ito ng takot sa publiko na magtungo sa ospital para magpasuri kahit pa may nararamdaman nang sintomas ng virus.

Giit ni Liboro, mahalaga rin na maingatan ang impormasyon at pagkakakilanlan ng mga taong naapektuhan ng sakit.

Gaya aniya ng ginagawa ng Department of Health (DOH) na piling impormasyon lamang ang inilalabas para rin sa kaalaman ng publiko.

Umapela ang Malacañang sa publiko ng kooperasyon at “self-help” para labanan ang pagkalat ng 2019 coronavirus disease (COVID-19).

Ayon kay Presidential Spokesperson Salvador Panelo, dapat magkaroon ang bawat isa ng papel para mapigilan ang pagkalat ng virus sa bansa.

Giit ni Panelo, sa halip na pagdudahan ang kakayahan ng pamahalaan para tugunan ang banta ng sakit, mas mainam aniya na magtulungan na lamang ang bawat isa at suportahan at sumunod sa mga ipinapayo ng mga kinauukulang ahensya ng gobyerno.

Magpapalabas ng bagong panuntunan ang Philippine National Police (PNP) para sa pakikitungo ng mga pulis sa publiko sa gitna ng 2019 coronavirus disease (COVID-19) outbreak.

Ayon kay acting PNP spokesperson, Director for Police Community Relations Maj. Gen. Benigno Durana, bagama’t pinapayuhan ng Department of Health (DOH) ang lahat na umiwas sa mga matataong lugar, hindi maiiwasan ito ng mga pulis dahil trabaho nila ang bantayan ang seguridad ng publiko.

Dahil dito aniya, gumawa na lamang sila ng bagong guidelines para maiwasan ang posibleng exposure sa COVID-19 ng mga pulis sa kabila ng kanilang pagtatrabaho.

Gaya na lang umano ng pagpapatupad ng ‘no-contact’ policy at pag-obserba sa isang metrong distansya ng mga pulis sa matataong lugar.

Una rito, ipinaliwanag ng PNP na hindi sila magpapatupad ng ‘no face mask, no entry’ sa mga himpilan ng pulis upang hindi ito magbigay ng alarma sa publiko.

Hinimok ng Department of Trade and Industry (DTI) ang publiko na huwag mag-panic buying.

Ito’y matapos mapaulat ang pagbili ng bulto-bultong alcohol at mga pagkain ng ilang mamimili sa Metro Manila sa gitna ng pagkalat ng 2019 coronavirus disease (COVID-19).

Ayon kay DTI secretary Ramon Lopez, hindi kailangang mag-panic buying at mag-imbak ng marami dahil sapat ang pagkain at iba pang pangunahing pangangailan.

Mas mabuti aniya kung bibili lamang ng tamang dami ng kailangan para hindi ito masira at makinabang din ang iba pang mamimili.

Samantala, sinabi ni Lopez na sa tingin niya ay hindi pa kailangang magpatupad ng lockdown sa Metro Manila.

Ngunit kung sakali umano na mangyari ito, wala naman aniyang magiging kakulangan sa suplay ng pagkain at iba pang pangangailangan sa araw-araw.