DWIZ 882

5 sa 33 kumpirmadong kaso ng 2019 coronavirus disease (COVID-19) ay mga residente ng Marikina City.

Ito mismo ang kinumpirma ni Marikina Mayor Marcelino Teodoro.

Ayon sa Alkalde, nagpositibo sa naturang virus ang asawa at ilang household workers ng isang Amerikanong una nang nasuring positibo sa COVID-19.

Dagdag pa ni Teodoro, ang naturang Amerikano ay mula sa San Diego sa California na bumalik lamang sa Pilipinas.

Dumaan din aniya ito o nag lay-over sa South Korea bago lumapag sa bansa noong Pebrero 19.

Ika-6 naman aniya ng Marso nang dinala ito sa ospital kung saan na-diagnose itong may pneumonia at tuluyang nakumpirmang positibo sa virus noong ika-9 ng Marso.

Isinailalim na sa lockdown ang Wack-Wack Golf and Country Club sa Mandaluyong City.

Ito’y makaraang magpositibo sa COVID-19 ang isa sa kanilang dayuhang panauhin nang makabalik ito sa Singapore.

Magsasagawa naman ng sanitation at pagdi-disinfect ang Golf and Country Club habang nakasara ang lugar.

Ika-dalawa ng Marso nang magtungo ang dayuhan na inimbitahan ng isang miyembro ng club.

Bagaman hindi gumamit ng locker room ang guest minabuti ng club member na ipaalam sa kanilang pamunuan na nagpositibo ito sa COVID-19 nang umuwi sa Singapore.

Samantala, kasalukuyan nang naka-quarantine ang dalawang caddies na nagsilbi sa miyembro at kasama nitong dayuhan.

Nag-abiso na ang Department of Trade and Industry (DTI) kaugnay sa pagpapatupad ng prize freeze sa mga pangunahing bilihin.

Ito ay kasunod ng pagdedeklara ni Pangulong Rodrigo Duterte ng state of public health emergency dahil sa pagdami ng kaso ng 2019 coronavirus disease (COVID-19) sa bansa.

Sa abiso ng DTI, hindi dapat gagalaw ang presyo ng mga pangunahing bilihin sa loob ng 60 araw.

Kaugnay na rin ito ng madalas na umanong natatanggap na reklamo ng DTI hinggil sa over pricing o mataas na presyo ng mga face mask.

Paalala ng ahensya, P3 hanggang P12 lamang ang Suggested Retail Price (SRP) para sa mga disposable mask.

Samantala, hinimok naman ng DTI ang publiko na isumbong sa kanilang tanggapan ang mga nagpapataw ng mataas na presyo ng face mask at iba pang mga pangunahing bilihin.

Hati ang pananaw ng mga alkalde sa Metro Manila sa panukalang isailalim sa lockdown ang buong National Capital Region (NCR) bilang hakbang para mapigilan ang pagkalat ng coronavirus disease 2019 (COVID-19).

Ayon kay San Juan City Mayor Francis Zamora, maituturing pang kuwestiyonable ang panukala lalu na’t hindi pa aniya ganun kalaki ang bilang ng kaso ng COVID-19 para magpatupad ng lockdown.

Tutol din sa panukala si Makati Mayor Abby Binay dahil masyado pa aniyang maaga para magpatupad ng lockdown.

Bukas naman si Marikina City Mayor Marcelino Teodoro sa pagsasailalim sa lockdown ng Metro Manila pero para lamang sa isang partikular na barangay o siyudad.

Paliwanag ni Teodoro, kailangan lamang matukoy ng mabuti kung anong bahagi ng rehiyon ang dapat i-lockdown at hindi ang buong Metro Manila para maiwasan itong maparalisa.

Pinag-aaralan ng Malakanyang ang pagpapatupad ng four day work week at flexi-work arrangement para sa mga manggagawa sa mga tanggapan ng pamahalaan.

Ayon kay Cabinet Secretary Karlo Nograles, bahagi ito ng ipinatutupad ng mga hakbang ng pamahalaan para mapigilan ang pagkalat ng coronavirus disease 2019 (COVID-19) sa bansa.

Aniya, iminungkahi ito ng Civil Service Commission (CSC) kasunod ng pagpapasuspinde ni Pangulong Rodrigo Duterte sa pasok ng mga estudyante sa buong Metro Manila hanggang Marso 14.

Sinabi ni Nograles, maaari ring i-adopt ng mga employers sa pribadong sektor ang nabanggit na working scheme para maibsan ang posibleng nawawalang kita ng iba’t ibang mga negosyo at industriya dahil sa COVID-19 outbreak.

Isinailalim sa home quarantine ang nasa 40 indibiduwal sa Quezon City matapos magkaroon ng direktang contact sa tatlong residente sa lungsod na nagpositibo sa coronavirus disease 2019 (COVID-19).

Ayon kay Q.C. Mayor JOY BELMONTE, sumailalim na sa medical tests ang mga nabanggit na indibiduwal at ipina-quarantine muna sa kani-kanilang mga tahanan habang hinihintay pa ang resulta ng pagsusuri sa mga ito.

Ani Belmonte, natunton ang mga nabanggit na indibiduwal sa isinagawang ng contact tracing para sa tatlong pasyente na kabilang sa 34  kumpirmadong kaso ng COVID-19 sa bansa.

Samantala, sinabi ng alkalde na kanila nang pinag-aaralan ang pagsasailalim sa lockdown ng Quezon City oras na tumaas pa ang kaso ng COVID-19 sa bansa, partikular sa Metro Manila.

Paliwanag ni Belmonte, itutulad aniya ito sa ipinatupad na lockdown ng Italy, South Korea At China.