DWIZ 882

Nagpalabas ng guidelines ang Department of Education (DepEd) sa ipatutupad na schedule para sa final examination at graduation rites ng mga eskuwelahan.

Ito ay sa gitna ng banta ng coronavirus disease 2019 (COVID-19) na dahilan ng pagkakaantala sa ilang mga aktibidad sa mga paaralan.

Sa abiso ng DepEd, itinakda mula Marso 16 hanggang 20 ang nalalabing final examinations ng mga eskuwelahan sa Metro Manila na gagawing staggered basis.

Layunin nitong mabawasan ang dami ng mga estudyanteng papasok sa kada nabanggit na araw ng pagsusulit.

Habang ang mga eskuwalehan sa labas ng Metro Manila ay maaaring magsagawa ng 4^th quarter examinations mula ngayong araw, Marso 16 hanggang 20 kung saan hahatiin din ang bilang ng mga estudyante.

Dagdag ng DepEd, lahat ng mga kinakailangan pang school requirements matapos ang 4^th quarter exam ay kinakailangan nang gawin bilang home-based assignments.

Samantala, itinatakda naman ang schedule ng graduation o moving up rites mula Abril 13 hanggang 17.

80% na ng mga nakasalamuha ng Filipino-Australian na nagpositibo sa coronavirus disease 2019 (COVID-19) ang natunton na ng mga awtoridad sa Pangasinan.

Ayon kay Dr. Anna De Guzman, Health Officer ng lalawigan, lahat ng mga na-trace na nilang nagkaroon ng contact sa nabanggit na Filipino-Australian ay nananatiling walang sintomas ng COVID-19.

Dagdag ni De Guzman, posible rin aniyang negatibo pa sa virus ang babaeng Filipino-Australian nang magtungo ng pangasinan at nakuha lamang ang infection sa Manila bago bumalik ng Australia.

Binigyang diin naman ni Lingayen Vice Mayor Judy Vargas-Quiocho na nananatiling COVID-19 free ang buong lalawigan ng pangasinan bagama’t hindi pa rin aniya maiiwasan ang takot at panic ng mga tao.

Samantala, hinihintay pa ng lokal na pamahalaan ng lingayen ang resulta ng isinagawang test sa dalawang Overseas Filipino Workers (OFW) at isang balikbayan na kasalukuyang naka-admit sa hindi tinukoy na ospital matapos makitaan ng mga sintomas.

Nagsagawa na ng disinfection ang kumpanyang New San Jose Builders Incorporated (NSJBI) sa pagmamay-ari nilang condominium sa Quezon City.

Kasunod ito ng kumpirmasyong isa sa kanilang residente sa victoria towers ang nagpositibo sa coronavirus disease 2019 (COVID-19).

Ayon sa New San Jose, bumiyahe sa ibang bansa ang nabanggit na residente ng Victoria Tower at agad nagtungo ng ospital pagbalik ng pilipinas kung saan nakitang infected ito ng virus.

Dahil dito, agad anilang dinis-infect ang buong gusali kabilang na ang mga commercial areas.

Dagdag ng New San Jose, nagpatupad na rin sila ng mga precautionary measures tulad ng paglalagay ng mga hand sanitizers at alcohol sa ilang mga bahagi ng gusali.

Pagtitiyak pa ng kumpanya, patuloy ang kanilang pakikipag-ugnayan sa lokal na pamahalaan at mga kinauukulang ahensiya para masiguro ang kaligtasan ng lahat.

Nananatiling suspendido ang pasok sa buong Metro Manila at ilang karatig lalawigan ngayong araw.

Kasunod na rin ito ng deklarasyon ni Pangulong Rodrigo Duterte bilang precautionary measures laban sa pagkalat ng coronavirus disease 2019 (COVID-19).

Maliban sa Metro Manila, wala ring pasok sa lahat ng antas sa mga pampublikong at pribadong paaralan sa buong lalawigan ng Bulacan At Cavite.

Gayundin sa mga bayan ng Cainta at Taytay sa Rizal at Lingayen sa Pangasinan.

Nanawagan ang Manila Water sa kanilang mga customer na iwasan muna ang pagpunta sa kanilang mga business offices dahil sa banta ng 2019 coronavirus disease (COVID-19).

Batay sa abiso ng Manila Water, maaaring namang tumawag sa kanilang hotline number na 1626 kung may nais ilapit na concern o mga katanungan.

Maaari din umanong magpadala ng mensahe sa Facebook page at Twitter ng Manila Water.

Paliwanag ng Manila Water, ang hakbang na ito ay bahagi ng precautionary measures upang maiwasan ang pagkalat pa ng COVID-19.

Posibleng maglabas ng panibagong guidelines ang Catholic Bishops Conference of the Philippines (CBCP) na ipatutupad sa mga simbahan laban sa 2019 coronavirus disease (COVID-19).

Ayon kay Fr. Dan Cancino, executive secretary ng CBCP health care, magsasagawa sila ngayon ng pulong para talakayin ang mga hakbang na maaaring gawin para maingatan ang mga nagsisimba.

Kasabay nito hinikayat ni Cancino ang publiko na sundin ang naunang panuntunan na inilabas ng CBCP.

Aprubado na ng Food and Drug Administration (FDA) ang paggamit ng 2019 coronavirus disease (COVID-19) test kits na gawa ng mga local scientist.

Ayon kay FDA Director General Rolando Enrique Domingo, makatutulong ang testing kits para ma-accomodate ang mga pasyente na makikitaan ng sintomas ng COVID-19.

Gawa ng scientist mula sa University of the Philippines-National Institute of Health ang naturang mga testing kit.

Pinondohan naman ng Department of Science and Technology (DOST) ang development ng naturang kit.

Kanselado na ang nationwide simultaneous earthquake drill na isasagawa sana sa unang bahagi ng taon.

Ito’y bilang tugon sa deklarasyon ng national state of public health emergency sa bansa dahil sa 2019 coronavirus disease (COVID-19).

Nakatakda sanang gawin sa March 12, alas-2 ng hapon ang 1st quarter earthquake drill.

Sa ngayon ay wala pang itinakdang petsa ang Office of the Civil Defense (ocd) kung kailan ililipat ang aktibidad.