DWIZ 882

Inabisuhan ng Embahada ng Pilipinas sa Netherlands ang mga Pilipino kaugnay sa operasyon ng kanilang tanggapan sa gitna ng banta ng 2019 coronavirus disease (COVID-19).

Ayon sa embahada, nananatiling bukas ang konsulada ngunit magkakaroon ng pagbabago sa pagtanggap ng mga transaksyon.

Kailangan umano munang magpa-appointment bago magtungo sa tanggapan para hangga’t maaari ay maiwasan ang personal contact at pagdami ng tao.

Ito rin umano ang naging direktiba ng Dutch government upang maiwasan ang pagkalat ng COVID-19.

Aminado si Executive Secretary Salvador Medialdea na marami ang dapat ayusin sa pagsasailalim sa community quarantine ng Metro Manila.

Ayon kay Medialdea, nagdulot ng kalituhan sa publiko at nagsulputan ang mga katanungan kaugnay sa nasasakupan ng naturang direktiba.

Ani Medialdea, maging siya ay nakatanggap ng maraming katunangan gaya na lamang ng kung ano ang ibig sabihin ng community quarantine at anong mga mass gatherings ang ipagbabawal.

Nariyan din aniya ang mga tanong hinggil sa kung ano ang magiging sitwasyon ng mga empleyadong nagta trabaho sa Metro Manila at nakatira sa mga karatig lalawigan.

Sinabi ni Medialdea na sisikapin nilang sagutin ang lahat ng katanungan ng publiko ngayong inaayos na ang resolusyon kaugnay sa pagsasailalim sa community quarantine ng Metro Manila.

Giit ni Medialdea, kung nais ng pamahalaan ng kooperasyon mula sa mamamayan sa ibinababang direktiba dapat ay maipaliwanag at maging malinaw ang bawat nilalaman nito sa publiko.

Nais ni Senador Panfilo Lacson na maglabas ng simple, malinaw at komprehensibong paliwanag ukol sa 2019 coronavirus disease (COVID-19) ang Inter-Agency Task Force ng Department of Health (DOH).

Ayon kay Lacson, iba-iba ang impormasyong inihahayag ng mga eksperto hinggil sa sakit.

Gaya na lamang aniya ng sinabi ni dating DOH secretary Janette Garin na ang maaaring makahawa lamang ng virus ay yung may sintomas at ang dapat na isinasailalim lamang sa quarantine ay ‘yung nakaroon ng direct contact sa isang positibo sa COVID-19.

Ngunit ani Lacson, mayroong isang babae sa China na nakahawa ng limang miyembro ng pamilya kahit wala itong sintomas na naramdaman.

Kaya mas mabuti umano na maging malinaw ang lahat ng impormasyon para sa kaalaman at pag-iingat na rin sa publiko.

Umapela ang Commission on Human Rights (CHR) sa publiko na sundin ang mga inilalatag na mga hakbang ng pamahalaan para labanan ang 2019 coronavirus disease (COVID-19).

Ayon sa CHR, ang mga anila’y ‘drastic moves’ ay lubhang kinakailangan sa panahong ito kung saan, padami na ng padami ang mga naitatalang local transmission ng virus.

Bagama’t inatasan din ng Inter-Agency Task Force on Emerging Infectious Disease ang Militar at Pulisya na siyang magtitiyak ng seguridad ng lahat, umaasa silang susundin lang ng mga ito kung ano ang mga kinakailangang hakbang salig sa batas.

Ayon pa sa CHR, kailangang magkaisa at magsama sama ng lahat para sa iisang layunin na labanan ang sakit dulot ng covid 19 subalit kailangan ding isaalang-alang ang karapatang pantao sa bawat hakbang na gagawin para rito.

Inatasan na ni National Capital Region Police Office (NCRPO) Director P/MGen. Debold Sinas ang kanilang Regional Mobile Force Battalion para tauhan ang mga ilalatag nilang checkpoints.

Kasabay na rin ito ng ipatutupad na community quarantine mamayang hatinggabi kung saan, lilimitahan na ang biyahe ng mga papasok at palabas ng Metro Manila.

Ayon kay Sinas, aabot sa 26,000 pulis ang kanilang ipakakalat sa mga tukoy nang lugar na paglalatagan ng checkpoints.

Gayunman, tumanggi ang NCRPO Chief na isa-isahin ang mga lugar na ito hangga’t walang basbas mula sa national headquarters para gawin iyon.

Sa kabila ng ipatutupad na checkpoints sa mga entry at exit points, tiniyak ni Sinas na hindi pa rin nila pababayaan ang iba pa nilang tungkulin tulad ng paglaban sa krimen at ilegal na droga.

Dagsa pa rin ang mga biyahero sa iba’t ibang bus terminal sa Metro Manila ngayong Sabado, ika-14 ng Marso.

Ito’y sa gitna na rin ng ipatutupad na community quarantine sa buong Metro Manila, epektibo mamayang alas-12 ng hatinggabi.

Sa pag-iikot ng DWIZ Patrol sa ilang bus terminal sa EDSA-Cubao, kapansin-pansin na marami pa rin ang mga nag-aabang na pasahero kumpara naman sa mga bumibiyaheng bus.

Habang sa Araneta Center Bus Terminal naman, may ilang kumpaniya ng bus na nagpasyang huwag nang bumiyahe sa takot na maabutan ng pag-iral ng community quarantine.

Batay sa inilabas na guidelines ng Malacañang at ng Inter-Agency Task Force para sa community quarantine, lilimitahan ang paglabas-masok ng mga sasakyan sa Metro Manila at mga karatig lalawigan nito.

Gayunman, magbibigay ng exemption ang gobyerno hinggil sa paglabas-masok ng mga produkto lalo na ang mga pagkain, gayundin sa mga obrerong nakatira sa mga lalawigan subalit nagtatrabaho sa Maynila.

Pero ayon sa mga awtoridad, kinakailangan pa ring sumailalim sa kaukulang proseso ang mga biyahero tulad ng pagpapakita ng I.D., pagsasailalim sa medical testing at iba pa.

Pahirapan pa rin ang suplay ng rubbing alcohol sa lahat ng mga botika, supermarket, groceries at sari-sari stores sa buong Metro Manila.

Ito’y sa kabila ng pagtitiyak ng Department of Trade and Industry (DTI) na may sapat na suplay ng rubbing alcohol dahil sa banta ng COVID-19.

Sa pag-iikot ng DWIZ Patrol sa mga kilalang drug stores, groceries, supermarkets at mga sari-sari stores, kapansin-pansin na walang nakalagay na rubbing alcohol sa mga estante.

Katuwiran ng mga tauhan ng nabanggit na mga establisyemento, lubhang napakataas umano ng demand sa alcohol na mabilis nauubos kahit na kababagsak pa lang ng kanilang delivery.

Maging ang kilalang factory/warehouse ng isang pharmaceutical company sa Shaw Boulevard sa Pasig City, wala na ring suplay ng alcohol.

Una nang nagbabala ang malakaniyang laban sa mga mapagsamantala na nagtatago ng kanilang suplay ng alcohol at iba pang produktong gamit sa paglaban sa COVID-9 na kakasuhan sakaling mapatunayan ang kanilang paglabag.