DWIZ 882

Hiniling ni Cong. Joey Salceda sa Pangulong Rodrigo Duterte na magpatawag ng special session ng Kongreso.

Ipinadaan ni Salceda na syang chairman ng house ways and means committee kina House speaker Allan Peter Cayetano at Majority leader Martin Romualdez ang kanyang kahilingan sa pamamagitan ng isang liham.

Layon anya ng special session na makagawa ng mga panuntunan ang Kongreso upang mabigyan ng mas malawak na kapangyarihan ang Pangulong Rodrigo Duterte na tugunan ang problema sa coronavirus disease 2019 (COVID- 19).

Iminungkahi rin ni Salceda na amyendahan ang house rules upang bigyang daan ang virtual session assembly at botohan bilang pagsunod sa social distancing measures laban sa COVID- 19.

Binalaan ng Malakanyang ang mga nagho-hoard at namamakyaw ng alcohol at face mask at iba pang pangunahing bilihin sa gitna ng health crisis na dala ng coronavirus disease 2019 (COVID- 19).

Ayon kay Presidential spokesman Salvador Panelo, mayroong katapat na parusa ang pagsasamantala lalo na sa panahon ng krisis.

 Pinuna ni Panelo ang mga di umanoy namamakyaw ng alcohol at face mask upang ibenta ng mas mahal.

 Kalat sa social media lalo na sa facebook ang mga nagbebenta ng alcohol at face mask sa mas mataas na halaga.

Giniit ng  Department of Trade and Industry (DTI) na sapat ang suplay ng mga pangunahing pangangailangan sa bansa sa gitna ng coronavirus disease 2019 (COVID-19) outbreak.

Ayon kay DTI secretary Ramon Lopez, nagbigay ng katiyakan sa kanya ang mga manufacturers ng basic goods na hindi magkakaruon ng shortage ng mga pangunahing bilihin.

Bukod anya sa mga isang  buwang suplay sa kanilang mga bodega ay maaari rin silang agad na makapag produce ng kakailanganin.

Nagbigay na rin ng katiyakan ang national food authority na may sapat na imbak na bigas ang bansa.

Regular naman umano ang imbentaryo at imbak para sa dalawang buwan ng retail sector tulad ng Robinsons, SM at Puregold.

Samantala, Siniguro rin ng Mercury Drug store ang sapat na imbak na gamot gayundin ang alcohol mula sa Green Cross at PhilUsa Corporation.

Sinita ng Sandiganbayan ang Office of the Solicitor General (OSG) sa kawalang aksyon nito sa ill-gotten wealth case kung saan sangkot ang  katao na di umanoy naging dummy ng mag asawang Ferdinand at Imelda Marcos.

Sa isang resolusyon, pinuna ng sandiganbayan na hindi kumilos ang osg para umusad ang kaso sa nagdaang isang taon at dalawang buwan.

Ayon sa Anti-Graft court, nuong 2018 ay pinagbigyan nila ang mosyon ng osg na magkaruon ng dagdag na panahon para mapatawag ang mga akusado at maayos ang iba pang detalye ng kaso.

Gayunman, hanggang ngayon ay hindi pa umano nagbibigay ng impormasyon sa korte ang OSG.

Dahil dito, inatasan ng sandiganbayan ang osg na bigyan ng impormasyon ang korte kung anong aksyon na ang ginawa nito sa tinutukoy nilang kaso.

Nagpatupad ng travel ban ang Batanes.

Epektibo sa Marso 16 , bawal na munang pumasok ng batanes ang lahat ng biyahero.

Hindi kasama sa ban ang mga residente ng Batanes subalit kailangan nilang magpakita ng pruweba tulad ng voters id , postal id o barangay certification.

Maaari ring makapasok ang mga mayroong opisyal na dapat gawin sa batanes.

Gayunman, ang lahat ng exempted sa ban ay kailangan pa ring magpakita ng kanilang travel history at sumailalim sa quarantine.

Isang empleyado ng Philippine Institute for Development Studies (PIDS) ang kabilang sa mga nagpositibo sa coronavirus disease 2019 (COVID-19).

Ito ang kinumpirma mismo ng nabanggit na Government Owned and Controlled Company (GOCC).

Sa ipinalabas na abiso ng PIDS, kanilang sinabi na kasalukuyan nang naka-confine sa hindi tinukoy na ospital ang nabanggit nilang empleyado.

Tiniyak din ng institusyon na nagpatupad na sila ng mga preventive measure tulad ng work from home policy para sa kanilang mga empleyado hanggang Marso 19.

Nagkaroon na rin anila ng disinfection sa lahat ng working stations at mga common areas sa buong gusali na kinaroroon ng kumpanya.

Dagdag ng PIDS, nagsimula na rin ang contact tracing sa lahat ng mga nakasalamuha ng nagpositibo nilang empleyado.

Hinikayat ng Department of Health (DOH) ang publiko na magpadala ng mga katanungan hinggil sa ipatutupad na community quarantine sa Metro Manila.

Sa kanilang Facebook page, sinabi ng DOH na kanilang ikokonsidera ang lahat ng mga ipadadalang katanungan at paglilinaw para sa pagbuo ng detalyadong guidelines sa National Capital Region (NCR) community quarantine.

Ayon sa DOH, maaaring bisitahin ang naka-post na link sa kanilang official Facebook page para sa mga may nais na ipadalang tanong.

Batay sa anunsyo ni pangulong rodrigo duterte, sisimulan ang community quarantine ng Metro Manila, 12:00 a.m. ng Marso 15 araw ng linggo.

Suspendido ang number coding sa Makati City ngayong araw, Marso, 13.

Ito ang inihayag ni Makati Mayor Abby Binay kasunod na rin ng anunsiyo ni Pangulong Rodrigo Duterte hinggil sa pagsasailalim sa community quarantine ng buong Metro Manila.

Una na ring inanunsyo ni Binay ang kanselasyon ng Salcedo at Legaspi weekend markets ngayong Marso, 14 at 15 .

Sa kasalukuyan, walong residente ng Makati City ang kabilang sa 52  kumpirmadong kaso ng coronavirus disease (COVID-19) sa bansa.

Habang walo ring pasyente ang kasalukuyang naka-admit sa makati medical center kabilang ang tatlong taga-Makati City.