DWIZ 882

Nakatakdang magpalabas ng special permit ang Land Transportation Franchising and Regulatory Board (LTFRB) sa mga public utility bus (PUB).

Ito’y para payagang makabiyahe ang mga ito sa labas ng kanilang ruta bilang tugon na rin sa dumaraming bilang ng mga pasaherong pauwi sa iba’t ibang lalawigan.

Kabilang sa mga kailangang gawin ng mga nasa sektor ng transportasyon para makakuha ng special permit ay mga sumusunod:

• Kailangang magpadala ng operator ng e-mail sa LTFRB kasama ang specifications ng mga unit at kung saan bibiyahe ang mga ito.
• Kailangang lumabas na valid ang unit para ito’y makatanggap reply mula sa LTFRB at ito na ang maaaring gamitin bilang special permit-to-operate.
• Epektibo ang special permit hanggang sa araw lang ng Martes, March 17.

Nagpatupad na rin ng travel ban ang Pilipinas para sa mga bibiyahe mula sa mga bansang Iran at Italy na lubhang apektado ng 2019 coronavirus disease (COVID-19).

Ito’y ayon kay Immigration Commissioner Jaime Morente ay bilang pagtalima na rin sa kautusan ni Pangulong Rodrigo Duterte matapos itaas sa Code Red Sub Level 2 ang alerto ng Pilipinas.

Ayon kay Morente, epektibo ang travel ban sa dalawang nabanggit na bansa epektibo alas-12 ng hatinggabi bukas, ika-16 ng Marso.

Kasunod nito, sinabi ng Immigration chief na ang lahat ng mga pasaherong dumarating sa Pilipinas mula sa Iran at Italy ay kailangang magpakita ng medical certificate at isasailalim sa mandatory 14-day quarantine.

Gayunman, nilinaw ni Morente na exempted naman sa travel restriction ang mga Pinoy na kasama ang dayuhang asawa at anak na may hawak na permanent resident visas at miyembro ng diplomatic corps.

Umabot na sa 111 ang kabuuang bilang ng kumpirmadong kaso ng coronavirus disease 2019 (COVID-19) sa bansa.

Ito’y matapos makapagtala ang Department of Health (DOH) ng karagdagang 13 pang kaso ng naturang virus ngayong Sabado ng gabi.

Patuloy pang kinukumpirma ng DOH ang detalye ng mga nadagdag na panibagong kaso ng COVID-19.

Sa ngayong araw, nakapagtala ang DOH ng 47 panibagong kaso ng COVID-19.

Naglabas ang Department of Labor and Employment (DOLE) ng guidelines hinggil sa mga manggagawa na maaapektuhan ng community quarantine sa Metro Manila.

Sa Labor Advisory No. 11 series of 2020 ng DOLE na ipinalabas ngayong Sabado, idinitalye dito kung paano makakapasok at makakalabas ng Metro Manila ang mga empleyado na naninirahan sa karatig probinsya.

Batay sa advisory, oras na ipatupad na ang community quarantine sa Marso 15, papayagan pa ring makalabas at makapasok sa NCR ang mga manggagawa kung magpapakita ito ng company ID, o proof of employment, sa mga checkpoints na nagpapatunay na siya ay nagtatrabaho sa loob ng Metro Manila.

Exempted din sa travel ban ang mga empleyado ng mga healthcare facilities.

Bukod dito, nakasaad din sa advisory na hinihikayat ng DOLE ang mga employers na magpatupad ng fleixible work arrangements tulad ng work from home, skeletal work schedule, at iba pa.

Papayagan naman ang paghahatid ng mga goods, katulad ng pagkain, papasok ng Metro Manila basta’t mag presenta lamang ng proof of delivery.

Una nang inanunsyo ni Pangulong Rodrigo Duterte ang pagpapatupad ng community quarantine sa NCR na magsisimula naman sa Marso 15, 12 m.n.

Ito’y ay para mapigilan ang pagkalat ng nakamamatay na coronavirus disease 2019 (COVID-19) sa Pilipinas.

Isinusulong ni Senador Manny Pacquiao ang panukalang batas para ipagbawal na ang pagdura at pagsinga sa mga pampublikong lugar.

Ito’y sa gitna ng pagkalat ng 2019 coronavirus disease (COVID-19).

Sa ilalim ng senate bill 1406 o ang panukalang Anti-Spitting Act of 2020, papatawan ng multa na P5,000 hanggang P50,000 ang mahuhuling dudura o sisinga sa mga pampublikong lugar.

P5,000 para sa unang paglabag, P10,000 para sa ikalawang paglabag, habang P50,000 na multa at pagdalo sa isang Department of Health (DOH) seminar o anim na buwang pagkakakulong ang ipapataw para sa ikatlong paglabag.

Ayon kay Pacquiao, sa panahon ngayon ay kailangan na ng mahigpit na pagpapatupad ng batas na makakatulong para maiwasan na ang pagkalat ng sakit.