DWIZ 882

Negatibo ang resulta ng ilang opisyal ng gobyerno na nagpa-test sa coronavirus disease 2019 (COVID-19).

Una rito ay si Executive Secretary Salvador Medialdea matapos makasalamuha ang isang pasyente na nagpositibo sa COVID-19 nang dumalo ito sa inspection sa North Harbor Link sa Caloocan City.

Gayunman sinabi ni Medialdea, para makasiguro ay tatapusin pa rin niya ang 14-day quarantine.

Negatibo rin si Department of Public Works and Highways (DPWH) Secretary Mark Villar at Finance Secretary Carlos Dominguez na kapwa dumalo rin sa inspeksyon sa harbor link.

Samantala, nag negatibo rin ang COVID-19 test ni Transportation Secretary Arthur Tugade na nagkaroon din ng encounter sa isang pasyente na nagpositibo sa COVID-19.

Ngunit ayon kay Tugade, bagama’t negatibo ay susundin niya ang precautionary measure na itinakda ng Department of Health (DOH).

Suspendido na ang lahat ng gaming operations ng Philippine Amusement and Gaming Corporation (PAGCOR).

Ito’y para maiwasan ang pagkalat ng coronavirus disease 2019 (COVID-19).

Batay sa anunsyo ng PAGCOR, sakop ng suspensyon ng operasyon ang mga land-based casinos, electronic games, bingo, sports betting, poker at slot machine clubs at iba pang aktibidad sa ilalim ng PAGCOR.

Layon umano nito na mapangalagaan laban sa COVID-19 ang mga empleyado at customer.

Tatagal umano ang suspension kasabay ng implementasyon ng community quarantine sa National Capital Region (NCR).

Pumanaw na ang isang empleyado ng mababang kapulungan ng Kongreso na nagpositibo sa coronavirus disease 2019 (COVID-19).

Ito ang kinumpirma ni PBA Representative Jericho Nograles matapos bawian ng buhay ang kawani mula sa printing services ng Kamara.

Sinabi ni Nograles na mayroon na umanong dating sakit ang naturang empleyado.

Nag-pabalik balik na umano ito sa ospital nuong nakaraang taon.

Kamakailan din umano ay na-confine ito dahil sa community acquired pneumonia.

Nabatid na wala itong travel history sa anumang bansa.

Sasailalim sa assessment ng Philippine National Police (PNP) ang unang araw nang pagpapatupad ng travel restrictions sa Metro Manila kasabay ng pag-iral ng community quarantine ngayong Linggo, ika-15 ng Marso.

Ito’y ayon kay PNP Deputy Chief for Operations P/LtG. Guillermo Eleazar ay matapos mapaulat na naging maluwag ang mga awtoridad para sa mga biyaherong lumabas at pumasok sa Metro Manila kaninang madaling araw.

Pero asahan, ayon kay Eleazar ,na mas hihigpit na ang sitwasyon sa mga checkpoint sa sandaling maplantsa na nila ang mga guidelines gayundin ang exemptions nakapaloob dito.

Base sa ating monitoring ay sinasabi na, kahapon ay naging, sabihin nating medyo maluwag at in a sense ay social distancing muna ang kanilang kinonsidera, at ichec-check nga natin ‘yon at we will review itong ginawa kanina for the purpose na ma-improve na itong implementation na ito,” ani Eleazar.

Samantala, nagpapasalamat naman si Eleazar na walang pulis ang apektado ng virus sa ngayon at umaasa silang hindi na kumalat pa ang virus sa kanilang hanay.

Sa awa ng Diyos ay wala po naman (pulis na apektado ng virus) kaya’t patuloy tayo na nananalangin at kaalinsabay noon ang ating PNP Chief Police General Gamboa naman ay nagbigay ng direktiba para sa proteksyon ng ating kapulisan,” ani Eleazar. —sa panayam ng Todong Nationwide Talakayan.

Hinimok ng Philippine National Police (PNP) ang mga lumalabas ng Metro Manila na sumailalim din sa self-quarantine.

Ito’y para matiyak na ligtas sila mula sa sakit na dulot ng 2019 coronavirus disease (COVID-19) lalo’t dagsa ang mga biyahero sa nakalipas na dalawang araw na exodus.

Sa panayam ng DWIZ kay PNP Deputy Chief for Administration P/LtG. Camilo Cascolan, posible pa rin aniya kasi na makaranas ng sintomas ang isang lumabas ng Metro Manila kahit asymptomatic o wala silang naranasang sintomas ng sakit.

Bilang isang responsableng mamamayan, sinabi ni Cascolan na mahalagang magampanan ng lahat ang kanilang bahagi upang mapigilang kumalat pa ang nasabing sakit.

I would advise them to have self quarantine, siguro ang maganda d’yan, pag lumabas ka, galing ka ng Manila, much better siguro you have a self-quarantine, para sa safety mo ‘yan at sa safety ng mga magiging kasama mo,” ani Cascolan. —sa panayam ng DWIZ.

Handang balikatin ng Department of Labor and Employment (DOLE)  ang suweldo ng isang regular na empleyado ng mga pribadong kumpaniya na isasailalim sa quarantine kaugnay ng 2019 coronavirus disease (COVID-19).

Iyan ang inihayag ni Labor secretary Silvestre Bello III bilang tulong ng pamahalaan sa mga apektado ng isinasagawang community quarantine sa Metro Manila.

Pero palinawag ng kalihim, papasok lamang ang tulong ng pamahalaan sa sandaling maubos na ng apektadong empleyado ang kanilang leave credits salig sa itinatadhana ng batas.

Kinakailangan lang magpakita ng empleyado ng patunay mula sa pinapasukang kumpaniya na sumailalim nga siya sa quarantine para makakuha ng ayuda na ipadadala sa employer.

Para naman sa mga manggagawang nasa ilalim ng daily wage at apektado ng quarantine, sinabi ni Bello na pasok naman ang mga ito sa emergency employment program ng DOLE.