DWIZ 882

Ipinag-utos na ng Land Transportation Office (LTO) ang pag-revoke sa lisensya ng tatlong driver at dalawang konduktor na nagpositibo sa isinagawang random drug testing sa isang terminal sa Pasay City.

Kabilang sa mga nagpositibo ang driver ng bus na nasangkot kamakailan sa aksidente sa EDSA matapos umanong mag-text habang nagmamaneho at bumangga sa mga roadside barrier.

Ayon kay LTO Chief Assistant Secretary Markus Lacanilao, hindi nila papayagang makapagmaneho pa ang sinumang gumagamit ng ilegal na droga dahil banta ito sa kaligtasan ng mga pasahero at iba pang motorista.

Pansamantalang kinumpiska ang mga lisensya ng mga nagpositibo habang hinihintay ang resulta ng confirmatory drug test, ngunit sinimulan na rin ng LTO ang proseso para sa tuluyang pagbawi ng kanilang mga lisensya.

Bahagi ito ng pinaigting na kampanya ng LTO laban sa pagmamaneho habang nasa impluwensya ng droga at para matiyak ang kaligtasan sa pampublikong transportasyon.

Pinagtitipid ng National Water Resources Board (NWRB) ang mga residente sa Metro Manila matapos bumaba sa minimum operating level ang tubig sa Angat Dam.

Ayon sa NWRB Exec Director Sevillo David Jr., nasa 172.98 meters na lamang ang lebel ng tubig sa Angat Dam, mas mababa kumpara sa 180 meters na minimum operating level.

Bunsod nito, nagsimula nang magpatupad ng contingency measures ang NWRB kasunod ng babala ng PAGASA na maaaring tumagal ang epekto ng El Niño hanggang Disyembre o unang bahagi ng 2027.

Kabilang sa isinusulong ng ahensya ang rainwater harvesting at muling paggamit ng tubig, gaya ng tubig mula sa paghuhugas ng gulay na maaaring gamitin muli sa pagdidilig ng mga halaman.

Ang Angat Dam ang nagsusuplay sa higit nobenta porsyento ng potable water sa Metro Manila, kaya’t binawasan ng NWRB ang alokasyon ng raw water sa mga concessionaire upang matiyak ang sapat na suplay para sa mga kabahayan.

Posibleng umabot sa limang daan hanggang isang libong biktima ang makilahok sa paglilitis ng International Criminal Court (ICC) hinggil sa crimes against humanity ni dating Pangulong Rodrigo Duterte.

Ayon kay ICC Assistant to Counsel Kristina Conti, maituturing na biktima ang bawat miyembro ng isang pamilya na namatayan at naapektuhan dahil sa war on drugs.

Batay sa Article 683 ng Rome Statute, magkaiba ang mga biktima at testigo, ngunit maaari pa ring makilahok sa proceedings at magbahagi ng saloobin ang mga biktima sa pamamagitan ng legal representatives hangga’t hindi ito nakaaapekto sa karapatan ng akusado sa isang patas na paglilitis.

Muling binuksan ng ICC ang victim applications matapos kumpirmahin ang kaso ng dating pangulo noong Abril, at magtatapos naman sa Agosto a-trenta’y uno ang huling araw ng presentation of evidence ng prosecution.

Samantala, inatasan na ni ICC Trial Chamber Three Presiding Judge Joanna Korner ang Court Registry na maghanda para sa interpretasyon upang mai-ere sa Tagalog ang paglilitis na sisimulan sa November 30.—sa panulat ni Reianne Antiquina

#dwiz #dwiznews #aliw23

Bahagyang tumaas ang satisfaction rating ni Vice President Sara Duterte noong Marso 2026, ayon sa Social Weather Stations (SWS).

Batay sa survey na isinagawa mula Marso 24 hanggang 31, 54% ng mga Pilipino ang nagsabing kuntento sila sa pagganap ng Bise Presidente, habang 25% ang hindi kuntento at 21% ang hindi makapagpasya.

Ayon sa SWS, ang pagtaas ay bunsod ng mas mataas na rating sa Mindanao at Metro Manila, kahit may pagbaba sa Visayas at Balance Luzon.

Isinagawa ang survey kasabay ng pagsisimula ng pagdinig ng House Committee on Justice sa mga reklamong impeachment laban kay Duterte.

Umaasa pa rin si Akbayan Representative Chel Diokno na malalagyan pa ng mas marami at mas matalas na ngipin ang batas tungkol sa pagbubuwag ng mga political dynasty.

Matatandaang sa bersyon na ipinanukala sa Kamara, na inakda nina House Speaker Faustino “Bojie” Dy III at House Majority Leader Ferdinand “Sandro” Marcos III, hanggang second degree of consanguinity lang ang ipinagbabawal na magkakamag-anak sa kaparehong antas ng pamahalaan.

Ang nakakapagtaka para kay Diokno, walang probisyon ang House Bill tungkol sa antas ng party-list, na talamak na ng mga dinastiyang politikal.

Gayunman, kung ipapairal pa rin ang panukalang isinusulong nina Congressmen Dy at Marcos, mawawalan lang anya ng kwenta ang Anti-Political Dynasty Bill.—sa panulat ni Anjo Riñon

Natatwa na lang si Senate Minority Leader Vicente “Tito” Sotto the Third sa akusasyon ni Senador Imee Marcos kaugnay sa pag-amyenda sa Konstitusyon.

Paliwanag ni Sotto, biro lang ang impormasyon na gagawing kada rehiyon ang pagboto sa mga senador at ang posibleng pagdami ng mga miyembro nito.

Kumalat lang anya ang kwento noong ibinahagi ni Senador Panfilo Lacson ang nasabing biro sa kanyang sariling grupo.

Nagtataka rin siya kung saan nanggaling ang akusasyon ni Senador Marcos gayong tinututulan niya ang anumang pag-amyenda sa Konstitusyon.—sa panulat ni Anjo Riñon

Tiniyak ng Department of Justice ang pagiging bukas sa panig ni Senador Robin Padilla ukol sa isyu at alegasyon ng pagtulong umano nito para makatakas si Senador Ronald “Bato” dela Rosa.

Ito ang inihayag ni Justice Secretary Frederick Vida kasabay ng nagpapatuloy na imbestigasyon ng Special Panel of Prosecutors sa mga nangyari kamakailan sa Senado.

Ayon kay Vida, maaari anyang tumungo si Padilla sa DOJ upang magbigay ng paliwanag kaugnay sa mga alegasyon na kanyang kinakaharap.

Binigyang-diin din ng kagawaran na handa silang tumanggap ng pahayag at impormasyon na magmumula kaninuman na posibleng makatulong sa umuusad na imbestigasyon.—sa panulat ni Anjo Riñon

Nakatakdang magpalabas ng subpoena ang National Bureau of Investigation sa ilang mga indibidwal para magbigay-linaw sa nangyaring pagtakas ni Senador Ronald “Bato” dela Rosa sa Senado kamakailan.

Ayon kay NBI Director Melvin Matibag, kabilang sa mga ipa-subpoena ng ahensya ang mga huling nakausap o tinawagan ng senador.

Pinag-aaralan na rin aniya ng NBI na ipa-subpoena ang misis ni dela Rosa para magpaliwanag at magbigay-linaw sa kanyang post sa social media.

Matatandaang sinabi ng nasabing maybahay na ginamit umano ng kanyang mister ang insidente ng barilan sa Senado bilang oportunidad para makatakas.—sa panulat ni Anjo Riñon

Nanindigan ang limang pamilyang natitira na nagsusulong ng kaso laban sa puganteng negosyanteng si Charlie “Atong” Ang kaugnay sa mga nawawalang sabungero na hinding-hindi sila tatanggap ng anumang suhol.

Ayon kay Charlene Lasco, kapatid ng isa sa mga “missing sabungeros,” limang taon na silang naghahanap ng hustisya, kaya hindi sila uurong sa kaso.

Magkakasamang nagtungo sa Department of Justice sina Lasco at iba pang kamag-anak ng mga nawawalang sabungero upang magsampa ng reklamong obstruction of justice laban sa isa sa mga abogado ni Ang na si Atty. Caroline Cruz at iba pang kasabwat nito.

Dagdag pa ni Lasco, inalok ni Atty. Cruz ang ilang pamilya kapalit ng hindi pagdalo sa mga pagdinig kaugnay sa kaso ng mga nawawalang sabungero.—sa panulat ni Anjo Riñon

#dwiz #dwiznews #aliw23