Muling tataas ang presyo ng produktong petrolyo sa susunod na linggo.
Batay sa apat na araw na trading ng Mean of Platts Singapore ngayong linggo, madaragdagan ng P3.75 hanggang P4.25 sa kada litro ng diesel.
Madaragdagan din ng P2.50 hanggang P3 ang presyo kada litro ng gasolina.
Ito’y batay na rin sa lumalabong pag-asa na matitigil na ang tensyon sa Strait of Hormuz sa pagitan ng Estados Unidos at Iran. | Sa panulat ni Anjo Riñon
Hinimok ng Department of Foreign Affairs (DFA) ang mga otoridad ng China na pangalagaan ang kapakanan ng mahigit isangdaang Pilipino na inaresto nila dahil sa umano’y iligal na pagtatrabaho at paninirahan sa nasabing bansa.
Una rito, inanunsyo ni Chinese Foreign Ministry Spokesperson Guo Jiakun na inaresto nila ang mahigit isangdaang Pilipino na pinaghihinalaang iligal na nagtatrabaho sa kanilang bansa.
Sa kasalukuyan, nakikipag-ugnayan na ang DFA sa Philippine Embassy sa Beijing at sa mga Consulate-General upang makakuha ng karagdagang detalye, gaya ng opisyal na bilang ng mga Pilipino, mga pangyayari sa likod ng pag-aresto, at kung nasunod ang tamang proseso ng batas sa pangyayari.
Una nang binatikos ni Defense Secretary Gilberto Teodoro ang aksyon ng China at tinawag itong extortion at blackmail. l mula sa panulat ni Reianne Antiquina
Nakamit ng Readycon Trading and Construction ang kontratang nagkakahalaga ng 1.18 bilyong piso para sa preventive maintenance ng mga pangunahing bahagi ng EDSA.
Batay sa kontrata, nagkakahalaga ng 1.183 bilyon ang proyekto na iginawad ng Department of Public Works and Highways o DPWH sa ilalim ng Asset Preservation Program nito.
Saklaw ng proyekto ang preventive maintenance ng EDSA, bukod pa sa hiwalay na kontratang mahigit 4 bilyong piso para sa kabuuang rehabilitation ng naturang kalsada.
Samantala, naging usap-usapan ang EDSA rehabilitation matapos magkaroon ng mga lubak sa ilang bahagi ng kalsada kasunod ng tuloy-tuloy na pag-ulan. l mula sa panulat ni Reianne Antiquina
Ipinabubuwag ni Senador Panfilo Lacson ang “leadership fund” o allocables sa pambansang budget kasunod ng testimonya ni dating DPWH Secretary Manuel Bonoan na lahat ng senador ay mayroong hindi bababa sa limandaang milyong pisong alokasyon sa ilalim ng 2025 General Appropriations Act.
Ayon kay Senador Lacson, mas masahol pa sa pork barrel ang naturang sistema kung saan nabigyan ng pagkakataon ang mga mambabatas na magsingit ng proyekto kahit nasa preparation phase pa lamang ng pambansang budget.
Bagaman hindi anya awtomatikong may katiwalian sa isinusulong na insertion sa national budget, maaari itong maging daan sa pag-abuso at maling paggamit ng pondo.
Dagdag pa ng mambabatas, nakatutulong ang “leadership fund” upang maipaliwanag kung paano nabatid ng publiko ang tungkol sa mga indibidwal na alokasyon, kabilang ang 6.79 billion pesos para kay Senador Alan Peter Cayetano at 4.7 billion pesos para kay Sen. Pia Cayetano sa Taguig City mula sa 2025 GAA.
Humantong anya sa iligal na reclamation na itinago bilang mga proyekto para sa slope protection at flood mitigation ang mga alokasyon ng pondo sa Taguig City na iniimbestigahan ngayon ng Ombudsman at sumasailalim sa forfeiture proceedings ng Philippine Reclamation Authority. l mula sa panulat ni Reianne Antiquina
Kinumpirma ng lokal na pamahalaan ng Parañaque na nahakot na ang lahat ng basurang bumara sa Baclaran-Redemptorist Water Channel, kasunod ng tatlong araw ng puspusang paglilinis mula Agosto A-diyes hanggang A-trese, kahapon.
Ayon kay Parañaque City Mayor Edwin Olivarez, sa kabuuan, umabot sa mahigit dalawangdaang truck o katumbas ng 748.87 metriko tonelada ng basura ang nahakot ng mga kawani ng pamahalaan sa nasabing daluyan ng tubig.
Ipinaliwanag ni Mayor Olivarez na inanod mula sa mga karatig-lungsod at lalawigan ang mga basura dahil sa high-tide na sinabayan pa ng pananalasa ng hanging habagat.
Samantala, sinabi ng alkalde na pinag-uusapan na ng Metro Manila Council ang pagtatayo ng floodgate sa bukana ng Parañaque River na maaaring isara tuwing high tide sa Manila Bay bilang pangmatagalang solusyon upang maiwasan ang muling pagbabara sa Baclaran Water Channel. l mula sa panulat ni Reianne Antiquina
Suspendido pa rin ang pagpapatupad ng P85 na minimum wage hike sa Metro Manila matapos maglabas ng writ of preliminary injunction ang Pasig City Regional Trial Court Branch 152, kahapon, Agosto 13.
Pinagbigyan ng korte ang hiling ng Readycon Trading and Construction Corp. at R-Two Builders na palawigin ang suspensyon ng wage increase.
Bunsod nito, mananatiling nakabinbin ang implementasyon ng NCR Wage Order Number 27 habang hinihintay ang desisyon ng korte sa merito ng petition for declaratory relief na inihain ng dalawang kumpanya noong Hulyo 23.
Una nang naglabas ang Pasig RTC ng temporary restraining order noong Hulyo 30 na hanggang kahapon lamang ang bisa. l mula sa panulat ni Reianne Antiquina
Kumalas na ang aktres at Quezon City Councilor na si Aiko Melendez sa manager na si Ogie Diaz matapos ang tatlong taong partnership.
Gayunman, nilinaw ng aktres na nananatili silang magkaibigan.
Naging usap-usapan ang pagkalas ni Aiko dahil kilala ito bilang supporter ni Vice President Sara Duterte habang si Ogie naman ay isang Kakampink.
Sa isang panayam, ipinaliwanag ni Ogie na naging maayos ang pagpapaalam sa kanya ng aktres, at iginiit na normal lamang ito sa isang manager-talent relationship, ang importante anya ay ang pagiging magkaibigan.
Aniya, naiintindihan niya ang naging desisyon ng aktres lalo’t 80% na ng buhay ni Aiko ay nakatuon sa kanyang political career, habang 20% na lamang ang natitira para sa pagiging artista.
Tiniyak naman ng talent manager na naririyan lamang siya kung kailanganin ng tulong ni Aiko bilang isang kaibigan. l mula sa panulat ni Reianne Antiquina
Pinipili ng aktres na si Bea Alonzo na panatilihing pribado ang kanyang buhay may-asawa, isang buwan matapos ang kanilang intimate civil wedding ng businessman na si Vincent Co.
Ayon kay Bea, nais niyang protektahan ang personal na buhay na binubuo nila ni Vincent bilang mag-asawa.
Aniya, hindi niya naramdaman na kailangang ibahagi agad sa publiko ang kanilang kasal dahil nais niya na maging para sa kanilang dalawa lamang ang mahalagang sandali na iyon.
Bagaman nauunawaan ni Bea ang interes ng publiko sa kanyang personal na buhay, hindi aniya nangangahulugang kailangan niyang ibahagi ang bawat detalye ng kanilang pagsasama. l mula sa panulat ni Reianne Antiquina
Nakatakdang bumaba sa pwesto si White House Press Secretary Karoline Leavitt sa katapusan ng Agosto.
Ayon kay US President Donald Trump, nais ni Leavitt na magkaroon ng mas maraming oras para sa kanyang pamilya.
Sa kabila nito, nilinaw ni Trump na mananatili si Leavitt bilang isa sa kanyang mga senior advisor.
Bukod sa pagiging pinakabatang spokesperson ng White House sa edad na bente-otso anyos, kinilala si Leavitt dahil sa kanyang matapang at palaban na pakikipagpalitan sa mga reporter, habang mariin niyang ipinagtatanggol ang mga polisiya at pahayag ng US President.
Sa ngayon, wala pang inaanunsyo si Trump kung sino ang papalit bilang tagapagsalita ng White House. l mula sa panulat ni Reianne Antiquina
Nanindigan ang Malacañang na hindi dapat gumamit ng misleading questions ang mga abogado lalo na sa cross-examination dahil posible itong magdulot ng maling sagot.
Ito ang naging tugon ni Palace Press Officer Claire Castro kasunod ng mainit na sagutan nina Prosecutor Lorna Kapunan at Defense Atty. Kristine Ferrer sa ika-labinglimang araw ng paglilitis.
Binigyang-diin ni Usec. Castro na walang puwang ang fake news sa impeachment trial.
Sa cross-examination noong Miyerkules, iginiit ni Atty. Ferrer na “oo o hindi” lamang ang isagot ng isang state auditor ng Commission on Audit, ngunit sumingit si Atty. Kapunan at nagbabala na hindi pinahihintulutan ang mga misleading questions sa cross-examination. | Sa panulat ni Reianne Antiquina